Isaias 14 - Bible with DC

Agsubli dagiti Napagtalaw

1Kaasianto manen ti Apo dagiti tattaona nga Israelita ket pagbalinenna ida a kukuana. Pagnaedennanto manen ida iti bukodda a daga. Umayto dagiti ganggannaet ket makipagnaeddanto kadakuada.

2Adunto a nasion ti tumulong kadagiti Israelita nga agsubli iti daga nga inted ti Apo kadakuada ket sadiay, agserbinto dagiti pagilian a kas tagabu ti Israel. Dagiti nangparmek idi kadagiti Israelita, parmekento met dagiti Israelita. Iturayandanto dagiti nangidadanes idi kadakuada.

Ti Ari ti Babilonia iti Lubong dagiti Natay

3Palung-awento ti Apo dagiti Israelita. Ikkatennanto ti saem ken panagsagabada ken ti nadagsen a trabaho a naipabaklay kadakuada.

4Inton aramidenna daytoy, rabrabakendanto ti ari ti Babilonia ket kunada:

“Napasagen ti naranggas nga ari! Saannanton a parigaten ti siasinoman!

5Ginibusan ti Apo ti bileg dagiti nadangkok nga agturay

6a sipupungtot a nangidadanes kadagiti tattao ket dida insardeng ti panangparigatda kadagiti nasion a pinarmekda.

7Ita, adda met laengen talna ken kappia iti entero a daga ket agkanta a siraragsak ti tunggal tao.

8Agragsak uray dagiti parwa ken dagiti sedro ti Libano gapu ta napasagen ti ari ket awanen ti mangpukan kadakuada!

9“Agsagsaganan ti lubong dagiti natay a mangpasangbay iti ari ti Babilonia. Agriing dagiti natay a nabileg nga agturay idi iti daga. Bumangbangon dagiti natay nga ari kadagiti tronoda.

10Agmaymaysada amin a mangipukkaw kenkuana, ‘Ita, agpapadatayon a nakapuy. Maysakan kadakami!

11Mararaemka idi ket toktokarandaka kadagiti arpa, ngem ita, addakan iti lubong dagiti natay! Dagitinto sur-it ti pagiddaam ket dagitinto igges ti inka pagules!’”

12Sika,Pal. 8:10; 9:1. ari ti Babilonia, sika a baggak ti agsapa, anian a pannakatnagmo! Pinarmekmo idi dagiti nasion, ngem ita naidasaykan iti daga.

13InkeddengmoMat. 11:23; Luc. 10:15. ti umuli sadi langit tapno ipasdekmo ti tronom iti ngatoen dagiti kangatoan a bituen. Impagarupmo nga agtugawka a kas maysa nga ari iti dayta a bantay iti amianan a paguummongan dagiti didiosen.

14Imbagam nga umulika iti tapaw dagiti ulep ket agbalinka a kas iti Mannakabalin-amin.

15Ngem naipababaka ketdi iti kaunggan a paset ti lubong dagiti natay.

16Mulagatandakanto dagiti natay ket masdaawdanto iti napasamak kenka. Saludsodendanto, “Daytoy kadi daydi nanggunggon iti daga ken namagtigerger kadagiti pagarian?

17Daytoy kadi ti nangdadael kadagiti siudad ken namagbalin a let-ang ti lubong? Daytoy kadi daydi saan a nangwayawaya kadagiti baludna wenno nangpagawid kadakuada?”

18Naikabil kadagiti napintas a tanem ti bangkay dagiti amin nga ari ti daga

19ngem saanka a naitanem ket naiwalang ti bangkaymo a nabaybay-an nga agrupsa. Nagaburan ti bangkaymo kadagiti bangkay dagiti soldado a napapatay iti paggugubatan. Nairaman kadagiti bangkayda a naipurruak iti abut a kabatbatoan, ket mapayatpayatan.

20Gapu ta dinadaelmo ti pagilian ket pinataymo dagiti bukodmo a tattao, dikanto maitanem a kas kadagiti dadduma nga ari. Awanto ti makalasat iti managdakdakes a familiam.

21Irugiyo ti panagpapatay! Matayto dagiti annak daytoy nga ari gapu kadagiti basol dagiti kapuonanda. Awanto kadakuada ti agturay iti lubong wenno agbangon kadagiti siudad a mangpunno iti daga.

Dadaelen ti Dios ti Babilonia

22Kuna ti Apo a Mannakabalin-amin, “Darupek ti Babilonia ket dadaelek a mamimpinsan. Awan ti ibatik uray maysa—awan uray dagiti ubbing. Awanto a pulos ti makalasat. Siak, ni Yahweh, ti nangibaga iti daytoy.

23Pagbalinekto ti Babilonia a kadandanuman a daga ket agnaedto sadiay dagiti kullaaw. Sagadakto ti Babilonia agingga a maikkat ti amin kenkuana. Siak, ni Yahweh a Mannakabalin-amin, ti nangibaga iti daytoy.”

Dadaelen ti Dios ti Asiria

24InsapataIs. 10:5-34; Nah. 1:1–3:19; Sof. 2:13-15. ti Apo a Mannakabalin-amin: “Matungpal a matungpal ti inkeddengko nga aramiden. Awan duadua a mapasamak ti inkeddengko a maaramid.

25Dadaelekto dagiti taga-Asiria nga adda iti dagak nga Israel ket payatpayatek ida kadagiti bantayko. Wayawayaakto dagiti tattaok iti panangtagabu dagiti Asirio kadakuada. Ikkatekon dagiti nadagsen nga awitda.

26Daytoy ti panggepko nga agpaay iti sangalubongan ket nailayat ti imak a mangdusa kadagiti nasion.”

27Sisasagana ti Apo a Mannakabalin-amin a mangaramid iti daytoy. Silalayat ti imana ket awan ti makapasardeng kenkuana a mangdusa.

Dadaelen ti Dios dagiti Filisteo

28Daytoy2 Ar. 16:20; 2 Cron. 28:27. ti mensahe a naipakaammo iti tawen nga ipapatay ni Ari Ahaz.

29TattaoJer. 47:1-7; Eze. 25:15-17; Jl. 3:4-8; Am. 1:6-8; Sof. 2:4-7; Zac. 9:5-7. ti Filistia, dikay agragsak gapu ta natukkolen ti sarukod a nangpang-or kadakayo. Ngamin, no matay ti maysa nga uleg, sumukat ti dakdakes. No agpessa ti itlog iti uleg, agbalin a nauyong a karasaen!

30Agbalinto ti Apo a pastor dagiti napanglaw a tattaona ket agbiagdanto a sitatalged. Ngem idissuornanto kadakayo, dakay a Filisteo, ti nakaro a bisin a mangikisap a mamimpinsan kadakayo.

31Agdung-awkayo ket umawagkayo iti tulong, dakay amin a siudad dagiti Filisteo! Agbutengkayo, dakayo amin! Adda umalipugpog a tapok nga aggapu iti amianan—maysa nga armada a pasig a natutured dagiti kamengna.

32Anianto ti isungbatmi kadagiti naibaon a naggapu idiay Filistia? Ibagaminto kadakuada nga impasdek ti Apo ti Sion ket natalgedton sadiay dagiti agsagsagaba a tattaona.