Jeremias 42 - Bible with DC

Paikararagan dagiti Tattao ken ni Jeremias

1Kalpasanna, immay kaniak dagiti amin a pangulo dagiti armada agraman ni Johanan nga anak ni Karea, ni Azarias nga anak ni Hosaias ken nadumaduma a tattao, natan-ok ken nanumo.

2Kinunada kaniak, “Pangngaasim ta ipangagmo ti dawatmi! Ikararagannakami iti Apo a Diostayo. Idawdawatannakam amin a natda. Adukami idi, ngem kas makitam, bassitkamin.

3Idawdawatmo nga ipakaammo koma ti Apo a Diostayo ti tumutop a dalan ken rumbeng nga aramidenmi.”

4“Ala wen,” insungbatko. “Ikarkararagankayto iti Apo a Diostayo kas dawatenyo. No aniaman ti kunana, ibagakto kadakayo. Awanto ti ilimedko.”

5Kinunada kaniak, “Ti Apo a Diostayo ti agbalin a pudno ken matalek a saksi a maibusor kadakami no dimi tungpalen dagiti amin nga ibagana kenka nga aramidenmi.

6Naimbag man wenno dakes, agtulnogkamto iti Apo a Diostayo a pangibaonanmi kenka. Awanto ti pakaan-anoanmi no agtulnogkami kenkuana.”

Ti Sungbat ni Yahweh iti Kararag ni Jeremias

7Kalpasan ti sangapulo nga aldaw, nagsao kaniak ti Apo,

8isu nga inayabak ni Johanan nga anak ni Karea, dagiti amin a pangulo dagiti armada a kinakuyogna ken dagiti nadumaduma a tattao, natan-ok ken nanumo.

9Kinunak kadakuada, “Kastoy ti imbaga ti Apo a Dios ti Israel a nangibaonanyo kaniak tapno idatagko ti dawatyo:

10‘No kayatyo ti agnaed iti daytoy a daga, parang-ayenkayo ket saankayo a dadaelen. Imulakayto ket saankayo a paruten. Ladingitek unay ti panangdadaelko kadakayo.

11Saankayon nga agbutbuteng iti ari ti Babilonia. Diyo kabuteng ta aywanankayo. Salaknibankayo ket isalakankayo iti pannakabalinna.

12Gapu ta manangngaasiak, ipamuspusak ti panangngaasina kadakayo ket palubosannakayto nga agawid. Siak, ni Yahweh, ti nagsao iti daytoy.’

13-15“Ngem dakayo a natda iti Juda, saankayo nga agsuksukir iti Apo a Diosyo ket saankayo nga agsukir nga agnaed iti daytoy a daga. Diyo kunkuna, ‘Dimi kayat ti agnaed ditoy. Kayatmi ti mapan agnaed idiay Egipto. Awan gubgubat sadiay wenno mangayab kadakami a makigubat. Awan bisin.’ Ta no kunayo daytoy, kastoy met ti sao ti Apo a Mannakabalin-amin a Dios ti Israel, ‘No ipapilityo ti mapan agnaed idiay Egipto,

16makamakamnakayto ti gubat a kabutbutengyo. Surotennakayto ti bisin a kaam-amakyo. Mataykayto idiay Egipto.

17Matayto amin iti gubat wenno bisin wenno angol ti mapan agnaed sadiay. Awanto ti matda. Awanto ti makalisi iti didigra nga idissuorko kadakuada.’

18“Kuna ti Apo a Dios ti Israel, ‘No inkay idiay Egipto, idissuorkonto kadakayo ti unget ken pungtotko a kas iti indissuorko kadagiti taga-Jerusalem. Nakakaasinto ti kasasaadyo. Pagang-angawandakayto dagiti tattao ket pagilunoddanto ti naganyo. Saanyonton a makita daytoy a lugar.’”

19Intuloyko ti nagsao, “Imbaga ti Apo kadakayo a natda iti Juda a dikay mapmapan idiay Egipto. Ita nga aldaw, ballaagankayo

20a nagbiddutkayo. Imbaondak iti Apo a Diostayo a nangikararag kadakayo. Imbagayo nga ibagak amin nga aramidenyo ket tungpalenyo.

21Ita, imbagak aminen kadakayo, ngem diyo tinungpal ti amin a pinaibaga ti Apo a Diostayo.

22Ngarud, laglagipenyo daytoy: mataykayto iti kampilan wenno bisin wenno angol iti daga a kayatyo a pagnaedan.”