1Ginubat dagiti Filisteo dagiti Israelita idiay Bantay Gilboa. Adu ti natay kadagiti Israelita ket nagtataray dagiti dadduma.
2Nakamatan dagiti Filisteo ni Saul ken dagiti annakna. Pinatayda da Jonatan, Abinadab ken Malkisua nga annakna.
3Nadara ti ranget iti likmut ni Saul. Napuntaan kadagiti pana ti kabusor ket nakaro ti sugatna.
4Kinunana iti agtutubo a para-awit kadagiti igamna, “Asutem ti kampilanmo ket patayennak tapno didak pagang-angawan dagitoy awan diosna a Filisteo.” Ngem kasta unay ti buteng ti agtutubo. Dina kayat a tungpalen ti bilin ni Saul. Iti kasta, inasut ni Saul ti kampilanna sana rinugmaan.
5Idi makita ti agtutubo a natayen ni Saul, rinugmaanna met ti kampilanna ket natay.
6Natay ni Saul ken dagiti tallo nga annakna ket nagpatingga ti panagarina.
7Idi madamag dagiti Israelita nga agnanaed iti Tanap ti Jezreel a nagtataray dagiti soldado ken natay ni Saul ken dagiti annakna, nagtatarayda a pimmanaw kadagiti ilida. Kalpasanna, dimteng dagiti Filisteo ket sinakupda dagiti ili.
8Iti sumuno nga aldaw kalpasan ti gubat, napan nagsamsam dagiti Filisteo kadagiti napapatay. Nasarakanda dagiti bangkay ni Saul ken dagiti tallo nga annakna a naiwalang idiay Bantay Gilboa.
9Pinutolanda ni Saul, innalada ti kalasagna sada nangibaon kadagiti mapan iti entero a Filistia a mangipakaammo iti naimbag a damag kadagiti tattao ken kadagiti diosda.
10Inkabilda dagiti igamna iti maysa kadagiti templo dagiti diosda, ket imbitinda ti ulona iti templo ni dios a Dagon.
11Idi madamag dagiti agnaed iti Jabes ti Galaad ti inaramid dagiti Filisteo iti bangkay ni Saul,
12nagrubbuat dagiti katuturedan a lallaki, ket napanda innala dagiti bangkay ni Saul ken dagiti annakna. Inyawidda dagitoy idiay Jabes ket intanemda ida iti sirok ti kayo a lugo. Pito nga aldawda a nagayunar.
13Natay1 Sam. 13:8-14; 15:1-24; Lev. 19:31; 20:6; 1 Sam. 28:7-8. ni Saul agsipud ta saan a nagtalinaed a napudno ken ni Yahweh. Sinukirna ti bilin ni Yahweh. Tinarigagayanna ti paidalan babaen iti pannakiumanna kadagiti espiritu dagiti natay,
14a saan ketdi ken ni Yahweh ti nakiumananna. Iti kasta, pinatay ni Yahweh ket intedna ti pagarian ken ni David nga anak ni Jesse.
Who We AreWhat We EelieveWhat We Do
2025 by iamachristian.org,Inc All rights reserved.
