Deuteronomio 22 - Bible with DC

1“NoEx. 23:4-5. makitayo a nakabulos ti baka wenno karnero ti padayo nga Israelita, diyo baybay-an. Tiliwenyo sayo ipan iti akinkukua.

2Ngem no adayo unay ti taengna wenno diyo ammo no siasino ti akinkukua, yawidyo ti animal. Itedyo no umay tuntonen ti akinkukua.

3Kasta met ti aramidenyo no makasarakkayo iti asno wenno pagan-anay wenno aniaman a napukaw ti padayo nga Israelita.

4“No makitayo a nakusbo ti asno wenno baka ti padayo nga Israelita, diyo baybay-an. Tulonganyo a mangpatakder iti animalna.

5“Maiparit nga agkawes ti babai iti kawes ti lalaki wenno ti lalaki iti kawes ti babai. Kagura ti Apo a Diosyo dagiti tattao nga agaramid iti kasta.

6“No makasarakkayo iti umok ti billit iti kayo wenno iti daga ket adda tumatayab a manguk-ukop wenno mangsalsallukob kadagiti piekna diyo alaen ti tumatayab.

7Mabalinyo nga alaen dagiti piek ngem bulosanyo ti inada tapno narang-ay ket napautto ti panagbiagyo.

8“No mangbangonkayo iti baro a balay, masapul a barandiliasanyo ti tuktokna tapno awan sungsungbatanyo no adda matnag ket matay.

9“DikayLev. 19:19. agitukit iti sabali a mula iti kaubasanyo. No aramidenyo ti kasta, maparitankayo nga aglak-am iti bunga ti ubas wenno iti sabali nga imulayo.

10“Diyo pagkuyogen ti baka ken ti asno nga agarado.

11“Dikay agkawes iti pagan-anay a naabel iti de lana ken linen.

12“BaruyboyanyoNum. 15:37-41. dagiti uppat a suli ti pagan-anayyo.

Linteg maipapan iti Kinabirhen ti Maysa a Babai

13“Kas pangarigan mangasawa ti maysa a lalaki ket kalpasanna saannan a kayat ti babai;

14no padpadaksenna ti asawana ket ibagana a saan gayam a birhen idi agkasarda,

15masapul nga alaen dagiti nagannak iti babai ti puraw nga ules a nagkaiddaan dagiti agassawa iti umuna a rabii sada idatag iti korte a buklen dagiti pangulo ti ili.

16Kunanto ti ama ti babai, ‘Intedko toy anakko nga asawaen daytoy a lalaki; ita, dina met kayaten.

17Padpadaksenna ti anakko ket ibagbagana a saan a birhen idi agkasarda. Ngem adtoy ti pammaneknek a birhen ti anakko; kitaenyo ti ules a nagkaiddaanda iti umuna a rabii!’

18Masapul nga alaen dagiti panglakayen ti lalaki sada kabilen.

19Pagmultaenda pay iti 100 a bagi ti pirak ket itedda ti kuarta iti ama ti babai gapu ta imbabainna ti maysa a balasang iti Israel. Saan la a dayta; agtalinaedda nga agassawa ket dina mabalin nga isina ti babai iti unos ti panagbiagna.

20“Ngem no pudno ti pammabasol ket awan ti pammaneknek a birhen ti babai,

21iruarda sada ipan iti ruangan ti balay ni amana. Sadiay ti pangbatoan kenkuana dagiti lallaki iti siudad agingga a matay. Nakababain ti inaramidna iti Israel gapu ta nakikaidda iti lalaki sakbay a nakiasawa idinto nga agnanaed pay laeng iti balay ni amana. Kastoy ti panangikkatyo iti daytoy a kinadakes.

22“No masukalan a kakaiddaen ti maysa a lalaki ti asawa ti sabali, masapul a mapapatayda a dua. Kastoy ti panangikkatyo iti daytoy a kinadakes.

23“No matiliwan ti maysa a lalaki iti maysa nga ili a makikakaidda iti babai a naitulag a mayasawa,

24ipanyo ida a dua iti ruar ti ili ket batoenyo ida agingga a matayda. Mapapatay ti babai gapu ta saan a nagpaarayat idinto nga adda iti ili nga adda makangngeg kenkuana. Mapapatay met ti lalaki gapu ta kinaiddana ti babai a naitulag iti padana nga Israelita. Kastoy ti panangikkatyo iti daytoy a kinadakes.

25“No ramesen ti maysa a lalaki ti maysa a balasang a masabatna iti away a naitulag a mayasawa, ti laeng lalaki ti mapapatay.

26Awan ti pakaan-anoan ti babai ta awan ti inaramidna a pakaigapuan ti pannakapapatayna. Maipada daytoy a kaso iti kaso ti maysa a lalaki a mangdarup iti padana a lalaki ket patayenna.

27Ngamin, rinames ti lalaki ti naitulag a babai iti putputong a lugar nga awan umarayat kenkuana.

28“NoEx. 22:16-17. matiliwan ti maysa a lalaki a mangramrames iti maysa a balasang a saan a naitulag a mayasawa,

29masapul a mangted iti 50 a bagi ti pirak iti ama ti babai a kas sab-ong ket asawaenna ti babai gapu ta pinilitna. Dina mabalin nga isina iti unos ti panagbiagna.

30“MaiparitLev. 18:8; 20:11; Deut. 27:20. a kaiddaen ti maysa a tao ti siasinoman kadagiti assawa ni amana tapno saan a maibabain ti naganak kenkuana.”