1 Samuel 8 - Bible

Israel pewa reta uipota imburuwicha wasurä

1Samuel ukuakuaaete ma yawe, jae umbɨjee taɨ reta Israel iñemoñaa reta imburuwicha retarä.

2Samuel taɨrɨpɨ jee Joel, jare ïruwe jee Abías. Jae reta iko mburuwicharä tëta wasu Beerseba jee wae pe.

3Erëi Samuel taɨ reta uyapo’ä ikawi wae tu uyapo wae rami. Jae reta uipotaete korepoti ramo, mbaetɨ uiporu kawi imbaepuere. Echa’ä kía ou yawe uñeapo waerä japicha re, Samuel taɨ reta umaeño jese umbɨepɨ wɨari waerä chupe reta omborɨ reta waerä.

4Jayawe opaete Israel itenondewa reta yuweru uwäe tëta wasu Ramá jee wae pe uyemɨngeta waerä Samuel ndiwe.

5Joko pe jei reta Samuel pe: “Mase, ndekuakuaaete ma ko, jare nderaɨ reta jeko ambɨe ye ndewi. Jayawe embɨjee orewe kía oremburuwicha wasurä kërái opaete ïru ɨwɨ pewa reta onoi wae rami,” jei reta chupe.

6Erëi jae reta jei yawe chupe, “Embɨjee orewe kía oremburuwicha wasurä,” jokua ikawi’ä Samuel pewarä. Jáeramo Samuel usɨrɨ chuwi reta jare oo uyerure waerä Tumpa pe jokua re.

7Jare Tumpa jei Samuel pe: “Iyapɨsakaño jese reta,” jei. “Nde’ä ko nererɨ̈ro ñonoï reta. Che etei ko chererɨ̈ro ñonoï reta, echa’ä uipota’ä reta ko che aï waerä jae reta imburuwicharä,” jei chupe.

8“Ɨwɨ Egipto wi anoe aru reta wiwe, jae reta jekuaeño uyerowa chewi jare ueka reta itumparaanga retarä,” jei. “Añawe jukuärái nde ndapo reta wi,” jei chupe.

9“Jayawe iyapɨsakaño jese reta, jare emaeño jese reta onoi waerä imburuwicha wasurä,” jei. “Erëitu emɨmbeu kawi chupe reta kërái ime ma imburuwicha wasurä yawe, jae täta rupi oyokuita reta,” jei Tumpa Samuel pe.

10Jayawe Samuel ou ye jokua ueka ñonoï imburuwicha wasurä wae reta pe jare umɨmbeu yuapɨ ye chupe reta opaete Tumpa jei wae.