Deuteronomio 3 - Bible with DC

Parmeken ti Israel ni Ari Og(Num. 21:31-35)

1“Nagtuloytayo ket nagpa-amianantayo a nagturong iti deppaar ti Basan. Idi makadanontay iti asideg ti ili ti Edrei, dinarupdatayo ni Ari Og ken dagiti amin a tattaona.

2Ngem kinuna kaniak ti Apo, ‘Dika agbuteng, ta inyawatko kenkan ni Og, agraman dagiti tattaona, ken ti dagana. Aramidem met kenkuana ti kas iti inaramidmo ken ni Sihon nga ari dagiti Amorreo a nagturay idiay Hesbon.’

3“Inyawat ngarud ti Apo ni Ari Og ken dagiti tattaona iti pannakabalintayo ket pinapataytay amin ida.

4Iti dayta a tiempo, rinabsuttayo ti amin nga il-ilina—ti entero nga Argob iti pagarian ni Og idiay Basan. Innem a pulo amin dagiti ili a sinakuptayo.

5Nasarikedkedan amin dagitoy nga ili iti nangangato a bakud; nabalunetan dagiti ruanganda. Adu met dagiti barrio nga awan ti bakudna.

6Rinebbatayo dagiti amin nga ili. Pinataytayo amin a lallaki, babbai ken ubbing, a kas iti inaramidtayo kadagiti ili nga inturayan ni Sihon nga ari ti Hesbon.

7Innalatayo dagiti bakada ket nagsamsamtayo kadagiti ili.

8“Iti daydi a tiempo, innalatayo kadagita dua nga ari dagiti Amorreo ti daga iti daya ti Karayan Jordan, manipud Karayan Arnon agingga iti Bantay Hermon. (

9Sirion ti pangawag dagiti Sidonio iti Bantay Hermon; Senir ti pangawag met dagiti Amorreo.)

10Innalatay amin a masakupan ni Og nga ari ti Basan: dagiti siudad iti tanap, ti entero a Galaad ken Basan agingga kadagiti ili ti Saleca ken Edrei iti daya.”

(

11Ni Ari Og ti maudi a kaputotan dagiti Refaim. Naaramid iti bato ti lungonna nga innem a kadapan ti kalawana ken dandani 14 a kadapan ti kaatiddogna. Adda pay la daytoy idiay Rabba a siudad iti Ammon.)

Dagiti Tribu a Nagnaed iti Daya ti Jordan(Num. 32:1-42)

12“Idi natagikuatayon ti daga, intedko kadagiti tribu ti Ruben ken ni Gad ti daga iti amianan ti ili ti Aroer iti asideg ti Karayan Arnon, ken paset ti katurturodan ti Galaad, agraman dagiti ilina.

13Intedko met iti kagudua a tribu ni Manases ti natda a daga ti Galaad ken ti entero a Basan nga inturayan idi ni Og, kayatna a sawen, ti entero a daga ti Argob.”

(Daga idi dagiti Refaim ti entero a Basan.

14Innala ni Jair a nagtaud iti tribu ti Manases ti entero nga Argob, kayatna a sawen, ti Basan agingga iti beddeng ti Gesur ken Maacat. Agpapan ita, adda pay laeng barbarrio sadiay a maaw-awagan iti Jair a naipasurot iti naganna.)

15“Intedko ti Galaad iti kaputotan ni Makir iti tribu ti Manases.

16Intedko met kadagiti tribu ti Ruben ken Gad ti daga manipud Galaad agingga iti Karayan Arnon. Ti tengnga ti karayan ti beddengda iti abagatan ket ti Karayan Jabbok ti beddengda iti amianan, isu a paset met ti beddeng ti Ammon.

17Iti laud, dumanon iti Karayan Jordan ti sakupda, manipud Dan-aw ti Galilea iti amianan ket agpababa agingga iti Natay a Baybay iti abagatan ken iti arisadsad ti Bantay Pisga iti daya.

18“ItiJos. 1:12-15. daydi met la a tiempo, imbagak kadakuada: ‘Inted kadakayo ti Apo a Diostayo daytoy a daga iti daya ti Jordan a sakupenyo. Ita, armasanyo dagiti mannakigubat ket ibaonyo ida iti ballasiw ti Jordan. Umun-unada ngem dagiti dadduma a tribu ti Israel tapno tulonganda ida a mangsakup iti dagada.

19Mabati dagiti assawayo, annakyo ken bakayo—ammok nga adu ti animalyo—kadagiti ili nga intedko kadakayo.

20Saankayo nga agsubli no saan a masakup dagiti padayo nga Israelita ti daga nga inted kadakuada ti Apo iti laud ti Jordan ken natalgedda sadiay a kas kadakayo ditoy gapu iti Apo. Kalpasanna, mabalinyon ti agsubli iti daga nga intedko kadakayo.’

21“Binilinko ni Josue: ‘Nakitam ti amin nga inaramid ti Apo a Diosyo kadagita dua nga ari, da Sihon ken Og; kastanto met ti aramidenna kadagiti tattao iti masakupanyo a daga.

22Dikay agbuteng kadakuada ta tulongannakayo a makigubat ti Apo a Diosyo.’

Saan a Mapalubosan ni Moises a Sumrek iti Canaan

23“KetNum. 27:12-14; Deut. 32:48-52. sipapasnekak a nagkiddaw idi iti Apo.

24‘Apo Dios,’ inkararagko, ‘rinugiamon nga impakita kaniak dagiti naindaklan ken nakaskasdaaw a banag nga aramidmo. Awan dios iti langit wenno iti daga a makaaramid kadagiti nakaskasdaaw a banag nga inaramidmo!

25Palubosannak koma a bumallasiw, tapno makitak ti nadam-eg a daga iti labes ti Jordan, ti napintas a katurturodan a paset ti pagilian ken ti Bantay Libano.’

26“Ngem dinak impangag ti Apo ta nagpungtot kaniak gapu kadakayo. Kinunana ketdi, ‘Husto daytan! Dimo ipalagip daytan!

27Inka iti tapaw ti Bantay Pisga ket iwarasmo ti panagkitam iti aglawlaw. Matmatam a naimbag ti makitam, gapu ta pulos a dimonto ballasiwen ti Jordan.

28Bilinemon ni Josue. Pabilgem ti pakinakemna gapu ta ipanguloannanto dagiti tattao a bumallasiw tapno sakupenda ti daga a makitam.’

29“Ngarud, nagyantayo iti tanap, iti ballasiw ti ili ti Bet-peor.”