UISAYA 21 - isiXhosa 1996

Ukuwa kweBhabheli

1Nalu udaba olundilisekileyo olumayela neBhabheli, intlango engasemlanjeni:

Njengesaqhwithi sivuthuza entlango

uya kwenjenjalo xa ezayo umhlaseli:

uya kuza ephuma ezweni eloyikekayo.

2Ndiwalamile umbono wezehlo zenkohlakalo:

ungcothoza nomxhaphazi bayazenzela.

Phakathi, maElam; hlaselani!

Nani, maMedi, zirhawuleni izixeko!

Ngoku uThixo uya kuphelisa ukungcungcutheka;

nditsho ingcinezelo eze neBhabheli.

3Ke ngoko nditsho ndahlasimla;

nditsho ndapena-pena ziintlungu,

ndangathi ngumfazi kunkqonkqoza inimba.

Izintw' endizivayo ziyandikhamnqisa;

Kambe ke endikuvileyo ndiyanazisa,

izintw' endizibonayo ziyandimangalisa.

4Ewe, ingqondo yam imile;

suke ndangenwa bubuphaku-phaku;

kukade ndilangazelela urhatya,

nalu ke lunditsho ndangcangcazela.

5Naso ke isidlo sesilungile;

kungokunje sebesophula.

Phantsi sebandlele iingubo;

ewe, kuyatyiwa kuyaselwa.

Hayi bo, phakamani, matshawe;

kubi, thambisan' amakhaka.

6INkosi indiyalele yenjenje:

“Hamba umisele intlola;

yona maze ikuthethe ekubonileyo.

7Yakubona iinqwelo zamahashe,

mhlawumbi abaqabele iidonki noba ziinkamela,

maze ibaqwalasele ngononophelo.”

8Ke idindala lidanduluke lathi:

“Imini nobusuku, mnumzana, ndimile,

ndithe bhuxe emboniselweni.

9Ngephanyazo nje gqi inqwelo itsalwa ngamahashe.

Umqhubi udanduluka esithi:

‘Hi-i-i! Yaw' iBhabheli!

Imifanekiso yezithixo zakhona nantso ibubusaza emhlabeni.’ ”

10Nina ke, maSirayeli, mawethu,

senifana nengqolowa exushwe ziinyawo esandeni.

Kambe ke endikuvileyo ndiyanazisa,

ndibhengeza endikuxelelwe *nguNdikhoyo uSomandla-onke,

nditsho uThixo kaSirayeli.

Mayela ne-Edom

11Nalu udaba olundilisekileyo olumayela neDuma:

Kukho obiza eSeyire:

“Khawutsho, mlindi, buntangani obu busuku?

Khawundixelele, kuxesha liphi ebusuku?”

12Umlindi uphendula athi:

“Sekumbovu kuse, kodwa ubusuku buyeza kwakhona.

Xa usenomkro ungabuza;

ewe, uze ubuye ubuze kwakhona.”

Mayela nelama-Arabhu

13Nalu udaba olundilisekileyo olumayela nelama-Arabhu:

Nina barhwebi baseDedan

abaxhwarhe kumahlathi elama-Arabhu,

14abo banxaniweyo baphen' amanzi;

nina bantundini baseTema,

ziphen' ukutya iimbacu.

15Kaloku zizisindisa kuloo mikhonto,

leyo seyirholwe yada yajoliswa,

ngokunjalo nezo ntolo zingxashiweyo,

ewe, zipheph' ifuthe lemfazwe.

16INkosi ke ithethe nam yenjenje: “Kwisithuba sonyaka ninyamezele ubukhulu nodumo lweentlanga zamaKedare luya kunqamka.

17“Kwezo ncushe zamaKedare adubula ngeentolo kuya kusala iingqandandana nje. Ewe, kuya kuba njalo, kuba nditshilo mna *Ndikhoyo Thixo wamaSirayeli.”