Isaias 62 - Bible with DC

1Agsaoak tapno pumigsa

ti pakinakem ti Jerusalem;

diak agulimek agingga a di maisalakan ti siudad,

ket agraniag ti balligina a kas silaw iti rabii.

2Jerusalem, makitanto dagiti nasion ti panagballigim!

Makitanto dagiti arida ti dayagmo.

Addanto baro a naganmo,

nagan nga ited a mismo ti Apo.

3Agbalinkanto a napintas a korona iti ima ti Apo.

4Saankanton a maawagan iti “Nabaybay-an,”

dinto met maawagan ti dagam iti “Asawa a Napanawan.”

Baro a naganmonto ti “Isu ti Ipangpangruna ti Dios.”

Maawaganto ti dagam iti “Naragsak a Naasawaan,”

gapu ta maragsakan ti Apo kenka,

ket ibilangnanto ti dagam a kas asawa.

5Kas iti lalaki nga agtutubo,

a mangasawa iti ubing a balasang,

Isu a nangbukel kenka alaennaka a kas asawa.

Kas iti nobio a maragsakan iti ay-ayatenna,

Kastanto met a maragsakan ti Dios kenka.

6Kadagiti bakudmo, Jerusalem, nangikabilak kadagiti guardia;

aldaw man wenno rabii, awan panagulimekda,

masapul nga ipalagipda iti Apo dagiti karina

tapno saanna a malipatan ida.

7Masapul a dida pagtalnaen agingga a bangonenna

ti Jerusalem ket pagbalinenna a siudad

a daydayawen ti entero a lubong!

8Insapata ti Apo a babaen iti bilegna,

ibanagna nga ibanag daytoy:

“Dinton kanen ti kabusoryo ti taraonyo,

dinton inumen dagiti ganggannaet ti arakyo.

9Ngem dakayo a nangimula ken nangapit iti trigo

dakayto ti mangan iti tinapay ket idaydayawyo ti Apo!

Dakayo a nangaywan ken nagburas kadagiti ubas,

dakayto ti uminum iti arak iti paraangan ti Templo.”

10Tattao ti Jerusalem, rummuarkayo iti siudad,

ket agaramidkayo iti kalsada a pagnaan

dagiti agsubli a kailianyo.

Mangisaganakayo iti nalawa a dalan;

ikkatenyo dagiti batbatona.

Mangikabilkayo iti pagilasinan

11aIs. 40:10; Pal. 22:12. pakaammoan dagiti nasion a kastoy ti ipakaammo

ti Apo iti amin a daga:

“Ibagayo kadagiti tattao ti Jerusalem

nga umayen ti Apo a mangisalakan kadakayo,

ket yegna dagiti tattao nga inispalna!”

12Maawagankayto iti “Nasantoan a Tattao ti Dios,”

“Tattao nga Insalakan ti Apo!”

Maawaganto ti Jerusalem iti “Siudad nga Ay-ayaten ti Dios,”

“Ti Siudad a Saan a Binaybay-an ti Dios.”