Éxodo 32 - Bible

Tumparaanga waka raɨ iä

1Moisés ɨma ara rupi upɨta jokua ɨwɨtu wasu re. Jayawe Israel iñemoñaa reta jei iyupe: “Ndarau ma ou ye,” jei iyupe reta. Jáeramo jeta wae yuraa uyembatɨ reta Aarón oï wae pe jare jei reta chupe: “Mase, ekua iyapo yandewe yandetumparä yandereruwata waerä. Echa’ä jokua Moisés yandereru ɨwɨ Egipto wi wae, yaikuaa’ä mbae ra uasa chupe wae,” jei reta Aarón pe.

2Jayawe Aarón jei chupe reta: “Pemɨmbeu pëti pëti pembireko pe jare pesambiaɨ reta pe umbatɨ reta waerä opaete inamicha oro pewa, jare peru chewe,” jei chupe reta.

3Jáeramo opaete wae ueki reta inamicha oro pewa iyuwi jare ueru reta Aarón pe.

4Joko wi Aarón wɨraa opaete jokua namicha oro pewa reta jare umɨndɨkui tata pe. Jare upɨyere mbae waka raɨ echa wae jɨru jae uyapo wae pe. Jukuärái Aarón uyapo waka raɨ echa oro pewa. Jare Israel iñemoñaa reta uecha yawe jokua waka raɨraanga oro pewa, usapɨkai rewe jei reta: “¡Jokua ko jae yandetumpa yandereru ɨwɨ Egipto wi wae!” jei reta.

5Jare Aarón uikuaa yawe jae reta uyapo ñonoï wae, jayawe uyapo mbaerenda waka raɨ oro pewa jowai jare umɨmbeu chupe reta: “Kuriye yayapota arete yambutuicha waerä Tumpa jee,” jei chupe reta.

6Jayawe pɨarewe pe ndei köe mbowe upüa Israel iñemoñaa reta, jare ueru mbaemɨmba reta uyuka uapɨ umee waerä Tumpa pe umbutuicha reta waerä tëi Tumpa jee. Ueru reta wi ïruwe mbaemɨmba reta uyuka umee waerä chupe uñemɨïru reta waerä tëi jae ndiwe. Jayawe uwapɨ reta tumparaanga jowai ukaru jare ukau reta waerä. Joko wi upüa jare uyapo reta mbae kachi wae imara mbae rewe.

7Jayawe ɨwɨtu wasu re Tumpa jei Moisés pe: “¡Eweyɨ ye ekua ɨmambae! Echa’ä jokua nenoe ɨwɨ Egipto wi wae reta opa ma uyererukachi ñonoï,” jei chupe.

8“Ɨmambaete rupi iñakañɨ reta chiñee wi. Uyapoka ma iyupe reta itumparaangarä, waka raɨraanga ko. Jare umbɨadora ñonoï jese jare uyuka mbaemɨmba reta umee reta waerä chupe. Jare jei wi ñonoï reta: ‘Jokua ko jae yandetumpa ñanerenoe ɨwɨ Egipto wi wae,’ jei ñonoï reta,” jei chupe.

9“Aikuaa aï Israel iñemoñaa reta ipɨatäta wae reta ko.

10Jayawe emaeño cheré, echa’ä chepochɨete aï chupe reta jare aipota opa ambái reta. Joko wi jae reta ipepɨka pe ayapota nde jare niñemoñaa reta ndiwe pëti tëta wasu tuichaete wae,” jei Tumpa Moisés pe.

11Erëi Moisés uyerure Tumpa pe umbɨpɨakatu ye waerä, jare jei chupe: “CheTumpa ndikoño mái wae, Israel iñemoñaa reta ko jae ndiparawo wae reta. Opaete ore nduecha nembaepuerete rupi nde orerenoe ɨwɨ Egipto wi. ¿Maera pa ndepochɨete neï chupe reta?” jei.

12“Nde opa nembái reta yawe, jokua ɨwɨ Egipto pewa reta jeita kuärái: ‘Tumpa umbɨtawɨ rewe onoe wɨraa Israel iñemoñaa reta kua ɨwɨ Egipto wi uyuka reta waerä ɨwɨtu wasu pe opa umbái reta waerä ɨwɨ wi.’ Jukuärái jeita reta. Jáeramo embɨasa mii ndepochɨ chuwi reta. Awɨye mii nemandúa opata nembái ndiko wae re,” jei chupe.

13“Nemandúa mii jokua yemɨngeta nde ndiyapo ndewe uyeyokui wae reta Abraham, Isaac, jare Jacob ndiwe wae re. Nde etei ndere chupe reta kuärái: ‘Ambɨjetaeteta aï niñemoñaa reta yasɨtata reta jeta ye ye wae rami. Jare opaete kua ɨwɨ che jae ameeta aï pewe wae imeta piñemoñaa reta imaerä jaeño mái pewa,’ ndere chupe reta,” jei Moisés Tumpa pe.

14Jayawe Tumpa uiparareko reta jare uyapo’ä ma jae jei uyapota tëi iko wae.

15Joko wi Moisés uweyɨ ye ɨwɨtu wasu wi. Jare ueru jae ndiwe jokua mokui ita ipe kawi wae uyekuatía oï jese jokua payandepo mbaembae Tumpa jei wae. Tumpa iñee uyekuatía oï mokui rewe jowa re jare ikupe re wi.

16Jokua mokui ita ipe kawi wae Tumpa jembiapo etei ko. Jare jokua uyekuatía oï jese wae, Tumpa etei uikuatía jese.

17Joko wi Moisés jare Josué uweyɨ yureko reta yawe, Josué uyandu Israel iñemoñaa reta iñeeäta rewe usapɨkai reta wae. Jare jei Moisés pe: “Pëti ñeräro echa ayandu aï Israel iñemoñaa reta ñonoï wae pe,” jei.

18Erëi Moisés jei chupe: “Upurumɨamɨri wae reta usapɨkai uyerowia rewe wae’ä ko. Jare jamɨri wae reta uyao ipɨatɨtɨ rewe wae’ä ko wi. Jokua ko jae arete pe ñonoï wae reta itaerari,” jei chupe.

19Jayawe Moisés oya katu ou yawe jese reta, uecha waka raɨraanga jare Israel iñemoñaa reta upɨrae ñonoï wae. Jare Moisés pochɨete ramo, omombo ɨwɨ re jokua mokui ita ipe kawi wae reta. Jukuärái opa oyoka ɨwɨtu wasu iyɨpɨ pe.

20Jawoi pewa Moisés uipɨsɨ wɨraa jokua waka raɨraanga jare opa umɨndɨkui ye tata pe. Joko wi opa umungúi oro, jare ikuiikue opa umbɨyea ɨ pe, jare jouka Israel iñemoñaa reta pe.

(21-35Moisés jei opaete Israel iñemoñaa reta pe kuärái: “Tumpa reño wɨrowia oï wae reta, peyu kua pe che aï wae pe,” jei. Jayawe opaete Leví iñemoñaa reta yuweru ikotɨ. Jayawe Moisés jei chupe reta pëti pëti turaa ikɨsepuku uyuka waerä Israel iñemoñaa jeko kachi wae reta. Jayawe Leví iñemoñaa reta uyapo Moisés jei chupe reta wae rupi. Jáeramo Tumpa uyapo ikawi wae chupe reta iñee rupi. Joko wi Moisés uyupi oo ye ɨwɨtu wasu re uyemɨngeta ye waerä Tumpa ndiwe.)