1O Apo, maysaka a Dios a mangdusa;
ipakitam ti pungtotmo!
2Tumakderka, sika nga ukom ti daga!
Yetnagmo ti maikari a dusa dagiti natangsit a tattao.
3Kasano pay kabayag
ti panagragragsak dagiti nadangkes?
Wen, kasano pay kapaut, O Apo?
4Kasano pay kabayag ti panagpalangguad
ken panagpasindayagda iti kinadakesda?
5Ilupitlupitda dagiti tattaom, O Apo;
idadanesda dagiti pinilim a tattao.
6Patayenda dagiti ulila ken balo a babbai;
pukawenda dagiti ganggannaet iti dagami.
7Kunada, “Saannatay a makita ti Apo;
saan a madlaw ti Dios ti Israel ti ar-aramidentayo.”
8Ania ketdin a kinamaagyo, dakay a tattao!
Kaanonto ti panagnakemyo?
9Pinarsua ti Dios dagiti lapayagtayo—
saan kadi a makangngeg?
Inaramidna dagiti matatayo—
saanda kadi a makakita?
10Ungtanna dagiti pagilian—
saanna kadi a dusaen ida?
Isu a mannursuro kadagiti amin a tattao,
awan kadi ti ammona?
11Ammo1 Cor. 3:20. ti Apo no ania ti pampanunotenda;
wen, ammona nga ubbaw ti panagrasonda.
12Nagasat ti tao a bagbagaam, O Apo,
ken sursuroam iti lintegmo!
13Ikkam iti inana kadagiti aldaw a nariribuk
agingga a makali ti tanem dagiti managdakdakes.
14Saanto a baybay-an ti Apo dagiti tattaona,
dinanto met panawan dagiti kukuana.
15Maisublinto ti hustisia kadagiti pangukoman,
ket sumurotto dagiti amin a nalinteg a tattao.
16Siasino ti salaknibko idi kadagiti managdakdakes?
Siasino ti nangikalintegan kaniak kadagiti agaramid iti dakes?
17No saannak a tinulongan ti Apo,
nabayag koman a nalamiis a tanem ti ayanko.
18Kinunak, “Matuangakon,”
ngem sinarapanak ti di agbalbaliw nga ayatmo, O Apo.
19No madanagan ken mariribukak,
sika ti mangliwliwa ken mangparagsak kaniak.
20Dimo kanunongan dagiti ukom a nakillo;
ballikugenda ti hustisia a mangparigat kadagiti tattao.
21Agmaymaysada a mangilupitlupit kadagiti nalinteg a tattao,
ket ikeddengda a mapapatay ti awan basolna.
22Ngem ikaluyanak ti Apo;
ti Diosko ti bato a salaknibko.
23Dusaennanto ida gapu iti kinadakesda,
ket pukawennanto ida gapu iti basolda;
wen, pukawento ida ti Apo a Diostayo.
Who We AreWhat We EelieveWhat We Do
2025 by iamachristian.org,Inc All rights reserved.
