Deuteronomio 6 - Bible with DC

Ti Naindaklan a Bilin

1“Dagitoy dagiti bilin ken linteg nga intuyang kadakayo ti Apo a Diosyo. Masapul a sursuroen ken tungpalenyo dagitoy iti daga a dandaniyon serken ken tagikuaen.

2Bayat ti panagbiagyo, masapul nga agbutengkayo iti Apo a Diosyo ket tungpalenyo dagiti amin a lintegna nga itedko kadakayo tapno napautto ti panagbiagyo sadiay.

3Dumngegkayo, dakayo nga Israelita, ket ikagumaanyo a tungpalen dagitoy tapno nasayaatto ti kasasaadyo. Agbalinkayto a nabileg a nasion ken agnaedkayto iti nadam-eg ken nabaknang a daga, kas inkari ti Apo a Dios dagiti kapuonantayo.

4“TattaoMar. 12:29. ti Israel, laglagipenyo daytoy! Ti Apo a Diostayo ket isu laeng ti Apo.

5AyatenyoMat. 22:37; Mar. 12:30; Luc. 10:27. ti Apo a Diosyo iti amin a pusoyo, iti amin a kararuayo, ken iti amin a pigsayo.

6DiyoDeut. 11:18-20. lipaten dagitoy a bilin nga itedko kadakayo ita nga aldaw.

7Isuroyo dagitoy kadagiti annakyo. Saritaenyo ida no addakayo iti taengyo wenno addakayo iti kalsada, no inkay maturog ken no bumangonkayo iti bigat.

8Igalutyo ida kadagiti takkiagyo a kas pagilasinan ken ikabilyo ida kadagiti mugingyo kas marka.

9Isuratyo ida kadagiti baotek ti balayyo ken kadagiti ruanganyo.”

Ballaag maipapan iti Kinasukir

10“KasGen. 12:7; Gen. 26:3; Gen. 28:13. inkari ti Apo a Diosyo kadagiti kapuonanyo, da Abraham, Isaac ken Jacob, ikkannakayo iti daga nga addaan iti dadakkel ken narang-ay a siudad a dikay binangon.

11Mapnonto dagiti balay iti agkakaimbag a bambanag a diyo nagrigatan. Addanto dagiti bubon a diyo nagkali ken kaubasan ken kaoliboan a namulaanen. Inton yegnakayo ti Apo iti daytoy a daga ket adda amin a kayatyo a kanen,

12ikagumaanyo a diyo lipaten ti Apo a nangiruar kadakayo idiay Egipto a nakatagabuanyo.

13AgbutengkayoMat. 4:10; Luc. 4:8. iti Apo a Diosyo! Agdaydayawkayo kenkuana ket ti laeng naganna ti aramatenyo no agkarikayo.

14Dikay agrukbab kadagiti sabali a didiosen, iti uray ania a didiosen dagiti tattao iti likmutyo.

15No agrukbabkayo kadagiti didiosen, agdissuorto ti pungtot ti Apo ket kaslanto apuy a mangibus kadakayo. Ngamin, naimon ti Apo a Diosyo; dina ipalubos nga adda kasalisalna.

16“DiyoMat. 4:7; Luc. 4:12; Ex. 17:1-7. suoten ti Apo a Diosyo a kas iti inaramidyo idiay Massa.

17Ikagumaanyo a tungpalen ti amin a linteg nga intedna kadakayo.

18Aramidenyo ti nalinteg ken naimbag iti imatang ti Apo tapno rumang-aykayo ken matagikuayo ti nadam-eg a daga nga inkari ti Apo kadagiti kapuonanyo.

19Paksiatenyonto dagiti kabusoryo, kas inkarina.

20“Iti masakbayan, saludsodento dagiti annakyo, ‘Apay nga imbilin ti Apo a Diostayo a tungpalentayo amin dagitoy a linteg?’

21Kastoyto ti isungbatyo kadakuada, ‘Tagabukami idi ti ari ti Egipto ket inispalnakami ti Apo babaen iti naindaklan a pannakabalinna.

22Nakitami dagiti milagro ken nakabutbuteng a banag nga inaramidna kadagiti Egipcio ken iti arida ken amin nga ofisialesna.

23Inruarnakami idiay Egipto tapno ipannakami iti daga nga inkarina kadagidi kapuonantayo.

24Imbilin ti Apo a Diostayo a tungpalenmi amin a lintegna ken agbutengkami kenkuana tapno kanayonto nga aywananna ti nasiontayo ket pagtalinaedanna a narang-ay.

25Maragsakanto ti Dios kadatayo no napudnotayo nga agtungpal kadagiti amin nga imbilinna kadatayo.’”