Deuteronomio 11 - Bible with DC

Ti Kinatan-ok ni Yahweh

1Kinuna ni Moises, “Ayatenyo ngarud ti Apo a Diosyo ket kanayon a tungpalenyo dagiti bilin, annuroten ken lintegna.

2Lagipenyo ita nga aldaw ti nasursuroyo maipapan iti Apo babaen kadagiti padpadasyo kenkuana. Dakayo a saan ket a dagiti annakyo ti nagpasar kadagitoy a padpadas. Nakitayo ti kinatan-ok ti Apo, ti bilegna, ken ti pannakabalinna.

3NakitayoEx. 7:8–12:13. dagiti pagilasinan ken milagro nga inaramidna a maibusor iti ari ti Egipto ken ti entero a pagilianna.

4NakitayoEx. 14:28. ti inaramidna iti armada ti Egipto, agraman dagiti kabalio ken dagiti luganda a pakigubat. Pinukawna ida iti Baybay a Karunoan idi kamkamatendakayo.

5Ammoyo ti impaayna kadakayo iti let-ang agingga a simmangpetkayo ditoy.

6LagipenyoNum. 16:31-32. ti inaramidna kada Datan ken Abiram, dagiti annak ni Eliab iti tribu ni Ruben. Iti imatang ti amin, nagrengngat ti daga ket inalun-onna ida, agraman dagiti familiada, dagiti toldada ken amin a tagabu ken animalda.

7Nakitayo a mismo dagiti naindaklan a banag nga inaramid ti Apo.”

Ti Kinabaknang ti Naikari a Daga

8“Tungpalenyo dagiti amin nga imbilinko kadakayo ita nga aldaw tapno maaddaankayo iti pigsa a mangsakup iti daga a papananyo.

9Ket napautto ti panagbiagyo iti nabaknang ken nadam-eg a daga nga inkari ti Apo nga ited kadagidi kapuonanyo ken kadagiti kaputotanda.

10Saan a kas iti Egipto a nagnaedanyo ti daga nga inkay tagikuaen. Sadiay, no agmulakayo idi, adu a rigatyo a mangpadanum kadagiti talon.

11Ngem kabambantayan ken tantanap ti sakupenyo a daga. Kankanayon nga agtudo sadiay.

12Tartaripatoen ti Apo a Diosyo daytoy a daga ken ay-aywananna iti amin nga aldaw ti tawen.

13“NoLev. 26:3-5; Deut. 7:12-16; 28:1-14. pudno a tungpalenyo dagiti imbilinko kadakayo ita nga aldaw; no ayatenyo ti Apo a Diosyo ken agserbikayo kenkuana iti amin a puso ken kararuayo,

14yegnanto ti tudo iti dagayo iti tiempo a pannakasapulna ket nabuslonto ti apityo a trigo, arak ken lana ti olibo.

15Paraburannanto dagiti talonyo iti ruruot nga araben dagiti animalyo ket mangan ken mapnekkayto

16ngem agannadkayo amangan no maallilawkayo ket paglikudanyo ti Apo tapno agdaydayaw ken agserbikayo kadagiti didiosen.

17No aramidenyo daytoy, sumgedto ti pungtot ti Apo. Awanto ti tudo a yegna, agtikagto ti daga ket awanto ti agtubo a mula. Iti kasta, mataykayto sadiay uray no nasayaat ti daga nga itedna kadakayo.

18“ImulayoDeut. 6:6-9. dagitoy a bilin kadagiti puso ken panunotyo. Igalutyo kadagiti takkiagyo ken ikabilyo kadagiti mugingyo a kas palagip.

19Isuroyo ida kadagiti annakyo. Lagipenyo ida no addakay iti taengyo wenno addakayo iti trabaho, no maturogkayo ken no bumangonkay iti bigat.

20Isuratyo ida kadagiti baotek ti balayyo ken kadagiti ruangan dagiti bakudyo.

21No aramidenyo dayta, napautto ti panagbiagyo ken dagiti annakyo iti daga nga inkari ti Apo a Diosyo nga ited kadagidi kapuonanyo.

22“Tungpalenyo a sipapasnek dagiti amin nga imbilinko kadakayo: Ayatenyo ti Apo a Diosyo; aramidenyo amin nga ibilinna ken agtalinaedkayo a napudno kenkuana.

23No aramidenyo daytoy, paksiatennanto dagiti tattao apaman a sumungadkayo. Tagikuaenyonto ti daga dagiti tattao nga ad-adu ken nabilbileg ngem dakayo.

24KukuayontoJos. 1:3-5. ti amin a daga a mabaddekanyo; mangruginto ti sakupyo manipud iti let-ang iti abagatan agingga iti Bantay Libano; manipud iti Karayan Eufrates iti daya agingga iti Taaw Mediterranean iti laud.

25Awanto ti makabael a manglapped kadakayo; kabutengdakayto dagiti tattao iti sadinoman a daga a papananyo, kas inkari kadakayo ti Apo a Diosyo.

26“Ita nga aldaw, agpilikayo iti kayatyo: bendision wenno lunod.

27Mabendisionankayo no tungpalenyo dagiti bilin ti Apo a Diosyo; ita nga aldaw, itedko kadakayo ti bendision.

28Ngem mailunodkayo no diyo ipangag dagitoy a bilin ket sumiasikayo tapno agdayawkayo kadagiti didiosen a diyo pay nagdaydayawan.

29IntonDeut. 27:11-14; Jos. 8:33-35. ipannakayo ti Apo a Diosyo iti daga a tagikuaenyo, ipukkawyonto ti bendision iti tapaw ti Bantay Gerizim ken ti lunod iti tapaw ti Bantay Ebal.

30Adda dagitoy a bantay iti laud ti Karayan Jordan a sakup dagiti Cananeo nga agnaed iti Araba, a kasumbangir ti Gilgal nga asideg ti lugo ti More.

31Bumallasiwkayton iti Karayan Jordan a mangtagikua iti daga nga ited kadakayo ti Apo a Diosyo. Inton agnaedkayon sadiay,

32tungpalenyo a tungpalen ti amin nga annuroten ken linteg nga itedko kadakayo ita nga aldaw.”