Nehemias 6 - Bible with DC

Mamin-adu a Maisikat ni Nehemias

1Nadamag da Sanballat, Tobias, Gesem ken dagiti dadduma a kabusormi a nabangonmin ti bakud ket awanen ti giwangna, nupay di pay naikapet dagiti ruangan kadagiti pagserkan.

2Pinaibaga da Sanballat ken Gesem nga agkikitakami iti maysa kadagiti barrio iti Tanap ti Ono. Ngem kunada laeng dayta ta kayatdak a dangran.

3Nangibaonak kadagiti mangibaga kadakuada, “Adda nasken nga aramidek ket diak masango ti umay dita. Diak kayat a maisardeng ti trabaho gapu laeng iti umaykayo panangkita kadakayo.”

4Namimpat a kasta ti pinaibagada kaniak, ngem isu met laeng ti insungbatko.

5Nangipatulod ni Sanballat iti mensahe iti maikalima a daras. Silulukat daytoy a surat a pinaipanna kadagiti adipenna.

6Kastoy ti nailanad:

“Kuna ni Gesem kaniak nga agwarwaras ti damag kadagiti kabangibang a nasion a panggepyo a Judio ti umalsa. Daytoy ti gapuna a bangbangonenyo manen ti bakud. Panggepmo kano ti agbalin nga ari,

7ket nakitulagka kadagiti sumagmamano a profeta a mangipakdaar kenka nga ari ti Juda idiay Jerusalem. Awan duadua a madamagto daytoy ti Natan-ok nga Ari, isut' gapuna nga isingasingko nga umayka ket pagsaritaanta daytoy a banag.”

8Daytoy ti sungbatko kenkuana, “Awan ti kinapudno ti ibagbagam. Sika met laeng ti nangparbo kadagita a sasao.”

9Butbutngendakami ta kayatda nga isardengmi ti trabaho. Ngem ita, O Dios, papigsaennak kadi!

10Iti dayta a tiempo, sinarungkarak ni Semaias nga anak ni Delaias ken apoko ni Mehetabel, ta saanna a mapanawan ti balayna. Kinunana kaniak, “Inta aglemmeng iti santuario ti Templo, ket tulbekanta dagiti ridaw, agsipud ta umaydaka papatayen. Iti uray ania a rabii, umaydaka papatayen.”

11“Saanak a takrot a lalaki nga agtaray ken aglemmeng,” insungbatko. “Ipagarupmo kadi nga aglemmengak iti Templo tapno maispal ti biagko? Diak aramiden dayta.”

12Idi pampanunotek daytoy, naamirisko a saan a nagsao ti Dios ken ni Semaias no di ket pinasuksokan da Tobias ken Sanballat tapno ballaagandak.

13Tinangdananda a mangbutbuteng kaniak tapno agbasolak ket madadael ti dayawko ken maibabainak.

14Inkararagko, “O Dios, laglagipem ti inaramid da Tobias ken Sanballat, ket dusaem ida. Laglagipem met ti inaramid ni Nodias, dayta profeta a babai, ken dagiti dadduma pay a profeta a nangbutbuteng kaniak.”

Ti Pannakaileppas ti Trabaho

15Iti maika-25 nga aldaw ti bulan ti Elul, nalpasmi a binangon ti bakud; 52 nga aldaw a nagtrabahokami.

16Idi madamag daytoy dagiti kabusormi kadagiti kabangibang a nasion, nabigbigda a naibabainda gapu ta ammo ti amin a nalpas ti trabaho babaen iti tulong ti Dios.

17Kabayatan dayta a tiempo, nakisinsinnurat dagiti papangulo a Judio ken ni Tobias.

18Adu kadagiti taga-Juda ti kimmanunong ken ni Tobias agsipud ta manugang ni Secanias a Judio nga anak ni Ara. Maysa pay, inasawa ni Jehohanan nga anakna ti babai nga anak ni Mesullam nga anak ni Barakias.

19Ipangpangngeg dagiti tattao kaniak dagiti amin a naimbag nga aramid ni Tobias. Ipulpulongda met kenkuana dagiti amin a saok. Kanayon a suratannak tapno butbutngennak.