Hebreos 7 - Bible

Jesús ko jae sacerdote Melquisedec rami

1Kua kuimbae Melquisedec arakaete iko tëta wasu Salem imburuwicha wasurä. Jare jae iko wi pëti sacerdote uyeyokui waerä Tumpa imbaepuere tuichaete wae pe. Yanemandúa ñaï, pëti wese Abraham opa umɨamɨri yawe amokue mburuwicha wasu jare isɨndaro reta, jare jae ou ye iko yawe ñeräro wi, Melquisedec oo owäiti Abraham jare jei pëti ñee ikawi wae chupe kuärái: “Tumpa tuyapo ikawi wae ndewe,” jei chupe.

2Jayawe Abraham opaete mbaembae upɨ̈ro jowaicho reta wi wae, jokua wi umee diezmo Melquisedec pe. Jokua tee Melquisedec uipota jei “mburuwicha wasu jupi wae.” Jare jae iko tëta wasu Salem imburuwicha wasurä ramo, jae jee wi “mburuwicha wasu umbɨpɨakatu wae.” Echa’ä tee Salem uipota jei “ipɨakatu wae.”

3Kua kuimbae Melquisedec, yaikuaa’ä kía ra jae tu jare ichɨ wae. Yaikuaa’ä wi kía iñemoñaa pewa reta ra ko jae wae. Jare yaikuaa’ä wi kërái yawe ra oa, jare kërái yawe ra umano wae. Jáeramo Melquisedec yandepuere yambɨjaanga Tumpa Taɨ re, echa’ä jae ko pëti sacerdote ikoño mái iko wae rami.

4Mase, kërái etei ko kua kuimbae Melquisedec pëti mburuwicha wasu imbaepuerete wae. Echa’ä yanderamɨkue Abraham etei umee chupe opaete mbaembae upɨ̈ro jowaicho reta wi wae diezmo.

5Kua ambɨe ye ko. Echa’ä Tumpa arakae jei jaeño uñemeeta ko diezmo Abraham jumɨmino yuapɨ ye Leví jee wae iñemoñaa reta peño. Jae reta ko jae opaete Abraham iñemoñaa isacerdote reta, jare chupe retaño ko jëtara reta umee diezmo.

6Erëi kua Melquisedec, yepe tëi jae’ä ko Leví iñemoñaa pewa, erëi Abraham umee chupe diezmo.

Jae nunga wi yaikuaa Tumpa jei pëti ñee ikawi wae Abraham pe kuärái: “Tayapo ndewe mbaembae ikawi wae,” jei chupe. Jáeramo Abraham ko jae pëti kuimbae imbaepuerete wae. Erëitu kua pe yaecha kërái Melquisedec jei chupe: “Tumpa tuyapo ikawi wae ndewe.”

7Jare opaete yande judío yaiko wae reta yaikuaa kawi ko kía jukuärái jei japicha pe wae, jae ko imbaepuerete chuwi wae. Jayawe kua uikuaaka yandewe Melquisedec imbaepuerete ko Abraham wi.

8Jare kua pe ime ye mbae re yayemɨngeta waerä yandepɨa pe. Jokua Leví iñemoñaa pewa reta, jae ko kuimbae reta imbaepuere wae, echa’ä uñemee chupe reta diezmo. Jesewe jae reta ko kuimbae umano ñotái ñonoï reta wae. Erëi Melquisedec umano mbae echa ko, echa’ä yandepuere’ä ñawäe Tumpa iñeerɨru pe kiape jei jae imano rewa.

9Jare jokuaño’ä ko. Yepe tëi Leví iñemoñaa reta pe uñemee diezmo, erëitu jae reta etei umee diezmo Melquisedec pe wae echa tamɨkue Abraham rupi.

10Echa’ä Melquisedec oo owäiti Abraham yawe, Leví ndeiño uyekuaa. Jare Abraham ko jae Leví tamɨrä ikota ramo, yandepuere yae Leví ime ma Abraham jete pe iko wae echa. Jayawe Abraham umee yawe diezmo Melquisedec pe, Leví wi umee chupe wae echa Abraham rupi. Jare kua uikuaaka yandewe Melquisedec imbaepuere tuichaete ko Leví imbaepuere wi.

11Añetete ko, yepe tëi Tumpa arakae jei Leví iñemoñaa reta tuñeñono tee sacerdote retarä, erëitu jae reta ipuere’ä opa umbái teko Tumpa kotɨ ñanoi wae. Jáeramo ikawi ko ime waerä ïru sacerdote ambɨe ye chuwi reta wae – pëti sacerdote Melquisedec rami – mbaetɨta ko Leví jare Aarón rami.

12Erëi jokua uyeyapo waerä, Tumpa imeta ko jei pɨau ye mbae jokua tenonde yawe jei wae ipepɨka pe. Echa’ä tenonde yawe jei jaeño Leví iñemoñaa reta tuiko sacerdote retarä.

13-14Erëi añawe kua ïru sacerdote yae chupe wae uyekuaa ma – jae ko yandeYa etei. Jare yaikuaa yandeYa jae’ä ko Leví iñemoñaa pewa. Jae ko Judá iñemoñaa pewa. Jare Moisés uikuatía yawe sacerdote reta rewa, jae jei’ä mbae awe Judá iñemoñaa reta rewa. Jokua jeko pewa añawe rewa pëti awe Judá iñemoñaa reta iko’ä ma sacerdote tupao wasu pe.

15Jayawe yandepuere yaikuaa kawi sacerdote reta Leví iñemoñaa pewa mbae’ä ma ko añawe. Echa’ä uyekuaa ma ambɨe sacerdote Melquisedec rami.

16Jare jae mbaetɨ ko sacerdote pëti ñemoñaa rupi kërái Tumpa tenonde yawe jei wae rami. Jae ko sacerdote, imbaepuere tuichaete ramo. Echa’ä jae ime onoi tekowe ndarau etei opa wae.

17Jukuärái jei Tumpa iñeerɨru pe, echa’ä joko pe uyekuatía oï mbae Tumpa jei chupe wae kuärái:

“Nde ndikota pëti sacerdote Melquisedec rami jaeño mái pewa.”

Jukuärái uyekuatía oï Jesucristo re.

18-19Jayawe Tumpa arakae jei sacerdote reta rewa wae usiriwe’ä, echa’ä ipuere’ä umbujupi kiawe Tumpa kotɨ. Jáeramo jokua jae jei wae uasa ma. Añawe Tumpa uyapo ma yandewe mbae ipɨau wae jare ikawiete wae kërái rupi yandepuere waerä yaya jese.

20-21Jare Tumpa uikuaaka kawi ma yandewe yandepuere yarowia katu jokua re, echa’ä jae oñono yawe Cristo sacerdoterä iko waerä, jae jei chupe kuärái:

“Nde ndikota pëti sacerdote Melquisedec rami jaeño mái pewa.

Jukuärái che jae, jare jokua che jae wae ndarau etei aipepɨka.”

Jukuärái jei chupe. Erëi Tumpa jei’ä jukuärái pëti wese awe Leví iñemoñaa reta pe jae reta uyeyapo sacerdoterä yawe.

22Jayawe Jesús ko jae yandesacerdote imeño mái iko wae. Jare kua ikawiete ko yanemaerä, echa’ä Tumpa uyapo pëti yemɨngeta ipɨau wae yande ndiwe. Jae ko yemɨngeta ikawiete wae jokua jae uyapo arakae yanderamɨkue reta ndiwe wae wi. Jare yandepuere yaikuaa kawi yayekouta ko ñaï jokua yemɨngeta ipɨau wae re, echa’ä Jesús jaeño mái yandepepɨka pe oï ramo.

23Kua pe ime ye mbae re yayemɨngeta waerä yandepɨa pe. Sacerdote Leví iñemoñaa pewa reta jeta ma ko, echa’ä jae reta pëti pëti opa indechi jare umano reta. Jare umano yawe, ambɨe wae uike ipepɨka pe uyapo waerä iparawɨkɨ.

24Erëi Jesús imeño mái iko ramo, ipuere uyapo iparawɨkɨ sacerdote pewa jaeño mái pewa.

25Jáeramo ime yawe kía uipota iko Tumpa ndiwe wae jare wɨrowia ma Jesús re wae, Jesús ipuerete uepɨ jaeño mái pewa. Echa’ä Jesús ikoño mái uyerure waerä Tumpa pe omborɨ reta waerä.

26Kua nunga sacerdote tenondewaete ikawi ko yandewe. Echa’ä jae ko jupi wae, jare jeko mbae wae, jare ikɨa mbae Tumpa kotɨ wae. Añetete Jesús mbaetɨ etei ko Tumpa kotɨ uyawɨ wae reta rami. Jáeramo Tumpa oñono Jesús iwapɨka ɨwate opaete ara pe oï wae reta wi.

27-28Jae’ä ko ïru sacerdote tenondewaete reta kua ɨwɨ pewa rami. Echa’ä yepe tëi jae reta ko sacerdote reta Tumpa arakae jei wae rupi, erëi uyawɨñoi reta Tumpa kotɨ. Jáeramo jae reta opa ara rupi imeta ko wɨraa mbaemɨmba uyuka umee waerä Tumpa pe. Tenonde umee reta jae reta mbaembae uyawɨ Tumpa kotɨ wae rei, jare joko wi umee reta ïru wae reta mbaembae uyawɨ wae re. Erëi añawe Tumpa oñono ma jaeño mái pewa Taɨ sacerdote tenondewaeterä oï waerä, jare jukuärái opa ma umbɨyapɨ jokua jae tenonde yawe jei sacerdote reta rewa wae. Taɨ pëti weseño uñemee umano waerä yanderé opa umbái waerä yandewi mbaembae yayawɨ Tumpa kotɨ wae jaeño mái pewa. Jukuärái ko Taɨ pëti weseño jaeño mái pewa opa uyapo opaete Tu uipota jae uyapo waerä wae.