1 Juan 3 - Bible

1Mase, kërái etei ra ko yandeRu Tumpa yanderau, echa’ä jae jei yandewe, “Cheraɨ retarä ko.” Jare jokua ko jae yande reta. Erëi kua ɨwɨ jeko rupi yureko wae reta uikuaa’ä kía ko yande wae, echa’ä uikuaa’ä reta yandeRu Tumpa ramo.

2Cheïru puau wae reta, añawe yande ko jae Tumpa taɨ reta. Jare ndeiño Tumpa uikuaaka yandewe kërái eteita ra ko ñaï kuri wae. Erëi yaikuaa ko ñaïta Cristo rami jae ou ye yawe, echa’ä yaechata jae etei kërái ko jae wae.

3Kua añetete uyeyapota ko. Jare opaete kua uäro ñonoï wae reta wɨrɨ̈ro mbae kachi wae, echa’ä jae reta uipota yureko jupi Cristo rami.

4Ime yawe kía Tumpa jei wae jekuaeño uyawɨ wae, jokua ko jae mbae kachi wae Tumpa jowai. Echa’ä yayawɨ Tumpa kotɨ yawe, yambowaicho ko ñaï Tumpa.

5Erëi pe reta pikuaa kawi peï Cristo uyeyapo kuimbaerä opa umbái waerä yandewi mbaembae yayawɨ Tumpa kotɨ wae. Jare Cristo pëti wese awe uyawɨ'ä.

6Jáeramo kía uñemɨïru kawi Cristo ndiwe wae ndarau jekuaeño uyawɨ Tumpa jei wae. Erëi kía jekuaeño uyawɨ Tumpa jei wae wɨrowia’ä ko Cristo re jare uikuaa’ä etei ko wi.

7Cheraɨ puau wae reta, piyandareko kawi piyé awɨye waerä kía pembɨtawɨ kua rewa. Kía re Tumpa umae jeko mbae wae rami ikota jupi wae rupi. Echa’ä jae uipota iko Jesucristo rami, jare Jesucristo jupi wae ko.

8Erëi ime kía Tumpa jei wae jekuaeño uyawɨ wae, jae Añawasu pewa ko. Echa’ä Añawasu iyɨpɨ wiwe uyawɨño mái Tumpa kotɨ. Erëi Tumpa Taɨ uyeyapo kuimbaerä opa umbái waerä Añawasu iparawɨkɨ.

9Jayawe ipotawe kía Tumpa uyapo taɨrä wae ndarau jekuaeño uyawɨ Tumpa kotɨ. Echa’ä Tumpa etei ko uyapo taɨrä iko waerä jare umee chupe tekowe ipɨau wae Tumpa pewa. Jokua jeko pewa ko Cristo re wɨrowia wae reta ipuere’ä jekuaeño uyawɨ Tumpa kotɨ.

10Jukuärái ko yandepuere yaikuaa kía ra ko jae Tumpa taɨ reta wae jare kía ra ko jae Añawasu taɨ reta wae. Opaete mbae jupi mbae uyapo wae reta Tumpa pewa’ä ko. Jare jae nunga wi opaete uau’ä japicha wae reta Tumpa pewa’ä ko wi.

Tumpa taɨ reta uyerauta ko päwe rewe

11Kua ñee ipɨau wae’ä ko. Echa’ä pe reta piyanduño mái imeta ko yayerau päwe rewe.

12Awɨye yaiko Caín rami. Caín Añawasu pewa ko jare uyuka tɨwɨ. Jare ¿mbae jeko pewa ra uyuka? Echa’ä Caín jeko kachi ko, erëi tɨwɨ uyapo jupi wae.

13Jáeramo chehermano mii reta, kua ɨwɨ jeko rupiño yureko wae reta peamɨtäa yawe, awɨye pepɨakañɨ jokua re. Echa’ä jokua uasaño mái iyɨpɨ wiwe.

14Yande yarowia Cristo re wae reta yayerau päwe añetete rewe yawe, jokua uikuaaka yandewe ime ko ñanoi tekowe ipɨau wae jare ndarau ye ñamano wae echa Tumpa wi. Erëi kía upuruau’ä wae imeño umano oï wae echa Tumpa wi.

15Jare ime yawe kía uñamɨtäa umae ïru hermano re wae, Tumpa pewarä jae upuruyuka ma. Jare pe reta pikuaa kawi pëti upuruyuka wae mbaetɨ etei ko onoi tekowe opa mbae wae.

16Jare yande reta yaikuaa ma kërái ko yapuruau añetete rewe. Echa’ä yandeYa Cristo jokua uechaka ma yandewe jae umee yawe jekowe yanderé. Jukuäraita ko yande yaau wi ïru hermano reta.

17Erëi, ¿këraita ra ko ime yawe kía jeta mbaembae onoi wae, jare jae uecha yawe ïru hermano ikuasɨ oï mbae uata chupe ramo? ¿Këraita ra ko jokua ikokatu wae ipɨatäta jare uipota’ä omborɨ yawe? ¿Jae upuruau ra oï Tumpa rami? Mbaetɨ etei.

18Jayawe cheraɨ puau wae reta, yapuruau mii mbaembae yayapo wae rupi añetete rewe. Awɨye yapuruau ñaniñee peño.

19Jare yande yapuruauñoi yawe añetete rewe, jokoropi ko yaikuaa Tumpa pewa ko yande reta. Jukuärái ñaï wi Tumpa jowai yandepɨakatu rewe.

20Echa’ä aramoi yandepɨa yanembɨjeko oï mbae re. Erëi jesewe yandepuereta yandepɨakatu Tumpa jowai, echa’ä yaikuaa Tumpa uikuaa yande rewa opaetei. Jare jokua jae jei yandereko rewa wae jupiete ko yandepɨa jei wae wi.

21Cheïru puau wae reta, yandepɨa mbaetɨ ma yanembɨjeko mbae re yawe, yandepuereta yaya Tumpa re yayerowia rewe.

22Jare ipotawe mbae yayerure chupe wae, jae uyapota yandewe, echa’ä yayapo jae jei wae ramo jare yayapo mbaembae jae umbɨyerowia wae ramo.

23Jare kua ko jae Tumpa jei yandewe wae: imeta ko yarowia Taɨ Jesucristo re, jare imeta ko yayerau päwe rewe kërái Cristo jei yandewe rami.

24Jare kía kua Tumpa jei wae uyapo wae jekuaeño uñemɨïru Tumpa ndiwe, jare Tumpa jekuaeño uñemɨïru jae ndiwe wi. Jare yande yaikuaa Tumpa uñemɨïru ko yande ndiwe, echa’ä jae umee yandewe Espíritu Santo ramo.