2 Corintios 3 - Bible

Yemɨngeta ipɨau wae Tumpa uyapo wae rewa

1Ore reta mbaetɨ etei ko nduikuatía noï kua mbaembae reta nduyembutuicha waerä perowai. Ani ¿pipota yerá numee waerä pewe pëti tupapire uikuaaka waerä oreré wae? Jukuärái uyapo ïru wae reta. Erëi ore reta nduipota’ä nduyapo jokua.

Jae ramiño wi ndarau ndueka pewe pikuatía waerä oremaerä jokua nunga tupapire ïru wae reta uikuaa waerä ore rewa.

2Echa’ä oremaerä pe reta etei ko jae jokua tupapire uyekuatía oï wae rami. Echa’ä opaete wae ipuere uecha pereko kërái ikawi oï wae, jare jukuärái rupi jae reta orekuaata oreparawɨkɨ ikawi oï Tumpa pewarä. Kua ikawiete oremaerä.

3Añetete pe reta ko jae pëti tupapire Cristo etei uikuatía wae rami. Jare kua jae uikuatía pepɨa re rami etei. Echa’ä ore pomboe Cristo re yawe, Tumpa ikoño mái wae iEspíritu etei umbɨambɨe pereko opaete wae uecha waerä. Kua Tumpa uyapo pepɨa pe wae ikawiete ko ipotawe tupapire jare tinta wi. Jare ikawiete ko Tumpa arakae uikuatía ita re wae wi.

4Kua orepuere ndoe pewe, echa’ä ndorowia katu ore rupi ko Cristo uparawɨkɨ pe reta perowia waerä. Jukuärái ore ndoe Tumpa jowake.

5Ndorowia’ä etei oreiño orepuereta nduyapo mbarawɨkɨ Tumpa pewarä. Tumpa ko oremɨmbaepuere.

6Jare Tumpa ko umee ma orewe mbaepuere numɨmbeu kawi waerä ïru wae reta pe kua ñee – jae ko Tumpa uyapo oï pëti yemɨngeta ipɨau wae ɨwɨ pewa reta ndiwe wae.

Kua yemɨngeta ipɨau wae ikawiete ko, echa’ä Espíritu Santo wi ko ou ramo jare ueru yandewe tekowe ipɨau wae. Ambɨe ye ko jokua yemɨngeta arakae Tumpa uyapo Moisés rupi wae wi. Moisés uikuatía opaete mbaembae Tumpa jei chupe wae, këraita ko Israel iñemoñaa reta yureko wae. Erëi jokua jaeño ueru chupe reta mano, echa’ä uyawɨ reta Tumpa jei wae ramo.

7Yepe tëi Moisés uikuatía wae ueru mano, erëitu yaikuaa ko ikawi iko. Echa’ä Tumpa wi etei ko ou. Añetete Tumpa etei ko uikuatía rani jae jei wae ita re, jare jokua umee Moisés pe imbaepuere jembipete rewe. Jare jokua tembipe upɨta Moisés jowa re. Jare yepe tëi jokua tembipe ndewe ndewe rupi owe oo iko, erëi Israel iñemoñaa reta jesapɨräta’ä umae waerä jese.

8Erëi ¡ikawiete ye ye ko kua yemɨngeta ipɨau wae Espíritu Santo uyapo oï wae!

9Echa’ä jokua yemɨngeta arakae uyapo reta wae, yepe tëi Tumpa imbaepuere jembipete rewe ko uyapo jae reta ndiwe, jesewe jaeño ueru chupe reta Tumpa iarasɨ uyawɨ reta jae jei wae ramo. Erëi kua yemɨngeta ipɨau wae Espíritu Santo uyapo oï wae rupi Tumpa umae yanderé yandereko mbae wae rami.

10Añetete Moisés arakae uikuatía wae omboyowake’ä kua yemɨngeta ipɨau wae, echa’ä yemɨngeta ipɨau wae ikawiete ye ko.

11Moisés uikuatía wae, yepe tëi uñemee Tumpa imbaepuere jembipete ye rewe, erëi uasa oo iko. Erëi ikawiete ye ye ko kua yemɨngeta ipɨau wae Espíritu Santo uyapo oï wae, echa’ä ndarau etei opa.

12Ore nduikuaa kua ñee ikawiete ye ko. Jáeramo numɨmbeu opaete wae pe nduipɨu mbae rewe.

13Nduyapo’ä Moisés uyapo rami. Echa’ä jae umbɨyasoi jowa tarapo pɨpe awɨye waerä Israel iñemoñaa reta uecha kërái jowa jembipe wae owe oo iko.

14Erëi Israel iñemoñaa reta ipɨatäta yureko. Uikuaa’ä reta jokua yemɨngeta Tumpa arakae uyapo jae reta ndiwe wae opata iko wae. Jare jukuärái ko jae reta añawe rewa. Echa’ä añawe rupi awe jae reta umɨngeta yawe Moisés arakae uikuatía wae, imeño uikuaa kawi’ä reta. Jae reta iyarakuaa imeño uyakasoi oï tarapo pe wae rami, kërái Moisés jowa tarapo pe umbɨyasoi rami. Echa’ä jae reta wɨrowia Cristo re yaweño ko ipuere iyarakuaa uyepea.

15Añetete jae parawete reta añawe rewa umɨngeta yawe Moisés uikuatía wae, iyarakuaa imeño uyakasoi oï wae rami ko.

16Echa’ä kía uyerowa yandeYa kotɨ yaweño ko uyepeata jokua iyarakuaa uyakasoi oï wae.

17YandeYa jae ko Espíritu. Jare ime yawe kía yandeYa iEspíritu onoi wae, ndarau ma iyarakuaa uyakasoi oï wae rami.

18Jare jukuärái ko yande reta. Tenonde yawe yaikuaa’ä yaiko yandeYa. Yandearakuaa uyakasoi ikose rami. Erëi añawe yandearakuaa uyepea ma, jare añawe yaecha kawi ma yandeYa kërái ikawiete ye ko. Jare ñamae yawe yandeYa kotɨ, ndewe ndewe rupi yandeYa iEspíritu jekuaeño yanembɨambɨe oï yandereko oya katu oo waerä yandeYa jeko re. Jare jukuärái yande rupi ïru wae reta ipuere uecha yandeYa kërái ko jae wae.