Levitico 20 - Bible with DC

Dagiti Dusa ti Kinasukir

1Kinuna ni Yahweh ken ni Moises

2nga ibagana daytoy kadagiti Israelita, “Mapapatay ti siasinoman nga Israelita wenno ganggannaet a makipagnaed kadakayo a mangted iti anakna ken ni didiosen a Moloc; ti sangkagimongan ti mangbato kenkuana.

3Busorek ti mangted iti anakna ken ni didiosen a Moloc ket laksidek kadagiti tattaok; gapu iti inaramidna, tinulawanna ti nasagradoan a toldak ken imbabainna ti nasantoan a naganko.

4Ngem no di ikaso ti sangkagimongan ti inaramid dayta a tao ket dida papatayen,

5siak a mismo ti mangbusor kenkuana ken iti entero a familiana ken amin a kumanunong kenkuana a nangtallikud kaniak ken nagrukbab ken ni didiosen a Moloc. Diakon ibilang ida a tattaok.

6“Ti siasinoman a mapan kadagiti agan-anito wenno espiritista, diakton ibilang a maysa kadagiti tattaok.

7Ipaayyo ti biagyo kaniak tapno agbalinkayo a nasantoan ta siak ni Yahweh a Diosyo.

8Tungpalenyo dagiti paglintegak agsipud ta siak ni Yahweh ket siak ti mangpasanto kadakayo.”

9“MapapatayEx. 21:17; Mat. 15:4; Mar. 7:10. ti siasinoman a mangilunod iti ama wenno inana. Isu ti akimbasol iti ipapatayna.

10“MapapatayEx. 20:14; Lev. 18:20; Deut. 5:18. ti lalaki a mangkaidda iti asawa ti padana nga Israelita, mapapatay pay ti babai.

11NoLev. 18:8; Deut. 22:30; 27:20. kaiddaen ti maysa a lalaki ti asawa ni amana, ibabainna ni amana, ket agpada a mapapatay ti lalaki ken ti babai, isuda met laeng ti akimbasol iti bukodda nga ipapatay.

12NoLev. 18:15. kaiddaen ti maysa a lalaki ti manugangna, agpadada a mapapatay ta maisalungasing iti linteg; isuda met laeng ti akimbasol iti bukodda nga ipapatay.

13NoLev. 18:22. kaiddaen ti maysa a lalaki ti padana a lalaki, agpadada a mapapatay ta nakarimrimon ti inaramidda, isuda met laeng ti akimbasol iti bukodda nga ipapatayda.

14NoLev. 18:17; Deut. 27:23. asawaen ti maysa a lalaki ti maysa a babai ken ti ina daytoy a babai, mapuoranda a tallo tapno awanen ti kasta a nakababain nga aramid iti sidongyo.

15NoEx. 22:19; Lev. 18:23; Deut. 27:21. kaiddaen ti maysa a lalaki ti maysa nga animal, mapapatayda a dua.

16Kasta met ti mapasamak no kaiddaen ti babai ti maysa nga animal—agpadada a mapapatay, isuda met laeng ti akimbasol iti bukodda nga ipapatayda.

17“NoLev. 18:9; Deut. 27:22. asawaen ti maysa a lalaki ti kabsatna a babai wenno ti kabsatna iti ama wenno ina, maibabainda iti sangoanan dagiti tattao ket mapapanawda iti ili. Kinaiddana ti kabsatna a babai ket masapul a sagabaenna ti dusa ti basolna.

18NoLev. 18:19. kaiddaen ti maysa a lalaki ti maysa a babai a madama nga agregla, agpadada a mapagtalaw iti ili agsipud ta sinalungasingda ti alagaden ti seremonia ti kinarugit.

19“NoLev. 18:12-14. kaiddaen ti maysa a lalaki ti ikitna, masapul a sagabaenda ti dusa ti kinadakesda ken panangsalungasingda iti linteg.

20No kaiddaen ti maysa a lalaki ti asawa ti ulitegna, ibabainna ti ulitegna. Sagabaendanto ti dusa, ket awanto kadakuada ti maaddaan iti anak.

21NoLev. 18:16. asawaen ti maysa a lalaki ti ipagna, matayda nga awanan iti anak. Narugit ti inaramidna ket imbabainna ti kabsatna.

22“Tungpalenyo dagiti amin a linteg ken bilinko tapno dinakay paksiaten ti daga a pangipanak kadakayo.

23Diyo tuladen ti ugali dagiti agnaed sadiay. Pagtalawek dagita a tattao tapno makastrekkayo iti daga. Pinagpungtotdak gapu kadagiti dakes nga aramidda.

24Ngem inkarik a tagikuaenyo daytoy nabaknang ken nadam-eg a daga, ket siak ti mangted iti daytoy a daga kadakayo. Siak ni Yahweh a Diosyo, ket pinilikayo kadagiti sabali a pagilian.

25Ngarud, masapul nga ammoyo a bigbigen no ania dagiti animal ken tumatayab a maibilang a nadalus ken dagiti maibilang a narugit. Dikay agsida iti karne dagiti animal wenno tumatayab a maibilang a saan a nadalus. Imbilangko ida a narugit, ket agbalinkayo a narugit no sidaenyo ti karneda.

26Agbiagkayo a nasantoan ket siak laeng ti pagpaayanyo, ta siak ni Yahweh ket nasantoanak. Pinilikayo kadagiti sabali a tattao tapno siak laeng ti pagpaayanyo.

27“Siasinoman nga agan-anito wenno makiuman kadagiti espiritu dagiti natay, babai man wenno lalaki, batoenyo agingga a matay, isu met laeng ti akimbasol iti bukodda nga ipapatay.”