Ezekiel 36 - Bible with DC

Bendisionan ti Dios ti Israel

1Kinuna ti Apo, “Anak ti tao, agsaoka kadagiti bantay ti Israel ket ibagam a denggenda ti saok

2nga Apo a Dios. Kunak kadakuada, ‘Nagragsak dagiti kabusor ti Israel ket kinunada: Ita, kukuatayon dagita kadaanan a bantay!’

3“Agipadtoka ngarud ket ipakdaarmo ti saok nga Apo a Dios. Sinakup dagiti kabangibang a pagilian dagiti bantay ti Israel, ket dinadaelda a namimpinsan. Gapu iti daytoy, rinabrabak ti tunggal maysa ti Israel.

4Isut' gapuna, dakayo a bantay ti Israel, denggenyo ti kunak nga Apo a Dios, kadakayo a bantay ken turod, kadakayo a waig ken tanap, kadakayo a naglangalang a lugar ken kadakayo a napanawan a siudad a nagsamsaman ken rinabrabak dagiti kabangibang a nasion.

5“Siak nga Apo a Dios, iti napalalo a pungtotko, nagsaoak iti maibusor kadagiti kabangibang a nasion, nangruna iti Edom. Nagraragsak ken nanglalaisda idi sakupenda ti dagak ket tinagikuada dagiti pagpastoranna.

6“Agipadtoka ngarud iti daga ti Israel. Ibagam kadagiti bantay, turod, wawaig ken tantanap a siak nga Apo a Dios kastoy ti kunak gapu iti nakaro a pungtotko iti pananglalais kadakuada dagiti nasion.

7“Siak nga Apo a Dios isapatak nga agsagabanto met ti pannakaibabain dagiti kabangibang a nasion.

8Ngem kadagiti bantay ti Israel, agbulongto manen dagiti kaykayo ket agbungada iti kanenyo, dakayo a tattaok nga Israelita. Asidegen ti panagsubliyo iti dagayo.

9Addaak kadakayo ket ipanamnamak a maaradonto manen ti dagayo ket mamulaan.

10Paaduekto ti bilangyo. Agnaedkayto kadagiti siudad ket tarimaanenyonto amin a nadadael.

11Paaduekto ti bilang dagiti tattao ken baka. Ad-adukayto ngem idi un-unana ket adunto ti annakyo. Palubosankayto nga agnaed sadiay kas iti sigud ket narangrang-aykayto manen. Ket maammoanyonto a siak ni Yahweh.

12Dakayo a tattaok nga Israelita, isublikayto iti daga a pagnaedanyonto manen. Dakayonton ti agtagikua iti daga ket saanton nga agbisin dagiti annakyo.

13“Siak nga Apo a Dios kunak a pudno ti ibagbaga dagiti tattao a mangmangan iti tao ti daga ken agal-ala kadagiti annak ti nasion.

14Ngem manipud ita, saanton a ti agalun-on iti tao ti mangagaw kadagiti annakyo. Siak nga Apo a Dios ti nangibaga iti daytoy.

15Saanton a masapul a denggen ti daga ti panangrabrabak dagiti nasion ken dinto masapulen a kitaenna ti pananglais kadakuada dagiti tattao. Saanton nga agawen ti daga dagiti annak ti nasion. Siak nga Apo a Dios ti nangibaga iti daytoy.”

Ti Baro a Panagbiag ti Israel

16Nagsao kaniak ti Apo.

17Kinunana, “Anak ti tao, idi agnanaed dagiti Israelita iti dagada, tinulawanda babaen iti panagbiagda ken aramidda. Imbilangko ti aramidda a narugit a kas iti babai a madama nga agregla.

18Impariknak kadakuada ti nakaro a pungtotko gapu iti panagpapatayda iti uneg ti pagilian ken gapu kadagiti imahen a pinangtulawda iti daga.

19Dinusak ida gapu iti wagas ti panagbiag ken aramidda ket inwarasko ida kadagiti ganggannaet a pagilian.

20Ngem iti sadinoman a napananda, imbabainda ti nasantoan a naganko gapu ta kuna dagiti tattao, ‘Tattao ida ti Apo, ngem pimmanawda iti daga nga inted ti Diosda kadakuada.’

21Daytoy ti gapuna a sinalaknibak ti nasantoan a naganko, ta imbabain dagiti Israelita iti sadinoman a napananda.

22“Ita ngarud, ibagam kadagiti Israelita ti mensahek nga Apo a Dios: ‘Saan a gapu kadakayo nga Israelita nga aramidek daytoy, no di ket gapu iti nasantoan a naganko a tinulawanyo iti tunggal nasion a napananyo.

23Inton iparangarangko kadagiti nasion ti kinasanto ti naindaklan a naganko—ti naganko a tinulawanyo kadakuada—maammoandanto a siak ti Apo.’ Siak nga Apo a Dios ti nangibaga iti daytoy. Aramatenkayto a mangipakita kadagiti nasion iti kinasantok.

24Iruarkayto kadagiti pagilian, ket isublikayto iti bukodyo a daga.

25Warsiankayto iti nadalus a danum ket madalusankayto iti amin nga didiosen ken amin a nangtulaw kadakayo.

26IkkankaytoEze. 11:19-20. iti baro a puso ken iti baro nga espiritu. Ikkatekto ti bimmato a pusoyo, ket suktakto iti manangngaasi a puso.

27Ikabilkonto ti bukodko nga espiritu kadakayo ikagumaak nga annurotenyo dagiti bilinko ken salimetmetanyo dagiti lintegko nga intedko kadakayo.

28Agnaedkayto iti daga nga intedko kadagiti kapuonanyo. Dakayto dagiti tattaok ket siakto ti Diosyo.

29Ispalenkayto iti amin a mangtulaw kadakayo. Paaduekto ti trigo tapno dikayton agbisin.

30Paaduekto ti bunga dagiti kayoyo ken ti apit dagiti talonyo tapno awanton ti bisin a pakaumsianyo iti imatang dagiti nasion.

31Malagipyonto dagiti amin a dakes nga aramidyo ken dagiti biddutyo. Guraenyonto dagiti bagbagiyo gapu kadagiti basolyo ken dakes nga aramidyo.

32Israel, kayatko a maammoanyo nga ar-aramidek dagitoy saan a gapu kadakayo. Kayatko a mariknayo ti bain ken pannakaipababayo gapu kadagiti aramidyo. Siak nga Apo a Dios ti nangibaga iti daytoy.”

33Kuna ti Apo a Dios, “Inton madalusankayo iti amin a basolyo, pagnaedenkayto manen kadagiti siudadyo ket bangonenyonto manen dagiti narnarpuog.

34Matalonto manen dagiti nagkaruotan ken langalang a dagayo ket saanton a kasamekan kas makita dagiti masansan nga aglabas.

35Saritaento ti amin ti panagbalbaliw daytoy a daga! Langalang idi ngem nagbalinen a kas iti Hardin ti Eden; narba dagiti siudad, nasamsam dagiti sanikuada ket nabaybay-anda a rebba ngem addan agnaed ken nasarikedkedanda.

36Maammoanto dagiti nakalasat a nasion iti likmutyo a siak, ni Yahweh ti mangtarimaan kadagiti narnarba a siudad ken mangmula manen kadagiti nabaybay-an a talon. Siak, ni Yahweh, ti nangikari iti daytoy ket tungpalek a tungpalen.”

37Kuna ti Apo a Dios, “Palubosakto manen dagiti Israelita nga agpatulong kaniak. Paaduekto ida a kas iti arban dagiti karnero.

38Mapnonto iti tattao dagiti narba a siudad; mapnodanto a kas iti pannakapno ti Jerusalem kadagiti karnero a mapuoran a kas daton iti aldaw ti fiesta. Ket maammoandanto a siak ni Yahweh.”