1Dagitoy ti sagudayen ti tulag nga imbilin ni Yahweh ken ni Moises tapno ipakaammona kadagiti Israelita idiay Moab. Mainayon daytoy kadagiti alagaden ti pannakitulagna kadakuada idiay Bantay Sinai.
2Inummong ni Moises dagiti amin nga Israelita ket kinunana, “Dakayo a mismo ti nakakita iti inaramid ti Apo iti ari ti Egipto, kadagiti ofisialesna ken iti entero a pagilianna.
3Naimatanganyo dagiti nakabutbuteng a didigra, milagro ken dagiti nakaskasdaaw a pagilasinan nga imparangarang ti Apo.
4Ngem agpapan ita, saanna nga inlawlawag kadakayo ti kaipapanan dagiti padpadasyo.
5Bayat ti 40 a tawen a panangidalanna kadakayo idiay let-ang, saan a dimmaan wenno narunot dagiti sandalias ken pagan-anayyo.
6Awan ti tinapay idi a makanyo wenno arak a mainumyo ngem impaay ti Apo dagiti masapsapulyo tapno ipakaammona kadakayo nga isu ti Diosyo.
7IdiNum. 21:21-30; Num. 21:31-35. dimtengtayo ditoy, ginubatdatayo ni Sihon nga ari ti Hesbon ken ni Og nga ari ti Basan ngem pinarmektayo ida.
8InnalatayoNum. 32:33. dagiti dagada ket imbunongtayo ida kadagiti tribu ti Ruben, Gad ken ti kagudua ti tribu ti Manases.
9Tungpalenyo a sipapasnek ti linaon daytoy a katulagan tapno agballigikayo iti amin nga aramidyo.
10“Ita nga aldaw, addakayo amin iti imatang ti Apo a Diosyo—dagiti pangulo ken ofisialesyo, dagiti tattaoyo,
11babbai ken ubbing ken dagiti ganggannaet a makipagnaed kadakayo a para-pukan iti kayo ken para-sakdoyo.
12Addakayo ditoy ita tapno makitulagkayo iti Apo a Diosyo ken tapno isapatayo a tungpalen dagiti sagudayen daytoy a tulag.
13Iti kasta, patalgedanna a tattaonakayo ket isu ti Diosyo a kas inkarina kadakayo ken kadagidi kapuonanyo, da Abraham, Isaac ken Jacob.
14Saan la a dakayo ti pakitulagan ti Dios ken pangipaannonganna kadagitoy a sagudayen.
15Makitulag kadatayo amin nga adda ditoy ita iti imatangna ken kadagiti kaputotanyo a di pay nayanak.
16“Ammoyo no kasano ti panagbiagtayo idi idiay Egipto ken dagiti nagpasarantayo iti panagdaliasattayo iti daga dagiti sabali a pagilian.
17Nakitayo dagiti makarimon a didiosenda a naaramid iti kayo, bato, pirak ken balitok.
18AgannadkayoHeb. 12:15. amangan no adda tumaud kadakayo—lalaki, babai, familia wenno tribu—a mangtallikud iti Apo a Diostayo ket agdaydayaw kadagiti didiosen dagiti sabali a nasion. Wen, agannadkayo amangan no tumaud kadakayo ti tao a kas iti kayo a napait ken makasabidong ti bungana.
19Awan koma ti siasinoman nga adda ditoy ita a dumdumngeg iti nasagradoan a katulagan ti mangibaga iti bagina nga awan ti pakaan-anoanna uray aramidenna ti kaykayatna. Iramannakayo amin a maikisap, naimbag man wenno managdakdakes.
20Dinto pakawanen ti Apo ti kasta a tao. Agdissuorto ti gumilgil-ayab a pungtotna kenkuana ket lak-amennanto ti amin a didigra a nailanad iti daytoy a libro agingga a mapunas ti naganna iti rabaw ti daga.
21Isunto ti pagbalinen ti Apo a pakaballaagan dagiti amin a tribu ti Israel. Dusaennanto kas mayannurot kadagiti amin a lunod a nailanad iti daytoy a libro ti pannursuro ti Apo.
22“Iti masakbayan, makitanto dagiti kaputotanyo ken dagiti ganggannaet kadagiti adayo a pagilian ti didigra ken panagsagaba nga indissuor ti Apo iti dagayo.
23AwantoGen. 19:24-25. ti serserbi ti daga ta makumotanto iti asufre ken asin. Awanto ti maimula ket uray ruruot dinto agtubo sadiay. Maipadanto ti dagayo kadagiti ili ti Sodoma ken Gomorra, Adma ken Seboim a dinadael ti Dios idi kasta unay ti pungtotna.
24Saludsodento dagiti nasion, ‘Apay a kasta ti inaramid ti Apo iti daytoy a daga? Apay a nagbettak ti kasta unay a pungtotna?’
25Kastoyto ti sungbat: ‘Gapu ta sinalungasing dagiti tattaona ti katulaganda iti Apo a Dios dagidi kapuonanda idi inruarna ida idiay Egipto.
26Nagserbida kadagiti didiosen a dida pay nagdaydayawan, uray no imparit ti Apo a pagdaydayawanda.
27Daytoy ti gapuna a simged ti pungtot ti Apo kadagiti tattaona, ket indissuorna iti dagada dagiti amin a didigra a nailanad iti daytoy a libro.
28Kasta unay ti pungtot ti Apo, ket pinapanawna ida iti dagada sana imbelleng ida iti ganggannaet a pagilian nga ayanda agingga ita.’
29“Adda dagiti palimed a saan nga impakaammo ti Apo a Diostayo. Ngem kukuatayo iti agnanayon, datayo ken dagiti kaputotantayo, dagiti naipakaammo a palimed tapno tungpalentayo dagiti amin nga alagaden daytoy a linteg.”
Who We AreWhat We EelieveWhat We Do
2025 by iamachristian.org,Inc All rights reserved.
