Kanta ni Solomon 1 - Bible with DC

1Ti1 Ar. 4:32. kapintasan kadagiti kanta ni Solomon.

Ti Umuna a KantaTi Babai:

2“Pugpogennak iti ungngo dagiti bibigmo;

naim-imas ngem arak ti ayatmo.

3Nabanglo ti ayamuommo;

no maibalikas ti naganmo kasla agaddiwara a bangbanglo.

Awan ti babai a di agayat kenka.

4Alaennak ta agtarayta;

agbalinka nga arik, ket iserreknak iti kuartom.

Addaka ditoy sidongko, agragsakta;

ipennekta ti uminum, agpapasta iti ayatta.

Diak nagbiddut iti panagayatko kenka!

5Babbai iti Jerusalem, napugotak ngem napintasak;

wen, nangisitak a kas kadagiti tolda ti let-ang ti Kedar,

ngem napintasak kas kadagiti kurtina iti palasio ni Solomon.

6Didak laisen gapu iti kolorko,

ngamin, pinangisit ti init ti kudilko.

Kinapungtotdak dagiti lallaki a kakabsatko,

imbaondak iti kaubasan ket sadiayak a nagtrabaho,

isu a nabaybay-ak ti bagik, diak naasikaso.

7Ibagam kaniak, biagko:

Sadino ti pangipaarabam iti arbanmo?

Sadino ti paginanaanda iti agmatuon nga init?

Apay a kaslaak agalla-alla nga agsapsapul kenka

kadagiti arban dagiti dadduma nga agpaspastor?”

Ti Lalaki:

8“Dimo ammo ti lugar, kapintasan a babai?

Inka suroten ti tugot ti arban,

ket isapulam dagiti kaldingmo iti pagarabanda

iti asideg dagiti tolda dagiti agpaspastor.

9“Ay-ayatek, kayawam dagiti lallaki

a kas panangkayaw ti kabaian a kabalio

kadagiti kalakian a kabalio a para-guyod

kadagiti luglugan ti Faraon.

10Napintas dagiti pingpingmo

a naarkosan kadagiti alahas.

Agbitin iti tengngedmo ti balitok a kuentas.

11Yaramidandaka iti alahas a balitok

a mapattopattokan iti pirak.”

Ti Babai:

12“Bayat ti panagid-idda ti arik iti sofa,

agaddiwara ti ayamuom ti bangbanglok.

13Agat-mirra ti kaayan-ayatko

nga agsadsadag iti barukongko.

14Mayarig ti kaayan-ayatko kadagiti balang a sabong

nga agukrad iti kaubasan idiay Engedi.”

Ti Lalaki:

15“Nagpintaska ketdin, biagko;

anian a nagrimat dagiti matam gapu iti ayat!”

Ti Babai:

16“Nagtaerka ketdin, sika a kapatgan;

makaay-ayoka unay.

Agpaay nga iddata ti nalasbang a karuotan;

17sedro ti aoanan ti balayta,

ket aruo ti bobedana.