Numero 4 - Bible with DC

Ti Annongen dagiti Levita iti Kapuonan ni Coat

1Imbaga ni Yahweh ken ni Moises

2a sensusenna dagiti Levita iti kapuonan ni Coat segun ti kapuonan ken familiada

3ket ilistana dagiti amin a lallaki manipud dagiti agtawen iti 30 agingga iti 50 a mabalin nga agserbi iti Tolda ti Dios.

4Adda pannakaibiang ti panagserbida kadagiti kasantoan a banag.

5No umalis dagiti Israelita iti pagkampoanda, sumrek ni Aaron ken dagiti annakna iti Tolda, ikkatenda ti kurtina iti sango ti Lakasa ti Tulag sada yabbong iti lakasa.

6Arpawanda ti lakasa iti nalamuyot a lalat, parabawanda iti lupot nga asul sada yusok dagiti assiw.

7Arpawanda iti asul a lupot ti lamisaan a pakaikabilan ti tinapay a maidaton ken ni Yahweh sada iparabaw dagiti pinggan, dagiti malukong ti insenso, dagiti malukong dagiti daton ken dagiti harra a pagyanan ti arak a maidaton. Masapul nga adda latta tinapay iti lamisaan.

8Abbonganda amin dagitoy iti nalabaga a lupot, arpawanda iti nalamuyot a lalat sada yusok dagiti assiw.

9Mangalada iti asul a lupot ket abbonganda ti kandelero agraman dagiti pagsainganna, pagarsang, pagyarsangan ken amin a pagyanan ti lana ti olibo.

10Balkotenda ti kandelero ken amin nga alikamenna iti nalamuyot a lalat ket ikabilda iti nasangal a pagawitan.

11Abbonganda ti balitok nga altar iti asul a lupot, balkotenda iti nalamuyot a lalat sada yusok dagiti assiw.

12Alaenda amin nga alikamen a maaramat iti Nasantoan a Disso, bungonenda iti asul a lupot, arpawanda iti nalamuyot a lalat ket ikabilda iti nasangal a pagawitan.

13Ikkatenda dagiti nalanit a dapu iti altar sada aplagan iti purpura a lupot.

14Iparabawda ti amin nga alikamen a maar-aramat iti altar; kas iti pagikkan iti beggang, pagadaw, pala ken palanggana. Kalpasanna, arpawanda iti nalamuyot a lalat ket yusokda dagiti assiw.

15Inton orasen ti yaalisda, umay ti kapuonan ni Coat a mangawit kadagiti nasagradoan nga alikamen ken amin a ramramit dagitoy ngem kalpasan laeng a nabalkoten dagitoy ni Aaron ken dagiti annakna. Maiparit kadagiti kaputotan ni Coat a sagidenda dagiti nasagradoan nga alikamen ta matayda no sagidenda.

Dagitoy ti awitenda tunggal mayakar ti Tolda a Paguummongan.

16Aywanan ni Eleazar nga anak ni Aaron ti sibubukel a Tolda ket isu ti makaammo iti lana dagiti pagsilawan, ti insenso, dagiti daton a makan ken ti lana a pagkonsagrar, ken amin nga adda iti tolda a naidaton ken ni Yahweh.

17Kinuna ni Yahweh kada Moises ken Aaron,

18“Diyo ipalubos a matay dagiti kaputotan ni Coat

19iti yaasidegda kadagitoy kasasagradoan a banag. Tapno saanda a matay, umay ni Aaron ken dagiti annakna ket itudingna ti aramiden ti tunggal maysa ken no ania ti rebbengna nga awiten.

20Ngem no sumrek dagiti Coatita iti Tolda ket kitaenda dagiti papadi a mangisagsagana iti pannakayalis dagiti nasagradoan a banag, matayda.”

Dagiti Annong dagiti Levita iti Kapuonan ni Gerson

21Imbaga ni Yahweh ken ni Moises

22a pasensusna dagiti Levita iti kapuonan ni Gerson segun ti familia a nagtaudanda

23ket mailista ti amin a lallaki, manipud dagiti agtawen iti 30 wenno nasursurok pay agingga iti 50 a mabalin nga agserbi iti Tolda ti Dios.

24Akemda ti mangawit kadagiti sumaganad:

25ti Tolda a Paguummongan, ti akin-uneg a linongna, ti akinruar nga abbongna, ti nalamuyot a lalat nga arpawna, ti kurtina ti pagserkan,

26dagiti kurtina ken dagiti tali ti paraangan iti lawlaw ti Tolda ken ti altar, dagiti kurtina iti pagserkan ti paraangan ken amin a masapsapul iti pannakaipatakder dagitoy. Aramidenda dagiti amin a trabaho a nasken kadagitoy.

27Ikagumaan da Moises ken Aaron a kitaenda nga aramiden nga aramiden dagiti Gersonita dagiti amin a pagrebbenganda ken tungpalenda amin a maipaannong kadakuada.

28Dagitoy dagiti annongen dagiti Gersonita iti Tolda ti Dios babaen iti panangimaton ni Itamar nga anak ni Aaron a padi.

Dagiti Pagrebbengan dagiti Levita iti Kapuonan ni Merari

29Imbaga ni Yahweh ken ni Moises a sensusenna dagiti Levita iti kapuonan ni Merari segun ti familiada

30ket ilistana ti amin a lallaki nga agtawen iti 30 agingga iti 50 a mabalin nga agserbi iti Tolda a Paguummongan.

31Isuda ti para-awit kadagiti nasangal a pagawitan, balunet, adigi ken pagbatayan ti Tolda,

32dagiti adigi, pagbatayan, pasok ken tali ti bakud iti aglikmut ti Tolda, agraman dagiti amin a masapsapul iti pannakaipatakderda. Naituding iti tunggal tao dagiti annongna nga awiten.

33Dagitoy ti pagrebbengan dagiti kaputotan ni Merari iti panagserbida iti Tolda ti Dios babaen iti panangimaton ni Itamar nga anak ni Aaron.

Ti Pannakasensus dagiti Levita

34-48Kas imbilin ni Yahweh, sinensus da Moises, Aaron ken dagiti pangulo ti gimong dagiti tallo a kaputotan dagiti Levita: Coat, Gerson ken Merari. Inaramidda daytoy kas mayannurot iti sangakabbalayan ken familiada. Nailista ti amin a lallaki, manipud dagiti agtawen iti 30 ken nasursurok agingga iti 50 a mabalin nga agserbi iti Tolda a Paguummongan: Tribu Bilang Coat 2,750 Gerson 2,630 Merari 3,200 Dagup: 8,580

49Nairehistro ti amin kas imbilin ni Yahweh ken kas imbilinna ken ni Moises, naituding ti pagrebbengan ti tunggal maysa nga agserbi wenno agbagkat.