Dagiti Salmo 77 - Bible with DC

Pannakaliwliwa iti Tiempo ti Riribuk

1Yikkisko ti umasug iti Dios,

ipigsak ti umawag ket denggennak.

2Agkararagak iti Apo

iti tiempo ti pannakariribukko;

agpatpatnag nga agkararagak a singangato dagiti imak

ngem awan pannakaliwliwak.

3Lagipek ti Dios ket agasugak;

agammirisak ket maupayak.

4Dina ipalubos a maalak ti turogko,

kasta unay ti danagko ket diak makasao.

5Mapanunotko dagiti naikupin a panawen;

malagipko met dagiti limmabasen a tawen.

6Agpatpatnag a nauneg dagiti pampanunotko;

agpampanunotak ket saludsodek itoy nakemko:

7“Kanayonto la ngatan a ti Apo laksidennak?

Saanto ngata a mangaasi manen kaniak?

8Limmammiis ngatan ti di agbalbaliw nga ayatna?

Saanna ngatan a tungpalen ti karina?

9Nagpatingga ngatan ti kinamanagparaburna?

Pungtot kadin ti simmukat iti kinamanangngaasina?”

10Ket kinunak, “Daytoy ti pagsakitan ti nakemko:

ti pannakabalin ti Dios, saanen a kas idi damo.”

11Dagiti aramidmo, O Apo, laglagipekto ida,

wen, dagiti impakitam a milagro idi un-unana.

12Lagipekto dagiti amin a gapuanam;

utobekto dagiti aramidmo a naindaklan.

13O Dios, nasantoan amin a gapuanam!

Awan dios a kas kenka a naindaklan.

14Sika ti Dios nga agaramid kadagiti milagro;

impakitam kadagiti nasion ti bilegmo.

15Babaen iti bilegmo, sinubbotmo dagiti bukodmo a tattao,

dagiti kaputotan da Jacob ken Jose.

16Nakitadaka dagiti danum, O Dios, ket nagbutengda;

uray dagiti kaadalman a taaw nagpigergerda.

17Imbuyat dagiti ulep ti tudo;

naggurruod iti tangatang

ket nagkimat iti agsasallupang.

18Agallangogan ti uni ti gurruodmo,

ket ti lubong malawagan kadagiti kimatmo;

nagkintayeg ken nagpigerger ti daga.

19Nagnaka iti baybay;

ti adalem a taaw binallasiwmo,

ngem saan a makita dagiti tugotmo.

20Arigmo iti pastor a nangidalan kadagiti tattaom,

babaen iti panangidaulo da Moises ken Aaron.