1Filisteo isɨndaro reta yuweru uñeräro reta waerä Israel isɨndaro reta ndiwe ɨwɨtu wasu Gilboa jee wae pe. Jáeramo jeta Israel isɨndaro reta opa osi reta chuwi, erëi jeta umano reta wi jokua ɨwɨtu wasu rupi.
2Joko wi filisteo reta opa oñowa Saúl jare taɨ reta. Jare uyuka reta Saúl taɨ Jonatán, Abinadab, jare Malquisúa jee wae reta.
3Jare jeiete yuweru reta Saúl jare isɨndaro reta kotɨ. Jawoi pewa filisteo isɨndaro uɨ pe uñeräro wae reta uñɨwo oñono reta Saúl jare umbɨpere reta jasɨ rupi.
4Jayawe Saúl jei isɨndaro uruwata iyopiaka chupe wae pe: “Eki ndekɨsepuku cheyuka woi, awɨye waerä jokua wɨrowia mbae Tumpa re wae reta cheyoyai uyuwanga katu cheré ndei cheyuka reta mbowe,” jei chupe. Erëi isɨndaro uipota’ä, ukɨye ramo. Jáeramo Saúl ueki ikɨsepuku jare uyepɨaka jese. Jukuärái jaei uyeyuka.
5Jare Saúl isɨndaro uecha umano ma yawe, ueki wi ikɨsepuku jare uyepɨaka jese. Jare jukuärái umano Saúl ndiwe.
6Jayawe jokua ara etei umano Saúl ndiwe mbapɨ taɨ reta, jare isɨndaro uruwata iyopiaka chupe wae, jare opaete isɨndaro reta wi.
Who We AreWhat We EelieveWhat We Do
2025 by iamachristian.org,Inc All rights reserved.
