Job 6 - Bible with DC

Sumungbat ni Job:

1-2No matimbang la koma

ti rigat ken ladingitko,

3nadagdagsenda pay ngem dagiti darat ti baybay.

No nagubsang ti panagsaok dikayo koma masdaaw.

4Sinalputnak dagiti pana ti Dios a Mannakabalin-amin

ket nagwaras iti bagik ti sabidongda.

Inturongna kaniak dagiti pammutbutengna.

5Naulimek ti asno no mangmangan iti taraonna,

saan nga agemmak ti baka no madama ti pannanganna.

6Adda aya mayat a mangan iti awan ramanna?

Adda kadi nanam ti puraw ti itlog no awan asinna?

7Diak kayat ti kasta a taraon,

agsarwaak no manganak.

8Apay a di ipangag ti Dios ti dawatko?

Apay a dina patgan ti kararagko?

9Nasaysayaat laengen a patayennak ti Dios.

10No ammok nga aramidenna ti kasta,

lumagtoak gapu iti rag-o;

agragsakak uray pay napalalo ti rigatko.

Ammok a nasantoan ti Dios;

pulos a diak pay sinupring ti bilinna.

11Ania pay ti pigsak nga agbiag?

Ania pay la ti gapuna, awan metten ti namnamak?

12Naaramidak aya iti bato?

Bronse kadi toy bagik?

13Awanen pigsak a mangisalakan iti bagik;

awanen ti mabalinko a pagkamangan.

14Masapulko dagiti napudno a gagayyem

iti kastoy a rigatko,

tinallikudak man ti Dios wenno saan.

15Allilawendak, dakayo a gagayyemko;

kaskayo la waig a namagaan no awan tudo.

16-17Adu ti nagbalay a danum

napuskol ti niebe iti waig.

Ngem no tiempo ti pudot, marunawda

ket ti waig agmaga.

18Mayaw-awan ti bunggoy dagiti agbibiahe

iti panagsapsapulda iti danum nga inumenda;

agalla-allada iti langalang ket matayda.

19Agbirok iti danum dagiti bunggoy

a naggapu iti Seba ken Tema,

20ngem mapaayda iti igid dagiti waig a nagmaga.

21Kadagita a waig ti pangyarigak kadakayo;

makitayo ti rigatko ket makigtotkayo.

22Dinawatko kadi nga isagutandak?

Kiniddawko kadi nga agpasuksokkayo tapno maisalakanak?

23Imbagak aya nga ispalendak iti kabusor

wenno iti nadangkok nga agturay?

24Ala ngarud, isurodak ket ibagayo dagiti biddutko;

agulimekak ket dumngegak kadakayo.

25Maguyugoydak no nainsiriban ti palawagyo,

ngem minamaag met dagiti sasawenyo.

26Kunayo nga angin ti agaon iti ngiwatko.

Apay ngarud a sungbatanyo?

27Pagbibinnunotanyo pay dagiti ulila a tagabu,

ket ilakoyo ti nadekket a gayyemyo!

28Perrengendak, saanak nga agul-ulbod.

29Baliwanyo ti panunotyo ket umisu koma ti pangngeddengyo;

didak ukomen, ta awan dakes a naaramidko.

30Ngem ipagarupyo nga agul-ulbodak—

kunayo a diak mapaglasin ti dakes ken naimbag.