Apocalipsis 16 - Bible

Chiu copa reta Tumpa iarasɨ pewa

1Jayawe ayandu pëti ñee täta wae tupao wasu wi jei jokua chiu araɨwa reta pe kuärái: “Pekua pepɨyere ɨwɨ re jokua chiu copa Tumpa iarasɨ tɨnee oï pɨpe wae,” jei.

2Jayawe pëti araɨwa oo upɨyere icopa ɨwɨ re. Jare upɨyere ma yawe, aramoiño ɨwɨ pewa reta opa kachi iyatiitii reta. Jukuärái uyeyapo jokua bestia jaanga re umbɨadora wae reta pe jare bestia imarka onoi wae reta pe.

3Joko wi ïru araɨwa upɨyere icopa mar re. Kua re mokui ma upɨyere. Jare upɨyere ma yawe, opaete mar uyeyapo tuwɨrä kɨse pe uyeyuka wae reta juwɨ uyepɨyere wae rami. Jare opaetei mbaembae mar pe oï wae reta opa umano.

4Joko wi ïru araɨwa upɨyere icopa ɨ wasu reta re jare ɨwororo reta re. Kua re mbapɨ ma upɨyere. Jare upɨyere ma yawe, aramoiño ɨ wasu reta jare ɨwororo reta opa uyeyapo tuwɨrä.

5Jare ayandu pëti araɨwa ɨ re uyandareko wae jei Tumpa pe:

“OreYa, jupi wae ko nde.

Nde iyɨpɨ wiwe ndikoño mái jare jekuaeño neï.

Jare jokua nde ndiyapo wae jupi ko, echa’ä nde ndiporaraka ma jokua jeko kachi wae reta pe.

6Echa’ä jae reta upɨyere ma jeta tuwɨ – jae ko nderé wɨrowia wae reta juwɨ jare niñee umɨmbeu wae reta juwɨ.

Jáeramo nde ndeuka neï chupe reta tuwɨ wi. Echa’ä jupi ko uyeyapo oï jukuärái chupe reta.”

Jukuärái araɨwa jei Tumpa pe.

7Jayawe ayandu ïru ñee oë mbaerenda mbae utimbo kawi wae uyeapɨ jese wae wi. Jare jei kuärái: “Añetete jukuärái ko, oreYa Tumpa. ¡Nde nembaepuerete ye wae ko! Nde ndepurumbɨjeko jupi wae rupi jare ndiporaraka añetete wae rupi,” jei.

8Jayawe ïru araɨwa upɨyere icopa warasɨ re. Kua re irundɨ ma upɨyere. Jare upɨyere ma yawe, uñemee mbaepuere warasɨ pe ipuere waerä uapɨ ɨwɨ pewa reta jaku rái pɨpe.

9Jare warasɨ jasɨete ramo, ɨwɨ pewa reta ipire uapɨ chuwi. Jáeramo jae reta jei ñee ikawi mbae wae Tumpa kotɨ. Jae reta uikuaa tëi Tumpa ime onoi mbaepuere opaete kua mbaesusere reta re. Erëi jesewe jae reta uipota’ä etei ueya ipɨayemɨngeta jupi mbae wae, jare umbutuicha’äñoi reta Tumpa jee.

10-11Joko wi ïru araɨwa upɨyere icopa. Kua re pandepo ma upɨyere. Jare jae upɨyere icopa bestia tenondewa iwapɨa re. Kua bestia ime tëi wɨreko mbaepuere opaete ɨwɨ re. Erëi araɨwa icopa upɨyere ma yawe, aramoiño opa uñemɨpɨ̈tumimbi opaete ɨwɨ rupi. Jare opaete bestia pe uyeyokui wae reta uiporaraete. Uñeküsuu tëi reta, echa’ä jasɨ chupe reta opa iyatiitii ñonoï reta ramo. Erëi jesewe jae reta ueya’ä ñeño ipɨayemɨngeta jeko kachi wae rewa. Jaeño ñee ikawi mbae wae jei reta Tumpa kotɨ.

12Joko wi ïru araɨwa upɨyere icopa. Kua re owa ma upɨyere. Jare jae upɨyere icopa ɨ wasu tuichaete Éufrates jee wae re. Jare upɨyere ma yawe, jokua ɨ wasu opa utini. Kua uyeyapo mburuwicha wasu warasɨ oë wae kotɨwa reta pewarä ipuere waerä jae reta ɨmambae uasa isɨndaro reta ndiwe jowaicho kotɨ.

13Jayawe aecha wi dragón jare jokua mokui bestia reta. Jokua taɨkuewaete bestia jei tëi jae umɨmbeu iko Tumpa iñee. Erëi umɨmbeu yepe iko bestia tenondewa iñee. Jare mbapɨ rewe jae reta iyuru wi aecha oë mbapɨ aña kachiete wae pïte echa.

14-16Jokua aña reta ipuere uyapo mbaembae umbɨpɨakañɨete waerä ɨwɨ pewa reta. Jae reta yuraa opaete ɨwɨ rupi umbatɨ waerä mburuwicha wasu reta jare isɨndaro reta ndiwe ombowaicho waerä tëi Tumpa. Jokua ñeräro uyeyapota oï Armagedón jee wae pe. Jukuärái ko jee hebreo ñee pe. Erëi Tumpa opaetei mbaepuere onoi. Jare jae uiporarakata oï chupe reta jokua ara.

YandeYa jei, “Mase, che ayu yeta aï pepɨranoe pewa pëti imonda wae ou rami. Jare jokua uyandareko kawi ñonoï wae reta jare jupi rupi yureko wae reta uyekoueteta ñonoï. Echa’ä che ayu ye awäe yawe, jae reta ndarau imara kía nani etei uyepokouka wae rami,” jei.

17Joko wi ïru araɨwa upɨyere icopa. Kua re chiu ma upɨyere. Jare upɨyere yawe, jae upɨyere ɨwɨtu uyepeyu wae re. Jare jupiwoiño oë ñee täta wae tupao wasu ara pe oï wae wi, Tumpa iwapɨa wi. Jare jokua ñee jei kuärái: “¡Tumpa iarasɨ opata ma oï!” jei.

18Jare uyekuaa uwera wae, jare uyendu jɨapu täta wae amaterere rami. Jare uyendu wi ara jɨapu. Jare ɨwɨ täta ukäta. Kua nunga ɨwɨkäta mbaetɨi ɨwɨ pewa reta uyembɨpɨ wiwe, echa’ä tätaete iko.

19Jare ɨwɨkäta jeko pewa, ɨwɨ opa osorosoro jare jokua tëta wasu jeräkuaete wae uyembɨyao tee tee mbapɨ pe. Jare jukuärái wi opaete ɨwɨ rupi tëta wasu reta opa uyapara. Tumpa iñakañɨ'ä jokua tëta wasu Babilonia jeräkuaete wae wi jare imbaepuerete wae wi uitɨ waerä jese iarasɨ.

20Jare ɨwɨ ukäta yawe, opaete ɨwɨ ɨ mbɨte pe ñonoï wae reta opa ukañɨ ɨ pe, jare jae nunga wi ɨwɨtu wasu reta mbaetɨ ma.

21Jare ara wi oa amandau tuicha tuicha wae ɨwɨ pewa reta re. Jare pëti pëti amandau poɨ cuarenta kilo rupi. Jare ɨwɨ pewa reta jei ñee ikawi mbae wae Tumpa kotɨ amandau wasu jeko pewa, echa’ä jokua mbaesusere ikawi’äete ye ko ramo.