Ezekiel 39 - Bible with DC

Maparmek ni Gog

1Kinuna ti Apo a Dios, “Anak ti tao, babalawem ni Gog, ti kangatoan a turayen ti Mesec ken Tubal, ket ibagam kenkuana a siak ti kabusorna.

2Iturongko iti baro a dalan ket iruarko iti adayo nga amianan agingga a makagteng kadagiti bantay ti Israel.

3Tippayekto ti baina iti makannigid nga imana ken dagiti panana iti makannawan nga imana.

4Maiwalangto kadagiti bantay ti Israel ti bangkay ni Gog, ti armadana ken dagiti nasion a kakaduana. Bay-akto dagiti bangkayda a kanen dagiti amin a tumatayab ken narungsot nga animal.

5Mapasagdanto iti tay-ak. Siak nga Apo a Dios ti nangibaga iti daytoy.

6Irugikto ti agpuor idiay Magog ken kadagiti lugar iti igid ti baybay a pagnaedan dagiti saan a masingsinga a tattao ket maammoanto ti amin a siak ni Yahweh.

7Masapul nga ammoen dagiti Israelita ti nasantoan a naganko ket diak ipalubos a matulawan manen. Maammoanto dagiti nasion a siak nga Apo ti nasantoan a Dios ti Israel.”

8Kinuna ti Apo a Dios, “Awan duadua a dumteng ti aldaw nga imbagak.

9Rummuarto dagiti agnaed kadagiti siudad ti Israel ket urnongendanto dagiti nabaybay-an nga igam ket aramatendanto a pagsungrod. Pagarondanto dagiti kalasag, bai, pana, batuta ken gayang ket adunto ti maummongda nga umanay nga aramatenda iti pito a tawen.

10Saanton a masapul a mangayoda kadagiti away wenno kadagiti bakir ta adda dagiti nabaybay-an nga igam a pagsungrodda. Samsamandanto dagiti nagsamsam kadakuada, ket agawandanto dagiti nagagaw kadakuada.” Daytoy ti sao ti Apo a Dios.

Ti Pannakaitabon ni Gog

11Kinuna ti Apo, “Inton mapasamak dagitoy, ikkakto ni Gog iti pakaitanemanna idiay Israel, iti Tanap dagiti Agbibiahe iti daya ti Natay a Baybay. Sadiay, maitanemto ni Gog agraman ti armadana, ket maawaganto ti tanap iti ‘Tanap ti Armada ni Gog.’

12Pitonto a bulan nga itabtabon dagiti Israelita dagiti bangkay tapno dumalus manen ti daga.

13Tumulongto amin a tattao iti pagilian nga agitabon kadakuada. Mapadayawandanto gapu iti daytoy iti aldaw ti panagballigik.” Daytoy ti sao ti Apo a Dios.

14“Kalpasan ti pito a bulan, addanto lallaki a madutokan nga agsursor iti entero a daga tapno sapulenda dagita a bangkay ket ikalida tapno madalusan ti daga.

15Sursorendanto ti daga ket tunggal adda tulang ti tao a makitada, markaandanto ti abayna tapno umay dagiti agitabon ket ikalida iti Tanap ti Armada ni Gog.

16(Addanto ili iti asideg a mapanaganan iti nagan ti armada.) Iti kasta, madalusanto manen ti daga.”

17KinunaPal. 19:17-18. ti Apo a Dios kaniak, “Anak ti tao, ayabam amin a tumatayab ken animal iti aglawlaw tapno umayda kanen ti daton nga isagsaganak a maipaay kadakuada. Dakkelto a padaya daytoy iti rabaw dagiti bantay ti Israel a pagsidaanda iti karne ken paginumanda iti dara.

18Kanendanto ti bangkay dagiti soldado ket inumendanto ti dara dagiti agtuturay iti daga, isuda a mapapatay a kasla kalakian a karnero, wenno urbon ti karnero, wenno kalding, wenno nalukmeg a toro.

19Inton papatayek dagitoy a tattao a kasla animal a maidaton, masapul a kanen dagiti tumatayab ken animal amin a taba a kabaelanda a kanen, ken uminumda iti dara agingga a mabartekda.

20Agpennekdanto a mangan iti lamisaanko kadagiti kabalio ken dagiti nagsakay, kadagiti soldado ken mannakigubat. Siak nga Apo a Dios ti nangibaga iti daytoy.”

Ti Pannakaisubli ti Sigud a Kasasaad ti Israel

21Kinuna ti Apo, “Iparangarangko ti dayagko kadagiti nasion. Ipakitak kadakuada ti panangaramatko iti pannakabalinko a mangibanag kadagiti nalinteg a pangngeddengko.

22Manipud iti dayta nga aldaw, maammoanto dagiti Israelita a siak nga Apo ti Diosda.

23Maammoanto dagiti nasion a naitalaw dagiti Israelita gapu kadagiti basolda kaniak. Binaybay-ak ida a parmeken dagiti kabusorda ket natayda iti gubat.

24Impatayko kadakuada ti kaibatogan ti kinarugit ken kinadakesda ket binaybay-ak ida.”

25Kinuna ti Apo a Dios, “Ngarud, kaasiakto dagiti kaputotan ni Jacob—dagiti Israelita ket parang-ayek manen ida. Salaknibakto ti nasantoan a naganko.

26Inton agtaengda manen a sitatalged iti bukodda a daga ket awanton ti kabutengda, malipatandanton ti pannakaibabainda gapu iti panangtallikudda kaniak.

27Iruarkonto ida kadagiti pagilian a pagnanaedan dagiti kabusorda tapno ipakitak kadagiti adu a nasion ti kinasantok.

28Maammoanto dagiti tattaok a siak ni Yahweh a Diosda. Maammoandanto daytoy gapu ta intalawko ida a kas balud, ket ita, maummongda met la nga agsubli iti bukodda a daga nga awan ti uray maysa a mabati.

29Ibuyatkonto ti espirituk kadagiti Israelita, ket diakton baybay-an ida. Siak nga Apo a Dios ti nangibaga iti daytoy.”