Ezekiel 3 - Bible with DC

1KinunaPal. 10:9-10. ti Dios, “Anak ti tao, kanem daytoy nalukot a pagbasaan. Kalpasanna, inka kasao dagiti Israelita.”

2Nagngangaak ket insubona kaniak ti pagbasaan.

3Kinunana, “Anak ti tao, kanem daytoy nalukot a pagbasaan nga itedko kenka ket agbussogka.” Kinnanko ti pagbasaan. Nasam-it a kasla diro ti ramanna.

4Kalpasanna, kinuna ti Dios, “Anak ti tao, inka kadagiti Israelita ket ibagam kadakuada ti aniaman nga ibagak kenka.

5Saanka nga ibaon iti maysa a pagilian a narigat a maawatan ti ganggannaet a pagsasaona, no di ket ibaonka kadagiti Israelita.

6No ibaonka kadagiti dadakkel a nasion a ganggannaet ti pagsasaoda a dimo maawatan, ipangagdakanto dagiti tattaona.

7Ngem awanto kadagiti Israelita ti mayat a dumngeg kenka. Didak pay ipangag. Natangken ti uloda ken natangsitda amin.

8Ita, pagbalinenka met a natangken ti ulona ken natured a kas kadakuada.

9Pagbalinenka a natangken a kas iti bato, wen, natangken a kas iti diamante. Dika agbuteng kadagita natangken ti ulona a tattao.”

10Intuloy ti Dios, “Anak ti tao, denggem a nalaing ti amin nga ibagak kenka ket tandaanam.

11Inka kadagiti kailiam a naitalaw a kas balud ket ibagam ti ibagak kadakuada, dumngegda man wenno saan.”

12Kalpasanna, impangatonak ti espiritu ti Dios ket manipud iti likudak, nangngegko ti napigsa a timek a kunana, “Idaydayawyo ti dayag ti Apo nga adda sadi langit.”

13Nangngegko ti banesbes dagiti agririnnisiris a payak dagiti parsua, ti karadakad dagiti pilid a kas iti kapigsa ti ginggined.

14Immay kaniak ti mannakabalin nga espiritu ti Dios ket bayat ti panangitayabna kaniak, nariknak ti pungtot ken sakit ti nakemko.

15Dimtengak idiay Tel Abib iti igid ti Karayan Kebar a pagnaedan dagiti naitalaw a kas balud. Pito nga aldaw a nagyanak sadiay a mailablabeg gapu iti nakita ken nangngegko.

Bilinen ti Dios ni Ezekiel nga Agbantay(Eze. 33:1-9)

16Kalpasan ti pito nga aldaw, nagsao ti Apo kaniak.

17Kinunana, “Anak ti tao, isaadka nga agbantay iti pagilian nga Israel. Ipakaammom kadagiti Israelita dagiti amin nga iballaagko kenka.

18No ipakaammok a matay ti maysa a managdakdakes a tao, ngem dimo ballaagan wenno pagsardengen nga agaramid iti dakes tapno agbiag, matayto a managbasol, ket singirekto kenka ti darana.

19Ngem no ballaagam ti managdakdakes ket dina isardeng ti aramidna wenno paglikudan ti kinadakesna, matayto a managbasol, ngem maispalto ti biagmo.

20“No agaramid iti dakes ti nalinteg a tao ket ikabilko iti napeggad a kasasaad, matay no dimo ballaagan. Matay gapu kadagiti basolna ket diakton lagipen dagiti naimbag nga aramidna. Sungbatamto kaniak ti ipapatayna.

21No ballaagam ti naimbag a tao tapno saan nga agbasol ket ipangagnaka, agbiagto, ket maispalto met ti biagmo.”

Agumel ni Ezekiel

22Nariknak ti nabileg a pannakabalin ti Apo, ket nangngegko a kinunana kaniak, “Tumakderka ket inka idiay tanap. Kasaokanto sadiay.”

23Napanak ngarud idiay tanap, ket nakitak sadiay ti dayag ti Apo a kas iti dayag a nakitak iti igid ti Karayan Kebar. Nagpaklebak,

24ngem simrek ti espiritu ti Dios kaniak ket pinatakdernak. Kinuna ti Apo, “Agawidka, ket dika rumrummuar iti balaymo.

25Mareppetkanto iti tali ket saankanto a makaruar a makipulapol iti publiko.

26Bibinegekto dayta dilam tapno dimonto maballaagan dagitoy nasukir a tattao.

27Ngem inton umayka kasao, isublikto ti pannakabalinmo nga agsao. Kunamto kadakuada a dagitoy ti saok. Addanto dagiti dumngeg, ngem didakanto ikaskaso dagiti dadduma, agsipud ta nasukirda a tattao.”