Dagiti Salmo 73 - Bible with DC

MAIKATLO A LIBRO(Salmo 73–89)Ti Kinalinteg ti Dios

1Pudno unay a naimbag

ti Dios iti Israel!

Naimbag kadagiti nadalus ti panagpuspusona!

2Ngem nagistayanak naitibkol, dandaniak naikaglis

3ta inapalak ti nakitak nga irarang-ay

dagiti managdakdakes ken dagiti natangsit.

4Awan tuok a sagabaenda;

napigsa ken nasalun-atda.

5Dida agsagaba a kas kadagiti dadduma;

awan ti parikutda a bakbaklayenda

a kas kadagiti sabali a tattao.

6Kinatangsit ngarud ti pannakakuentasda,

ket kinaranggas ti pannakakawesda.

7Dakes ti agtaud iti pusoda,

kinikillo ti linaon ti panunotda.

8Pagang-angawanda dagiti tattao ket dakes a bambanag ti saoda;

natangsitda ket agplanoda iti panangidadanesda.

9Padpadaksenda ti Dios sadi langit;

ditoy daga, agbilinda a sitatangsit.

10Uray dagiti tattao ti Dios sumurotda kadakuada,

ket sigagagarda a mamati iti amin a saoda.

11Ipagarupda a dinto maammoan ti Dios ti aramidda,

ket ti Kangatoan dinanto matakuatan ida.

12Kasta ti kasasaad dagiti managdakdakes;

aglablabonanda ket ad-adu pay ti urnongenda.

13Awan kadi ti serserbina a nagtalinaedak

a nadalus ken nalinteg?

14O Dios, agmalmalem nga agsagsagabaak,

ket binigat a dusdusaennak.

15No sinaok koma ti kasta,

saanak a napudno kadagiti tattaom.

16Inkagumaak nga ammirisen ti kaipapananda

uray no narigatko nga awaten

17agingga a simrekak iti Templom

ket naammoak ti pagtungpalan dagiti managdakdakes.

18Pudno nga ipanmo ida iti nagalis a disso

tapno matnagda iti awan duadua a pakadadaelanda.

19Apagdarikmat ti pannakaikisapda;

nakabutbuteng ti paggibusanda.

20Kasda la tagtagainep nga agpukaw iti agsapa;

no agriingka, O Apo, umsiem ti langada.

21Idi napasakitanak ket nasugatan toy riknak,

22arigko iti nakuneng nga animal

ket saanka a naawatan.

23Nupay kasta, kanayon nga addaak

iti arpadmo ket kibkibinennak.

24Idaldalannak, babaen kadagiti pamagbagam

ket iti kamaudiananna, awatennak babaen iti pammadayaw.

25Adda aya masarakak sadi langit a kas kenka?

Yantangay ta addaka kaniak,

adda aya sabali a kayatko ditoy daga?

26No agkapuy toy puso ken riknak,

ti Dios ti mangpakired kaniak.

Isu laeng ti agnanayon a masapulko.

27Awan duadua a matayto dagiti mangtallikud kenka,

ket dagiti saan a napudno kenka, pukawemto ida.

28Ngem ti kaaddak iti asidegmo ti ragsakko.

Apo Dios, nagbalinka a natalged a kamangko

tapno ipakaammok ti amin nga aramidmo.