Kanta ni Solomon 5 - Bible with DC

Ti Lalaki:

1“Addaak iti hardinko, ay-ayatek ken nobiak.

Agal-alaak iti mirra ken balsamok;

kankanek ti rara ken ti dirok,

in-inumek ti arak ken gatasko.”

Dagiti Babbai:

“Mangan ken uminumkayo, agayan-ayat,

agingga a mabartekkayo iti ayat!”

Ti Maikapat a KantaTi Babai:

2“Matmaturogak ngem siririing toy riknak,

mangngegko ti kaayan-ayatko nga agtuktok iti ridaw.”

Ti Lalaki:

“Sumrekak man, biagko ken ay-ayatek,

bassit a kalapatik nga awan pagkuranganna.

Sibabasa ti ulok iti linnaaw ti agsapa.”

Ti Babai:

3“Nakauksobakon;

masapul kadi nga agbadoak manen?

Nabuggoakon dagiti sakak,

masapul kadi a rugitak manen ida?

4“Iniggaman ti kaayan-ayatko ti ridaw,

ket naggagarak kenkuana, limmagto 'toy puso.

5Timmakderak a mangpastrek iti kaayan-ayatko,

sibabasa dagiti imak iti mirra,

ket agar-aruyot dagiti ramayko

idi uksotek ti balunet.

6Inlukatko ti ridaw tapno sumrek

ngem nakapanaw metten ti ay-ayatek.

Kailiwko unay a denggen

ti timekna!

Binirokko ngem diak nasarakan;

inawagak ngem awan simmungbat kaniak.

7“Nasarakandak dagiti agwanwanawan iti siudad;

kinabkabildak agingga a nasugsugatanak.

Dagiti guardia ti bakud pinigisda ti kagayko.

8Babbai iti Jerusalem, ikariyo kaniak,

a no masarakanyo ti ay-ayatek,

ibagayo kenkuana a masakitak gapu iti ayat.”

Dagiti Babbai:

9“Kalibnosan kadagiti babbai,

ania kadi ti nakaidumaan ti ay-ayatem kadagiti kaaduan?

Ania la unay aya ti nakaskasdaaw kenkuana,

ta masapul nga agkarikami kenka?”

Ti Babai:

10“Nataer ken napigsa ti kaayan-ayatko

naiduma kadagiti pinulloribu.

11Nalinis ken pugot ti rupana,

nangisit a kas iti wak ti kulot a buokna.

12Napintas dagiti matana kas kadagiti kalapati

iti asideg ti agay-ayus a waig,

kalkalapati a nadigos iti gatas,

ken sitatakder iti abay ti ubbog.

13Dagiti pingpingna arigda napintas a hardin

a napno iti mula ken bangbanglo.

Kasla lirio dagiti bibigna

a nababasa iti mirra.

14Nasippukel dagiti takkiagna,

ket nakasingsing iti adda batona.

Nalinis ti bagina a kas iti marfil

a napattokan iti safiro.

15Kasla adigi nga alabastro dagiti sakana,

a naisaad iti balitok.

Nadaeg a kas iti Bantay Libano,

a namulaan iti nalalayog a sedro.

16Nasam-it nga agkan ti ngiwatna,

mabatombalaniak iti amin nga adda kenkuana.

Kastoy ti kayarigan ti ay-ayatek,

babbai iti Jerusalem.”