Dungdung-aw 2 - Bible with DC

Ti Panangdusa ti Apo

iti Jerusalem

1Pinagsipnget ti Apo ti Sion gapu iti pungtotna.

Pinagbalinna a rebrebba

ti nailangitan a dayagna.

Iti aldaw ti pungtotna, binaybay-anna uray pay ti pagbatayan dagiti sakana.

2Dinadael ti Apo amin nga il-ili ti Juda,

dina kinaasian ti uray maysa kadakuada.

Rinakrakna dagiti sarikedked

a nangsalaknib iti daga.

Inyegna ti pannakaibabain

ti pagarian ken dagiti ofisialesna.

3Winarawarana ti bileg ti Israel gapu iti pungtotna.

Dina kayat ti tumulong kadatayo idi dumteng dagiti kabusor.

Kasla apuy a nagdissuor kadatayo ket dinadaelna amin ket nagbalinda a dapu.

4Mayarig ti Apo iti kabusor

a nangipaturong kadagiti panana kadatayo.

Pinapatayna dagiti amin

a pagtangtangsit ken pagragsakantayo.

Ditoy Jerusalem, nariknatayo ti gumilgil-ayab a pungtotna.

5Kasla maysa a kabusor ti Apo a nangdadael iti Israel.

Dinadaelna dagiti sarikedked ken dagiti palasiona.

Inyegna ti di agpatingga a ladingit kadagiti tattao ti Juda.

6Binurakburakna ti Templo

a nagdaydayawantayo kenkuana.

Ginibusan ni Yahweh dagiti aldaw a nasantoan ken Aldaw a Panaginana.

Agpada ti ari ken padi a nakarikna

ti bileg ti pungtotna.

7Linaksid ti Apo ti altarna ket pinanawanna ti nasantoan a Templona.

Pinalubosanna ti kabusor

a mangrebba kadagiti bakudna.

Nagpupukkawda iti panagballigida

iti disso a nagdaydayawantay a siraragsak.

8Inkeddengen ti Apo a marpuog dagiti bakud ti Sion.

Rinukodna ida tapno awan duadua ti pannakadadaelda.

Agpapadan a narpuog dagiti pagwanawanan ken bakud.

9Nagaburan dagiti ruangan;

natukkotukkol dagiti balunetda.

Napagtalaw a kas balud ti ari agraman dagiti ofisialesna.

Saanen a maisuro ti Linteg;

awanen ti parmata dagiti profeta nga aggapu ken ni Yahweh.

10Naulimek dagiti lallakay iti Jerusalem.

Agtutugawda iti daga.

Tapoktapok dagiti uloda

ket nakersang a lupot ti kawesda.

Nakadumog dagiti babbalasitang ket mulmulenglenganda ti daga.

11Limtegen dagiti matak iti kasasangit;

mariribuk ti kararuak.

Napakapsutanak iti ladingit

gapu iti pannakadadael dagiti kailiak.

Matalimudaw dagiti ubbing ken maladaga

kadagiti kalsada iti siudad.

12Umasugda kadagiti innada

gapu iti bisin ken wawda.

Mapasagda kadagiti kalsada

a kasda la nasugatan.

Main-inutda a matay

iti saklot dagiti innada.

13O Jerusalem, siudad nga ipatpategko,

ania ti maibagak?

Kasano ti panangliwliwak kenka?

Awan pay ti nagsagaba iti kastoy.

Di matukod a kas iti taaw ti pannakadidigram;

awan ti namnama a maimbaganka.

14Pasig nga ulbod ti imbagbaga dagiti profetam;

naallilawka kadagiti inkaskasabada;

pulos a dida imbutaktak ti basolmo.

Inyaw-awandaka ket impagarupmo

a saanen a nasken nga agbabawika.

15Iti dalan a lumabas iti siudad,

iwitwitiwit dagiti tattao ti im-imada

a mangipakita iti pananglaisda.

Agwingiwingda ket katawaanda

ti narba a Jerusalem.

Kastoy ti ikatawada,

“Daytoy kadi ti kunada a napintas a siudad?

Daytoy kadi ti pagtangtangsit ti lubong?”

16Laisendaka dagiti amin a kabusormo,

napnoanda iti gura a mangmulagat kenka.

Aglibbi ken guy-guyabandaka a kunada,

“Dinadaelmin ti siudad!

Daytoy ti tiempo nga inur-uraymi ket itan nakitami.”

17Iti kamaudianna, inaramid ti Apo ti impangtana:

awan asina a nangdadael kadatayo,

kas imballaagna idi un-unana.

Pinagballigina dagiti kabusortayo,

pinagragsakna ida gapu iti pannakaparmektayo.

18O Jerusalem, bay-am dagiti bakudmo nga umasug iti Apo.

Palubosam nga agayus dagiti luam

a kas karayan iti aldaw ken rabii.

Bannogem dayta bagim

iti panagsangsangit ken panagladladingit.

19Bumangonka nga umidda iti rabii,

ket umasugka iti Apo.

Yebkasmo ti adda dita pusom,

ket dawatem a kaasianna dagiti annakmo—

dagiti annakmo a matmatay iti bisin

iti amin a nagsulian ti kalsada.

20Kitaem, O Apo, kitaem dagiti parparigatem!

Rumbeng kadi a sidaen dagiti inna

dagiti annak nga inay-ayatda?

Rumbeng kadi a mapapatay dagiti papadi ken profeta

iti uneg ti santuariom?

21Kadagiti kalsada, agkaiwara't bangbangkay

dagiti ubbing ken nataengan,

dagiti agtutubo a babbai ken lallaki,

isuda a napapatay iti kampilan.

Awan asim a nangpapatay kadakuada

iti aldaw ti pungtotmo.

22Inawismo dagiti kabusorko

a mangaramid iti nakabutbuteng

a panagrarambak iti likmutko.

Awan ti makalibas uray maysa iti dayta aldaw ti pungtotmo.

Pinapatayda dagiti annakko

a pinadakkel ken inay-ayatko.