Apocalipsis 2 - Bible

Cristo wɨraaka ñee Éfeso pe jese wɨrowia wae reta pewarä

1Jare yandeYa jei wi chewe: “Ime pëti araɨwa uyandareko oï opaete cheré wɨrowia wae reta re tëta wasu Éfeso pe. Ikuatía chupe kua chiñee kuärái:

‘Che ko jae jokua chiu yasɨtata ipo iyakata kotɨ onoi wae, jare jokua chiu mechero iwapɨka oro pewa ipɨte rupi uwata wae.

2Jare che tae Éfeso pewa cheré wɨrowia wae reta pe kuärái: Che aikuaa opaete mbae piyapo wae, kërái täta peparawɨkɨ peï chemaerä jare kërái pemɨawäta peï yembɨawái reta pepɨawasu rewe. Aikuaa wi piñemɨïru’ä peï ikawi mbae wae uyapo wae reta ndiwe. Jare aikuaa wi ime pepɨte pe amokue wae reta jei tëi ñonoï kuärái: “Che ko jae Jesús chembou jae jee re wae.” Erëi aikuaa wi pe reta pikuaa ma chuwi jae reta iyapu wae.

3Jare che aikuaa wi perowia cheré ramo, täta piporara jare pemɨawäta pekueri mbae rewe. Opaete kua ikawi ko.

4‘Erëitu ime mbae re pumbɨjeko waerä. Jae ko kua: pepuruau’ä ma kërái pepuruause jaeramo cheré perowia yawe.

5Awɨye peakañɨ kërái tenonde yawe tuicha pepuruau. Jáeramo peya pepɨayemɨngeta añawe penoi wae, jare piyapo ye kërái tenonde yawe piyapose wae rami. Erëi piyapo’ä yawe jukuärái, ayuta jupiwoiño ambɨsɨrɨ waerä pemechero iwapɨka jenda wi.

6‘Erëi ayerowia kua re: pemaerä kachi oï jokua nicolaíta reta mbae uyapo wae. Jare jukuärái wi chemaerä kachi oï.

7‘Ipotawe kía uipota uikuaa kawi wae, tuyapɨsaka kua ñee re – jae ko Espíritu Santo jei oï cheré wɨrowia wae reta pe kerupi rupi uyembatɨ ñonoï wae reta pe.

‘Ikawi mbae wae umɨamɨri wae reta pe ameeta jou reta waerä ɨwɨra ía Tumpa jëta pe oï wae. Jae ko ɨwɨra tekowe umee wae.’

Jukuärái ikuatía,” jei chewe.

Cristo wɨraaka ñee Esmirna pe jese wɨrowia wae reta pewarä

8Jare yandeYa jei wi chewe: “Ime pëti araɨwa uyandareko oï opaete cheré wɨrowia wae reta re tëta wasu Esmirna pe. Ikuatía chupe kua chiñee kuärái:

‘Che ko jae jokua tenondewaete wae jare taɨkuewaete wae. Che amano, erëi aikowe ye.

9Jare che tae Esmirna pewa cheré wɨrowia wae reta pe kuärái: Che aikuaa opaete mbae piyapo wae, jare kërái piporara jare peparawete (erëi añetete pikokatu peï Tumpa kotɨ). Aikuaa wi jei ñonoï ñee kachi pekotɨ jokua judío jei tëi iyupe wae reta. Jae reta uyererowia tëi Tumpa pewa reta ko, erëi jukuärai’ä ko. Jae reta ko uyembatɨ Satanás jee re uikuaa mbae rewe.

10‘Mase, Añawasu peñonokata amokue pe reta peresorɨru pe, echa’ä jae uipota uyawɨka pewe ramo. Jare joko pe piporarata payandepo ara pewa. Erëi awɨye pekɨye kua piporarata peï wae wi. Aramoi pemanota cheré perowia jeko pewa, erëi awɨye peya cheré perowia wae. Jare che ameeta aï pewe jokua corona tekowe opa mbae pewa.

11‘Ipotawe kía uipota uikuaa kawi wae, tuyapɨsaka kua ñee re – jae ko Espíritu Santo jei oï cheré wɨrowia wae reta pe kerupi rupi uyembatɨ ñonoï wae reta pe.

‘Ikawi mbae wae umɨamɨri wae reta ndarau etei uiporara mano mokuía re.’

Jukuärái ikuatía,” jei chewe.

Cristo wɨraaka ñee Pérgamo pe jese wɨrowia wae reta pewarä

12Jare yandeYa jei wi chewe: “Ime pëti araɨwa uyandareko oï opaete cheré wɨrowia wae reta re tëta wasu Pérgamo pe. Ikuatía chupe kua chiñee kuärái:

‘Che ko jae jokua kɨsepuku jaimbeyowai onoi wae.

13Jare che tae Pérgamo pewa cheré wɨrowia wae reta pe kuärái: Che aikuaa opaete mbae piyapo wae. Jare aikuaa wi Satanás ime onoi iwapɨa mburuwicha wasu pewa perëta wasu pe. Erëi pe reta jekuaeño perowia peï cheré jare chekuaku’ä. Chemandúa wi Antipas re. Jae jekuaeño umɨmbeu kawi iko che rewa, jare jokua jeko pewa perëtáɨwa reta uyuka. Echa’ä añetete Satanás ime onoi jetaete mbaepuere joko pe. Erëitu jokua ara reta rupi awe peya’ä perowia cheré wae, yepe tëi yawaiete pewe. Kua ikawi ko.

14‘Erëitu ime amokue mbaembae re pumbɨjeko waerä. Jae ko kua: Ime pepɨte pe ñonoï amokue wae reta uipota’ä ueya jokua yemboe kuimbae Balaam arakae oporomboe wae. Balaam arakae umbɨarakuaa mburuwicha Balac jee wae kërái ipuere waerä uyawɨka Israel iñemoñaa reta pe Tumpa kotɨ. Jayawe Balac umɨkɨrëɨ Israel iñemoñaa reta jou waerä tembiu tumparaanga pe uñemee wae jare uyapo reta waerä awasa.

15Jare jukuärái wi pepɨte pe oporomboe ñonoï jokua nicolaíta reta. Jare yepe tëi jokua jae reta oporomboe ñonoï wae kachiete chewe, erëi amokue wae pe reta pipɨsɨ ma jokua yemboe.

16‘Jáeramo peya pepɨayemɨngeta añawe penoi wae. Erëi piyapo’ä yawe jukuärái, ayuta jupiwoiño añeräro waerä jokua yemboe kachi wae uipɨsɨ wae reta ndiwe. Kua ayapota kɨsepuku cheyuru wi oë wae pɨpe.

17‘Ipotawe kía uipota uikuaa kawi wae, tuyapɨsaka kua ñee re – jae ko Espíritu Santo jei oï cheré wɨrowia wae reta pe kerupi rupi uyembatɨ ñonoï wae reta pe.

‘Ikawi mbae wae umɨamɨri wae reta pe ameeta jou waerä jokua maná ara pewa añawe uñeñomi oï wae. Jare ameeta chupe reta wi pëti ita raɨ tïi wae uyekuatía oï jese pëti tee ipɨau wae. Jare jokua tee uikuaata’ä kiawe – jaeño jokua ameeta chupe wae uikuaata.’

Jukuärái ikuatía,” jei chewe.

Cristo wɨraaka ñee Tiatira pe jese wɨrowia wae reta pewarä

18Jare yandeYa jei wi chewe: “Ime pëti araɨwa uyandareko oï opaete cheré wɨrowia wae reta re tëta wasu Tiatira pe. Ikuatía chupe kua chiñee kuärái:

‘Che ko jae Tumpa Taɨ. Che ko jae jokua jesa tata jendɨ wae rami, jare jokua ipɨ jiero bronce uwerasɨ wae rami.

19Jare che tae Tiatira pewa cheré wɨrowia wae reta pe kuärái: Che aikuaa opaete mbae piyapo wae jare kërái perowia kawi cheré wae. Aikuaa wi pepuruau, pepɨawasu, jare kërái piyeyokui chewe wae. Jare aikuaa wi añawe peparawɨkɨ chewe wae jetaete piyapo tenonde piyapo wae wi. Opaete kua ikawi ko.

20‘Erëitu ime mbae re pumbɨjeko waerä. Jae ko kua: Pe reta pemaeño peï jokua kuña Jezabel jee wae re oporomboe waerä pepɨte pe. Echa’ä jae jei tëi iyupe: “Che ko jae ñee Tumpa wi etei ou wae amɨmbeu wae,” jei tëi iyupe. Erëi umbɨtawɨ oï uyeyokui chewe wae reta jae reta uyapo waerä awasa jare jou reta waerä tembiu tumparaanga pe uñemee wae.

21Che amee tëi ma ara jokua kuña pe ueya waerä ipɨayemɨngeta kachi wae. Erëi uipota’ä. Jekuaeño uipota awasa uyapo.

22-23Jáeramo amɨmbaerasɨta jokua kuña, jare ayukata wi imembɨ reta jei chupe wae reta. Jare jae nunga wi aiporarakata täta rupi aï jokua kuña ndiwe awasa uyapo wae reta pe, jae reta ueya’ä yawe ipɨayemɨngeta kachi wae. Jukuärái opaete cheré wɨrowia wae kerupi rupi uyembatɨ wae reta uikuaata che aikuaa opaete wae ipɨayemɨngeta reta. Jare uikuaata reta wi amɨñatimata pewe pëti pëti pe opaete mbae piyapo wae rupi.

24‘Erëi amokue pe Tiatira pe peï wae reta pipɨsɨ'ä jokua kuña omboe wae re, jare pikuaa’ä jokua arakuaa jei chupe reta wae erëi añetete Satanás wi ou wae. Kua pereko ikawi ko. Jáeramo che tae pewe kuaño piyapo waerä:

25jekuaeño piyapo jokua piyapo peï wae che ayu ye rewa.

26‘Ikawi mbae wae umɨamɨri wae reta – jae ko jokua che jae wae uyapo ayu ye rewa wae reta – chupe reta ameeta mbaepuere ɨwɨ ambɨe pewa reta re.

27Tuicha mbaepuere onoita reta jare ndarau kía reta ipuere uyembowaicho ikotɨ. Kua mbaepuere ko cheRu umee chewe. Jare jukuärái wi che ameeta aï chupe reta.

28Jare ameeta wi chupe reta yasɨtata ndei köe mbowe mii uyekuaa wae. Jukuärái ayapota upurumɨamɨri wae reta pe.

29‘Ipotawe kía uipota uikuaa kawi wae, tuyapɨsaka kua ñee re – jae ko Espíritu Santo jei oï cheré wɨrowia wae reta pe kerupi rupi uyembatɨ ñonoï wae reta pe.’

Jukuärái ikuatía,” jei chewe.