Deuteronomio 5 - Bible with DC

Dagiti Sangapulo a Bilin(Ex. 20:1-17)

1Inummong ni Moises dagiti amin nga Israelita ket kinunana kadakuada, “Tattao ti Israel, denggenyo dagiti amin a linteg nga ipakaammok kadakayo ita nga aldaw. Adalenyo ida ket kitaenyo a tungpalenyo ida a tungpalen.

2Nakitulag kadatayo ti Apo a Diostayo idi addatay idiay Bantay Sinai.

3Saan la a kadagiti kapuonantayo ti nakitulaganna no di pay ket kadatay amin a sibibiag kadagitoy nga aldaw.

4Manipud iti apuy idiay a bantay, nakisao kadakayo ti Apo iti rupanrupa.

5Iti dayta nga aldaw, nagtakderak iti nagbaetanyo iti Apo tapno ipakaammok kadakayo ti imbagana, ta nagbutengkayo iti apuy ket dikay simmang-at iti bantay.

“Kinuna ti Apo,

6‘Siak ni Yahweh a Diosyo a nangiruar kadakayo idiay Egipto, ti daga a nakatagabuanyo.

7“‘Dikay agdaydayaw iti sabali a dios; siak laeng ti pagdaydayawanyo.

8“‘DikayLev. 26:1; Deut. 4:15-18; 27:15. agaramid iti imahen wenno kaasping ti uray ania nga adda sadi langit wenno ditoy daga wenno iti danum iti uneg ti daga a pagdaydayawanyo.

9DikayEx. 34:6-7; Num. 14:18; Deut. 7:9-10. agrukbab wenno agdaydayaw iti uray ania nga imahen, ta siak ti Apo a Diosyo ket diak ipalubos nga adda kasalisalko. Dusaek dagiti gumura kaniak, kasta met kadagiti annakda, appokoda ken appokoda-iti-tumeng.

10Ngem ipariknak ti ayatko kadagiti rinibribu a kaputotan kadagiti agayat kaniak ken agtulnog kadagiti lintegko.

11“‘DiyoLev. 19:12. aramaten ti naganko iti dakes a panggep gapu ta siak, ni Yahweh a Diosyo, dusaek ti siasinoman a mangusar iti naganko iti barengbareng.

12“‘NgilinenyoEx. 16:23-30; 31:12-14. ti Aldaw a Panaginana ket pagbalinenyo a nasantoan a kas imbilinko kadakayo—siak ni Yahweh a Diosyo.

13InnemEx. 23:12; 31:15; 34:21; 35:2; Lev. 23:3. nga aldaw nga agtrabahokayo

14ngem maidaton kaniak ti maikapito nga aldaw. Panaginana dayta nga aldaw, ket awan ti mapalubosan nga agtrabaho—dakayo, dagiti annakyo, dagiti tagabuyo, dagiti animalyo wenno dagiti ganggannaet nga agnaed iti pagilianyo. Masapul nga aginana met a kas kadakayo dagiti tagabuyo.

15Laglagipenyo a tagabukayo met idi idiay Egipto ket siak, ni Yahweh a Diosyo, inispalkayo babaen iti naindaklan a pannakabalin ken bilegko. Ngarud, ibilinko kadakayo a ngilinenyo ti Aldaw a Panaginana.

16“‘RaemenyoDeut. 27:16; Sir. 3:1-16; Mat. 15:4; 19:19; Mar. 7:10; 10:19; Luc. 18:20; Ef. 6:2; Ef. 6:3. dagiti nagannak kadakayo tapno nasayaatto ti kasasaadyo ken napautto ti panagbiagyo iti daga nga itedko kadakayo. Siak, ni Yahweh a Diosyo, ibilinko nga aramidenyo daytoy.

17“‘DikayGen. 9:6; Lev. 24:17; Mat. 5:21; 19:18; Mar. 10:19; Luc. 18:20; Rom. 13:9; San. 2:11. mamapatay.

18“‘DikayLev. 20:10; Mat. 5:27; 19:18; Mar. 10:19; Luc. 18:20; Rom. 13:9; San. 2:11. makikamalala.

19“‘DikayLev. 19:11; Mat. 19:18; Mar. 10:19; Luc. 18:20; Rom. 13:9. agtakaw.

20“‘DikayEx. 23:1; Mat. 19:18; Mar. 10:19; Luc. 18:20. agsaksi iti ulbod a maibusor iti padayo a tao.

21“‘DiyoRom. 7:7; 13:9. tarigagayan ti asawa ti padayo a tao. Diyo tarigagayan a tagikuaen ti balayna, ti dagana, dagiti tagabuna, dagiti bakana, dagiti asnona wenno uray ania a kukuana.’

22“DagitoyHeb. 12:18-19. dagiti bilin nga inted ti Apo kadakayo idi naummongkayo idiay bantay. Nagsao iti napigsa a timek manipud iti apuy ken iti napuskol nga ulep ket awanen sabali nga imbagana. Kalpasanna, insuratna dagiti bilin iti dua a tapi a bato sana inted kaniak.”

Agbuteng dagiti Tattao(Ex. 20:18-21)

23Kinuna ni Moises, “Idi umap-apuy ti entero a bantay ket nangngegyo ti timek iti kasipngetan, immay kaniak dagiti panguloyo ken dagiti panglakayen dagiti tribuyo.

24Kinunada: ‘Impakita kadakami ti Apo a Diostayo ti kinatan-ok ken dayagna idi nangngegmi a nagsao manipud iti apuy! Ita nga aldaw, napaneknekanmi a mabalin nga agtuloy nga agbiag ti maysa a tao uray no nakisao kenkuana ti Dios.

25Ngem apay nga ipustami manen ti biagmi? Pukawennakami la ketdi dayta nakabutbuteng nga apuy. Mataykami no mangngegmi manen ti timek ti Apo a Diostayo.

26Adda kadin nagbiag pay kalpasan a nangngegna ti sibibiag a Dios a nagsao manipud iti apuy?

27Agsublika, Moises, ket denggem amin nga ibaga ti Apo a Diostayo. Kalpasanna, umaymo ipakaammo kadakami ti imbagana kenka. Dumngeg ken agtulnogkamto.’

28“Nangngeg ti Apo ti imbagayo ket kinunana kaniak, ‘Nangngegko ti sao dagitoy a tattao ket pudno ti kunada.

29No kasta la koma a kanayon ti panagpampanunotda! Kanayon la koma nga agbutengda kaniak ken agtulnogda kadagiti amin a bilinko tapno nasayaatto latta ti kasasaadda ken dagiti kaputotanda.

30Inka ibaga nga agsublida kadagiti toldada.

31Ngem agbatika ditoy ket itedko kenka ti amin a linteg ken bilinko. Isurom dagitoy kadagiti tattao tapno tungpalenda ida iti daga nga itedko kadakuada.’

32“Tattao ti Israel, tungpalenyo a tungpalen ti amin nga imbilin ti Apo a Diostayo. Diyo sukiren ti uray ania a lintegna.

33Tungpalenyo amin ida tapno narang-aykayto ket atiddogto ti biagyo iti daga nga inkay tagikuaen.”