Mateo 9 - Bible

Jesús umɨnguera pëti kuimbae ipuere mbae omɨ wae(Marcos 2.1-12; Lucas 5.17-26)

1Jayawe Jesús jare jemimboe reta ndiwe uyupi reta ye chalana pe yuraa reta ye waerä ɨpa wasu jowaicho kotɨ. Jare yuraa ma uwäe reta yawe jowaicho pe, joko wi yuraa reta jëta wasu raɨ pe.

2Jayawe amokue wae reta owoɨ ueru jupa rewe pëti kuimbae ipuere mbae omɨ wae Jesús oï wae pe. Jare Jesús kua uecha yawe, uikuaa jae reta wɨrowia kawi jese wae. Jáeramo jei kuimbae ipuere mbae omɨ wae pe: “Iñemɨatangätu, cheraɨ. Teko nenoi Tumpa kotɨ wae opa ma uyembái ndewi,” jei chupe.

3Jare joko pe ñonoï wi amokue kuimbae Moisés uikuatía wae re oporomboe wae reta. Jae reta uyemɨngeta ipɨa pe Jesús rewa: “Kua kuimbae uyapo ma mbae kachi wae. Echa’ä uyemɨngeta oï Tumpa rami,” jei reta ipɨa pe.

4Jayawe Jesús uikuaa chuwi reta ipɨayemɨngeta, jare jei chupe reta: “¿Maera pa piyemɨngeta peï mbae ikawi mbae wae pepɨa pe?” jei.

5“Che jae kua kuimbae pe, ‘Teko nenoi Tumpa kotɨ wae opa ma uyembái ndewi,’ jae chupe. Erëi ipotawe kía yawai’ä jokua jei waerä,” jei. “Yawaita ko ipotawe kía jei chupe waerä kuärái: ‘Epüa jare ewata.’ Echa’ä aramoi ukuera’ä yawe, jayawe imarata upɨta,” jei.

6“Jayawe tamɨnguera kua kuimbae perowake pikuaa waerä che kuimbaerä ayeyapo wae ime ko anoi wi mbaepuere kua ɨwɨ pe ambái waerä kía wi teko onoi Tumpa kotɨ wae,” jei Jesús chupe reta.

Jayawe Jesús jei kuimbae ipuere mbae omɨ wae pe: “Epüa, jare eupi nderupa, jare ekua nerëta pe,” jei chupe.

7Jayawe kuimbae upüa jare oë oo jëta kotɨ.

8Jare joko pe ñonoï wae reta uecha yawe jokua mbaepuere tuicha wae Tumpa umee Jesús pe wae, umbutuicha reta Tumpa jee uipɨu rewe.

Jesús ueni pëti kuimbae Mateo jee wae iko waerä jemimboerä(Marcos 2.13-17; Lucas 5.27-32)

9Jare Jesús oo joko wi yawe, uecha pëti kuimbae Mateo jee wae uwapɨ oï kiape umbɨepɨ reta mburuwicha pewarä okowara wae pe. Echa’ä Mateo ko jae pëti wae mburuwicha pewarä okowara wae. Jayawe Jesús jei chupe: “Eyu che ndiwe ndiko waerä cheremimboerä,” jei chupe. Jayawe Mateo upüa jare oo Jesús ndiwe.

10Jare kaaru katu ma yawe, Mateo uparea Jesús jare jemimboe reta pe ukaru waerä jae jëta pe. Jare joko pe ukaru ñonoï wi ïru kuimbae reta mburuwicha pewarä okowara wae jare jeko kachi wae reta wi.

11Jayawe amokue fariseo reta kua uecha yawe, jei reta Jesús jemimboe reta pe: “Mase, pemboea ukaru oï okowara wae reta ndiwe jare ïru jeko kachi wae reta ndiwe. ¿Kërái pa jokua añawe?” jei reta.

12Jesús kua uyandu yawe, jei umbɨjaanga rewe fariseo reta pe: “Ikowe katu wae reta ueka’ä iyupe upurupɨano wae. Imbaerasɨ wae retaño ko ueka,” jei.

13“Tumpa jei iñeerɨru pe: ‘Che aipotaete ko perapicha piparareko waerä mbaemɨmba peru pemee chewe wae wi.’Oseas 6.6 Jukuärái jei. Jare pe reta ikawi ko piyemboe waerä mbae ra uipota jokua jei. Echa’ä che ayu’ä ko aeni waerä jupi wae reta. Ayu ko aeni waerä jeko kachi wae reta,” jei chupe reta.

Maera Jesús jemimboe reta oñono tee’ä ara reta ukaru mbae waerä(Marcos 2.18-22; Lucas 5.33-39)

14Jayawe Juan upurumbɨsakambu wae jemimboe reta yuweru jei Jesús pe: “Ore noñono teeñoi ara reta ndukaru mbae waerä numbɨyerowia waerä Tumpa. Jare fariseo reta jukuärái uyapo wi. ¿Maera pa nderemimboe reta uyapo’ä wi jukuärái?” jei reta chupe.

15Jayawe Jesús jei chupe reta umbɨjaanga rewe: “Uparea reta yawe menda pe, ¿ipɨatɨtɨta yerá joko pe ñonoï wae reta kuimbae umenda wae jae reta ndiwe oï rambuewe? Ndarau etei,” jei chupe reta. “Erëi outa uwäe ara kuimbae umenda wae uyereraa waerä chuwi reta. Jayawe ramo jae reta oñono teeta ara reta ukaru mbae waerä,” jei chupe reta.

16Jare Jesús jei wi chupe reta umbɨjaanga rewe: “Yaikuaa ñaï ikawi’ä ko yamboya waerä temimonde indechi wae mbaemboyaka ipɨau wae pɨpe. Echa’ä jukuärái yayapo yawe, mbaemboyaka ipɨau wae umɨatata temimonde indechi wae, jare temimonde jeieteta osoro,” jei chupe reta.

17“Jae nunga wi kiawe umbɨru’ä vino ipɨau wae vino jɨru wakapi pewa indechikue pe. Echa’ä jukuärái uyapo yawe jare vino jayasɨ yawe, omondorota jɨru jare opata uyepɨyere. Jayawe vino jare jɨru ndarau ma ikawi,” jei chupe reta. “Jáeramo yambɨru vino ipɨau wae jɨru ipɨau wae pe. Jare jukuärái yawe, jɨru osorota’ä jare vino uyepɨyereta’ä wi,” jei. “Jukuäraiete wi che aporomboe wae ipɨau wae ko,” jei Jesús chupe reta.

Jesús umbɨjekowe ye pëti kuñatái(Marcos 5.21-43; Lucas 8.40-56)

18Jare Jesús uyemɨngeta iko rambuewe, ou uwäe pëti mburuwicha jare uñeñono itawa re Jesús jowai, jare jei chupe: “Cherayɨ mii iyei mii ramo umano chewi. Erëi ya mii iñono ndepo jese ikowe ye waerä,” jei chupe.

19Jayawe Jesús jare jemimboe reta ndiwe upüa yuraa mburuwicha ndiwe.

20Jare yuraa yureko reta rambuewe, ou Jesús jaɨkue kotɨ wi pëti kuña doce año ma uiporara oï mbaerasɨ tuwɨ wasu pewa. Jae uñatai Jesús jemimonde jembeɨ pe.

21Echa’ä jae jei iyupe: “Jemimonde mii yepe añatai yawe, akuerata ko,” jei iyupe.

22Jayawe Jesús uyerowa umae jaɨkue kotɨ jare uecha kuña joko pe oï. Jayawe jei chupe: “Cherayɨ, iñemɨatangätu. Ndekuera ma ko cheré nderowia ramo,” jei chupe. Jare jupiwoiño kuña ukuera.

23Jare joko wi jekuae yuraa reta mburuwicha jëta kotɨ. Jare yuraa ma uwäe yawe, Jesús uike o pe jare uecha jeta wae reta joko pe ñonoï. Jare uyemimbɨ wae reta umɨñee ñonoï jemimbɨ mbɨatɨtɨ pewa. Jare jeta wae reta jäse uyao ñonoï.

24Jayawe Jesús jei chupe reta: “Peë oka pe. Kua kuñatái umano’ä oï. Okeño ko oï,” jei chupe reta. Erëi jae reta kua ñee uyandu yawe, oyoyai reta Jesús.

25Jayawe Jesús omoë reta oka pe. Jare opa ma oë oo reta yawe, Jesús uike kuñatái joo pe jare uipɨsɨ kuñatái ipo pe. ¡Jare kuñatái upüa woi!

26Jayawe jeräkua opaete jokua ɨwɨ rupi Jesús uyapo wae.

Jesús umɨnguera mokui kuimbae jesa mbae wae reta

27Jayawe Jesús jare jemimboe reta ndiwe yuraa joko wi. Jare yuraa yureko reta rambuewe, mokui kuimbae jesa mbae wae reta yuraa Jesús jaɨkue. Jare jei reta chupe usapɨkai rewe: “Jesús, David iñemoñaa pewa, oreparareko mii,” jei reta.

28Erëi Jesús uyemboɨ'ä oo uwäe rewa tëta pe. Jare uike ma yawe o pe, uike wi jaɨkue jokua jesa mbae wae reta. Jayawe Jesús upɨrandu chupe reta: “¿Perowia pa che chepuere pumɨmae wae?” jei chupe reta.

“Ndorowia, cheYa,” jei reta chupe.

29Jayawe Jesús uyawɨkɨ chuwi reta jesa, jare jei chupe reta: “Jayawe tuyeyapo pewe kërái perowia cheré wae rupi,” jei.

30¡Jare jupiwoiño mokui rewe ipuere umae kawi! Jayawe Jesús jei chupe reta: “Awɨye pemiäri kía pe awe kua mbae ayapo pewe wae re,” jei tëi chupe reta.

31Erëi jae reta yuraa umɨmbeu opaete jokua ɨwɨ rupi Jesús uyapo chupe reta wae re.

Jesús umɨnguera kuimbae ipuere mbaei uyemɨngeta wae

32Jayawe Jesús jare jemimboe reta ndiwe opa yuraa joko wi. Jare yuraa yureko reta rambuewe, amokue wae reta ueru Jesús oï wae pe pëti kuimbae ipuere mbaei uyemɨngeta wae. Kua kuimbae parawete ipuere’ä uyemɨngeta, echa’ä aña uyembɨiya jese ramo.

33Jayawe Jesús omoë chuwi aña jare kuimbae umbɨpɨ uyemɨngeta. Jare jeta joko pe ñonoï wae reta ipɨakañɨete upɨta, jare jei reta iyupe: “Mbaetɨi nduecha kua nunga ɨwɨ Israel pe,” jei reta.

34Erëi fariseo reta jei: “Añawasu imbaepuere rupi ko kua kuimbae omoë aña reta uyembɨiya jese wae reta wi,” jei tëi reta.

Jesús jei jeta oï yambaewɨro waerä

35Jare Jesús oo opaete tëta wasu reta rupi jare tëta wasu raɨ reta rupi, jare oporomboe tupao reta rupi. Jae jekuaeño oporomboe, jare umɨmbeu ñee ikawi wae kërái uyembɨpɨ ma Tumpa imbaepuere mburuwicha wasu pewa kua ɨwɨ pe. Jare jae umɨnguera wi imbaerasɨ wae reta ipotawe mbaerasɨ wi.

36Jare uecha yawe jeta wae reta yuweru ñonoï ikotɨ, tuicha rupi uiparareko umae jese reta. Echa’ä jae reta ipɨa’ä ñonoï jeta mbaembae re jare mbaetɨ wi kía omborɨ reta waerä. Jae reta owecha mbaetɨ iyandarekoa onoi wae reta rami ko.

37Jayawe Jesús jei jemimboe reta pe umbɨjaanga rewe: “Jetaete oï yambaewɨro waerä, erëi mbowɨete oï umbaewɨro wae reta.

38Jáeramo piyerure koo iYa pe ombou waerä umbaewɨro wae reta,” jei chupe reta umbɨjaanga rewe.