Efesios 3 - Bible

Tumpa uikuaaka ma yandewe ipɨayemɨngeta yanderepɨta wae

1-2Pe reta judío mbae piko wae, jeräkua ma ko pewe kërái Jesucristo umee chewe mbarawɨkɨ ikawi wae amɨmbeu waerä pewe ñee Tumpa ipɨakawi rewa. Jayawe amɨesäka pewe kërái Cristo rupi yandepuere ñanoi tekowe opa mbae wae. Jare jukuärái ayeyokui Jesucristo pe ramo, peresorɨru pe aï.

3Pikuaa ma ko aipo peï kërái Tumpa etei uikuaaka ma chewe ipɨayemɨngeta Cristo rewa jae tenonde yawe uikuaaka’ä etei wae. Jare kua rewa aikuatía ma pewe michi kua tupapire pe.

4Jayawe pemɨngeta yawe kua tupapire, pikuaa kawita ko kërái aikuaa aï Tumpa ipɨayemɨngeta Cristo rewa.

5Kua ipɨayemɨngeta tenonde yawe jae uikuaaka’ä kía pe awe. Erëi añawe Espíritu Santo rupi jae uikuaaka ma orewe. Ore ko jae Jesús oremondo jae jee re wae jare ñee Tumpa wi etei ou wae numɨmbeu wae reta.

6Jare Tumpa ipɨayemɨngeta ko kua: Judío jare judío mbae Cristo re wɨrowia wae reta jae ma ko Tumpa taɨ jare tayɨ reta. Jae reta ñonoï ma ko pëti ramiño Cristo re jare oyowakeño onoita imaerä opaete mbaembae ikawiete wae Tumpa umeeta oï taɨ reta pe wae.

7Jukuärái ko Tumpa ipɨayemɨngeta. Jare yepe tëi tenonde yawe arowia’ä aiko Cristo re, jesewe Tumpa ipɨakawi tuicha chekotɨ. Echa’ä jae cheparawo ayeyokui waerä chupe imbaepuere rupi amɨmbeu waerä kua ñee ikawi wae ïru wae reta pe.

8¡Tuichaete ko Tumpa ipɨakawi yandekotɨ! Mase, che ko jae opaete Cristo re wɨrowia wae reta wi taɨkuewaete, echa’ä tenonde yawe ayembowaicho aiko Cristo kotɨ. Erëi Tumpa ipɨakawiete rupi umee chewe amɨmbeu waerä judío mbae wae reta pe kërái Tumpa umeeta oï ipotawe kía Cristo re wɨrowia wae pe jeta mbaembae ikawiete ye opa mbae wae.

9Jare umee wi chewe amɨesäka kawi waerä opaete wae pe kërái jae uyapo oï ipɨayemɨngeta wae. Echa’ä Tumpa opaete mbaembae uyapo wiwe uikuaaka’ä ipɨayemɨngeta kía pe awe. Erëi añawe jae uikuaaka ma yandewe.

10-11Jukuärái Tumpa ipɨayemɨngeta ikoño mái wae uyeyapo ma oï yandeYa Jesucristo rupi. Jare Tumpa uipota wi opaete araɨwa reta uecha waerä jokua mbaembae jae uyapo wae Cristo re yarowia wae reta pe. Jare jukuärái araɨwa reta jare araɨwa itenondewa retawe uikuaa kërái tuichaete ye ko Tumpa iyarakuaa wae.

12Jayawe Cristo re yarowia ramo, pëti ramiño ñaï jese. Jáeramo yandepuere ñañemɨïru kawi Tumpa ndiwe yakɨye mbae rewe jare yandepɨawiwe rewe.

13¡Ikawiete ye ko kua mbaembae Tumpa uyapo ma yandewe wae! Jáeramo yepe tëi che peresorɨru pe aiporara aï, erëi awɨye kua pikuaa wae re piyembɨakɨ. Cheyukenda reta che amɨmbeu pewe Cristo rewa ramo. Erëi ayerowia aï Tumpa taɨ retarä ma peï ramo.

Pablo uikuaaka yandewe kërái Cristo yanderauete

14Chepɨa pe ayemɨngeta yawe Tumpa ipɨayemɨngeta ikawiete wae re, añeñono chetawa re yandeRu Tumpa jowai ayerure waerä chupe peré. Jae ko yandeYa Jesucristo Tu.

15Jare jae ko opaete Cristo re wɨrowia wae reta ara pe ma ñonoï wae jare imeño ɨwɨ pe ñonoï wae reta Tu. Jare jae ko opaete mbaembae iyapoa.

16¡Tuichaete ko yandeRu Tumpa imbaepuere jupiete wae!

Jare aeka aï Tumpa pe umɨmɨräta waerä pepɨa Espíritu Santo rupi.

17Jare aeka aï chupe wi piñemɨatangätu perowia katu waerä Cristo re, jukuärái Cristo jekuaeño oï waerä pepɨa pe ipɨawiwe rewe. Jukuärái rupi pepuere piyerau päwe añetete rewe. Jáeramo piñemɨmɨrätata peï Tumpa re pëti temitɨ kɨpe japo oï wae rami.

18Jare jukuärái pepuere pikuaa kawi opaete Cristo re wɨrowia wae reta ndiwe kërái Cristo yanderau wae tuichaete ye ko, echa’ä opa tɨnee oï ara jare ɨwɨ.

19Mbaetɨ kiawe ipuere uikuaa opaete Cristo yanderau wae rewa, echa’ä tuichaete ye ko. Jáeramo aeka aï Tumpa pe jekuaeño pembɨpɨarakuaa waerä jesewa, jare jukuärái peya katu waerä Tumpa jeko jupi wae re. Jukuärái ayerure aï chupe peré.

20¡Tuyembutuichaka Tumpa jee! Echa’ä jae imbaepuere tuichaete wae rupi uparawɨkɨ oï yandepɨa pe. Jare jae ipuere uyapo jetaete mbaembae yaeka chupe wae wi jare jetaete mbaembae yandepɨayemɨngeta ueka wae wi.

21Opaete yande ñaï pëti ramiño Jesucristo re wae reta yambutuicha Tumpa jee, jae ipɨakawiete yandewe ramo. ¡Tuyembutuichaka Tumpa jee jaeño mái pewa! Jukuärái tuiko.