2 Crónicas 2 - Bible

Salomón umbɨpɨ uyapoka tupao wasu

1Salomón umbɨpɨ ipɨayemɨngeta uyapoka waerä tupao wasu Tumpa pewarä, jare jae imaerä wi pëti tëta ipɨau wae mburuwicha wasu pewa.

2Jayawe umbɨjee 70.000 kuimbae reta uparawɨkɨ onoe waerä mbaembae, jare 80.000 kuimbae reta ombowo waerä ita ñaipe rupi. Umbɨjee wi 3.600 kuimbae upurumɨmbarawɨkɨ wae retarä.

3Jare Salomón omondo iñee uruwata wae umbeuka waerä ɨwɨ Tiro pewa reta imburuwicha wasu Hiram jee wae pe kuärái: “Karamboe cheru David uyapoka iko jëtarä yawe, nde nderuruka chupe jeta ɨwɨräre. Añawe iyapo wi che ndiwe cheru David ndiwe ndiyapo wae rami,” jei chupe.

4“Echa’ä añawe che ayapokata aï pëti tupao wasu cheTumpa pewarä. Kua tupao wasu noñono teeta Tumpa pewarä. Joko pe ore nduapɨta chupe mbaembae utimbo kawiete wae, jare jekuaeño noñonota mbɨyape uñeñono tee Tumpa pewarä. Opa ndimbowe jare kaaru yawe, jare opaete ara mbutuu pe, jare opaete yasɨpɨau pe, jare opaete yemɨmandúa tembiu pewa uwäe yawe, ore nduyukata nduapɨ numee mbaemɨmba reta Tumpa pewarä joko pe. Echa’ä jae oreokui ma ore Israel pewa reta jukuärái nduyapoñoi waerä,” jei chupe.

5“Jayawe che ayapokata aï tupao tuicha jare ikawiete wae oreTumpa pewarä, echa’ä jae imbaepuere tuichaete ko. Mbaetɨ ye ambɨe jae echa rami.” Jukuärái Salomón umbeuka mburuwicha wasu Hiram pe.