Ezekiel 17 - Bible with DC

Ti Pangngarig maipapan iti Dua nga Agila ken iti Ubas

1Nagsao ti Apo kaniak.

2Kinunana, “Anak ti tao, kasaom dagiti Israelita babaen iti pangngarig

3tapno maammoanda ti ibagbagak kadakuada, siak ti Apo a Dios: Adda idi dakkel nga agila a dimteng idiay Bantay Libano. Siuukrad dagiti atitiddog a payakna ken napipintas ken agduduma ti maris dagiti dutdotna. Nangtukkol iti murdong ti kayo a sedro,

4ket impanna iti daga dagiti komersiante. Indissona iti siudad dagiti agtagtagilako.

5Kalpasanna, nangala iti naganus a mula iti daga ti Israel, ket immulana iti nadam-eg a talon a kanayon a madanuman.

6Dimmakkel ti mula, ket nagbalin a nababa nga ubas a nagsaknap dagiti sangana. Nagpangato dagiti sanga nga agturong iti agila; nagpauneg dagiti ramutna. Narukbos ti sanga ken bulong ti ubas.

7“Adda sabali a dakkel nga agila nga addaan iti dadakkel a payak ken napupuskol a dutdot. Ita, inturong ti ubas dagiti ramutna iti agila kasta met dagiti bulongna bareng no ad-adu ti danum nga itedna ngem ti danum ti hardin a nakaimulaanna.

8Ngem naimulan ti ubas iti talon a nadam-eg ken nasayaat ti pannakadanumna. Iti kasta, agtubo dagiti bulongna, agbunga ken agbalin a narukbos nga ubas.

9“Siak nga Apo a Dios, saludsodek, ‘Agbiag ken dumakkel kadi daytoy nga ubas? Dinto aya paruten ti immuna nga agila, rurosenna dagiti bungana, tukkolenna dagiti sangana, ket bay-anna a magango?’ Saan a masapul ti adu a pigsa wenno nabileg a nasion a pangparut kenkuana.

10Agpayso a naimula, ngem agbiag ken dumakkel kadi? Saan ngata a malaylay no dalapusen ti angin nga aggapu iti daya? Dinto ngata malaylay iti lugar a nakaimulaanna?”

Mailawlawag ti Pangngarig

11Kinuna ti Apo kaniak,

12“Saludsodem2 Ar. 24:15-20; 2 Cron. 36:10-13. kadagitoy nasukir a tattao no ammoda ti kayat a sawen ti pangngarig. Ibagam kadakuada nga immay ti ari ti Babilonia ditoy Jerusalem ket inyawidna idiay Babilonia ti ari ti Jerusalem agraman dagiti ofisialesna.

13Nangala ti maysa kadagiti familia ti ari, nagtulagda ket pinagsapatana a dina salungasingen ti nagtulaganda. Innalana ti sumagmamano a natan-ok a lallaki a kas balud

14tapno lapdanna nga umalsa manen dagiti tattao ken tapno masigurado a matungpal ti nagtulaganda.

15Ngem immalsa ti ari ti Juda, ket nangibaon kadagiti pannakabagina a mapan idiay Egipto tapno mangalada kadagiti kabalio ken iti adu a soldado. Agballigi ngata ti ari? Maliklikanna ngata ti pannakadadaelna no kasta ti aramidna? Saan! Madusa a madusa no salungasingenna ti tulag.”

16Kuna ti Apo a Dios, “Iti naganko a sibibiag a Dios, isapatak a matayto daytoy nga ari idiay Babilonia agsipud ta sinalungasingna ti karina ken ti nagtulaganda iti ari ti Babilonia a nangisaad kenkuana iti trono.

17Uray ti nabileg nga armada ti ari ti Egipto, dinanto matulongan a manggubat kadagiti taga-Babilonia inton agaramidda kadagiti sarikedked ken agkalida kadagiti abut tapno agpapatayda iti adu a tattao.

18Sinalungasingna ti karina ken ti nakitulaganna. Inaramidna amin dagitoy, ket ita, dinto makalisi.”

19Kuna ti Apo a Dios, “Siak ti sibibiag a Dios, ket dusaekto ti ari ti Juda ta sinalungasingna ti tulag a sinapataanna a tungpalen iti naganko.

20Isarwagkonto kenkuana ti iket ti maysa a mangnganup ket matiliwto. Ipankonto idiay Babilonia ket dusaekto sadiay ta saan a nagtalinaed a napudno kaniak.

21Matayto iti gubat dagiti amin a kalaingan a soldadona, ket mawarawaranto dagiti makalasat iti amin a suli ti daga. Iti kasta, maammoamto a siak, ni Yahweh, ti nagsao.”

Ikari ti Dios ti Namnama

22Kastoy ti kuna ti Apo a Dios,

“Mangalaakto iti rawis ti natayag a sedro,

ket mangsip-akakto iti naganus a saringit.

Imulakto iti tapaw ti nangato a bantay,

23iti kangatoan a bantay ti Israel.

Agsanganto ket agbunga;

agbalinto a narukbos a sedro.

Agumokto ti amin a kita ti tumatayab,

ket agapondanto iti sirokna.

24Maammoanto amin a kayo ti daga a siak ni Yahweh.

Pukanek dagiti natatayag a kayo,

ket padakkelek dagiti kayo a babassit.

Pagangoek dagiti nalangto a kayo,

ket palangtoek manen dagiti kayo a nagango.

Siak, ni Yahweh, ti nagsao. Ibanagko ti imbagak nga aramiden.”