2 Corintios 11 - Bible

Pablo umbɨarakuaa reta ‘Cristo chembou’ jeiraanga wae reta rewa

1Chemaerä, iyarakuaa mbae wae retaño imiäri iyé uyembutuicha rewe. Erëi aipota michi pewa mii pepɨawasu chewe, che wi ayemɨngeta waerä jukuärái.

2Echa’ä che pumbɨete aï, jare jokua ou Tumpa wi. Echa’ä che puyapɨkatu Cristo pewarä piko waerä jembirekorä rami. Jare che aipota pumee Cristo pe pëti kuñatái oroke’ä etei kuimbae wae rami.

3Erëi che ayembɨpɨa’ä aï peré. Aramoi pemaeñota piyembɨtawɨka kërái Eva uyembɨtawɨka jokua mboi ikatuete iyapu wae pe, jare jukuärái pikota’ä ma pekɨrëɨ ngatu rewe Cristo pewarä.

4Echa’ä che aikuaa aï ou yawe kía ambɨe ye umɨmbeu pewe Cristo rewa wae, pe reta pere’ä ko mbae awe jare pemaeño ko jese. Jukuärái piyapo peï, yepe tëi jae umɨmbeu Cristo rewa ambɨe ye ore numɨmbeu pewe wae wi, jare yepe tëi jae ou’ä Espíritu Santo imbaepuere pe. Añetete ko jae ou ambɨe espíritu imbaepuere pe, jare jae iñee ambɨe ye ko ñee ikawi wae pe reta perowia ma jese wae wi.

5Jae reta jei tëi iyupe jae reta ko Cristo ombou wae tenondewaete reta. Erëi ¿añetete ra jae reta ɨwate ñonoï chewi? Arowia’ä.

6Che aramoi chiñee ngatu’ä parawete chemiäri waerä. Erëi aikuaa kawi mbae re ayemɨngeta aï wae. Jare pe reta pikuaa kawi ma jokua rewa, echa’ä ɨma rupi jare opa kërái rái rupi ore nduikuaaka ma pewe jokua orearakuaa ime nonoi wae.

7Che amɨmbeu yawe pewe ñee ikawi wae Tumpa wi ou wae, akowara’ä etei pewe mbae re awe. Jayawe amokue wae reta chererɨ̈ro. Jae reta jei tëi: “Opaete jokua ikawi oporomboe wae reta okowara ko,” jei reta. Erëi añetete akowara’ä añemee añemɨmichi rewe pe reta piyembutuichaka waerä. ¿Mbae kachi yerá jokua?

8Che aiko rambuewe pepɨ, ïru hermano reta ikotɨ̈atɨ̈a rupi uyembatɨ wae chemborɨ pe reta pepuere waerä piyekou che aporomboe wae re jepɨ mbae rewe.

9Amo wese uata chewe mbae. Erëi che aeka’ä pewe mbae awe, echa’ä yanderɨwɨ reta Macedonia pewa ueru chewe mbae uata chewe wae. Jare jokua re che aiko awɨye waerä piyembɨpɨa’ä cheré. Jare jukuärái jekuaeño aipota aiko.

10Kua re ayerowiaete aï, jare chemiärita jese opaete ɨwɨ Acaya rupi. Jukuärái che jae aï Cristo jowake. Jare kua wi ndarau kía ipuere chemɨkïi.

11¿Maera ra aeka’ä pewe yemborɨ? ¿Mbaetɨ ra puau ramo aramoi? ¡Tumpa uikuaa puau ko!

12Pëti wese awe aporomboe yawe akowara’ä pewe. Jare ndaraúi ayapo jukuärái chepuere waerä amɨkïi jokua uyembutuicha rewe uipota tëi oremboyowake wae reta. Echa’ä aikuaa jae reta ndarau oporomboe jepɨ mbae.

13Kua nunga reta jei tëi iyupe: “Cristo chembou.” Erëi upurumbɨtawɨ wae reta ko, echa’ä Cristo ombou’ä reta.

14Erëi awɨye yandepɨakañɨ kua re. Echa’ä Satanás etei ipuere uyekuaaka pëti araɨwa ikawi wae Tumpa wi ou wae echa rami.

15Jáeramo yanembɨpɨakañɨ rape’ä ko Satanás pe uyeyokui wae reta uyekuaaka yawe jupi wae nunga. Erëi taɨkue rupi Tumpa uiporarakata oï chupe reta iparawɨkɨ ikawi mbae wae re.

Pablo jeta uiporara Cristo pe uyeyokui rambuewe

16Che tae ye pewe kua: Awɨye kía torowia che ko jae pëti iyarakuaa mbae wae. Erëi perowia yawe cheré jukuärái, pepɨawasu mii chewe michi pewa. Chemiärita ndipo aipo chiyé jayawe pëti iyarakuaa mbae wae rami.

17Kua chemiärita chiyé wae, mbaetɨ ko jae yandeYa umbɨyerowia wae. Echa’ä ayemɨngetata aï iyarakuaa mbae wae rami jare che jae wae rupiño.

18-19Jukuärái uyapo ñonoï ïru wae reta, jare pe reta pemaeño ko jese piyerowia rewe. Jayawe che wi chemiärita chiyé iyarakuaa mbae wae rami.

Pe Corinto pe piko wae reta pearakuaa katu wae rami pemae tëi piyé.

20Echa’ä ime yawe kía uipota täta rupi peokui wae, ani ime yawe kía uipota uyekou peré wae ani uyuwanga katu peré wae, pe reta pemaeño ko jese. Jae ramiño wi ime yawe kía uipota uyererowia katu pewi wae jare perowapete wae, pe reta pemaeño ko jese.

21Ore parawete reta nduyapo’ä jokua nunga mbaembae. Jáeramo ïru wae reta jei tëi orewe orepɨräta’ä noï. Tome tuyemɨngeta pochɨño reta jukuärái. Tapɨta jayawe ñemɨmaraka pe.

Erëi jokua mbaembae re ïru wae reta uyembutuicha rewe imiäri wae, che wi chemiärita jese reta ayembutuicha rewe, yepe tëi iyarakuaa mbae retaño ko jukuärái uyemɨngeta.

22Jae reta jei tëi: “Ore ko jae hebreo reta.” Jayawe che jukuärái jae wi. Che ko jae wi hebreo. “Ore ko jae Israel pewa reta,” jei reta tëi. Che ko jae wi Israel pewa. “Ore ko jae Abraham iñemoñaa pewa reta,” jei reta tëi. Che jae nunga wi.

23“Ore nduyeyokui Cristo pe,” jei reta tëi. Che jeiete ayeyokui Cristo pe chuwi reta. Añetete kua pe ayemɨngeta ye aï iyarakuaa mbae wae reta uyemɨngeta rami. Che ayapo jetaete mbarawɨkɨ chuwi reta Tumpa pewarä. Jare che ayapɨraa reta peresorɨru pe jare ñenupa pe – chepuere’ä etei opa kawi aipapa. Jeta wese amano seri.

24Pandepo wese ma judío reta uiporaraka chewe chembɨpiu reta. Jare opa wese chenupa yawe, uiporu cheré treinta y nueve wese chikote.

25Mbapɨ wese uiporaraka chewe ɨwɨra pɨpe. Pëti wese chapi reta ita pe cheyuka waerä tëi. Mbapɨ wese aiporara chalana wasu opa uwapi orewi wae, jare pëti wese apɨta parawete mar mbɨte pe pëti pɨare jare pëti ara.

26Jetaete awata opaete kerupi. Jare kerupi rupi awata wae rupi jekuaeño ime yembɨawái chewe. Echa’ä mbowɨ wese ɨ chereraa seri parawete. Jare kiape awata wae rupi imonda wae reta ukuatɨ̈ro cheré. Jeta cherëtáɨwa reta jare judío mbae wae reta wi jekuaeño chemumburu ñonoï tëi mbae ikawi mbae wae uyapo chewe waerä. Amano seri ma tëta wasu reta rupi, jare ikotɨ̈a rupi, jare mar rupi. Jare jeta wɨrowiaraanga Cristo re wae reta oyowaicho ñonoï che ndiwe.

27Täta aparawɨkɨ aiporara rewe. Jeta wese ma aiporara topeɨ, yembaɨ, ɨwe, jare roɨ. Jare jeta wese uata chewe temimonde.

28Jare kuaño’ä ko. Opa ara rupi ayembɨpɨa’ä aï opaete Cristo re wɨrowia wae reta kerupi rupi uyembatɨ ñonoï wae re.

29Ime yawe kía ipɨräta’ä oï Tumpa re wae, che wi aiporara aï. Jare ime yawe kía japicha pe uyawɨka Tumpa kotɨ wae, che chepochɨ aï jokua re.

30Pipota yawe che jekuaeño ayembutuicha waerä, jayawe che ayembutuichata chepɨräta mbae wae re.

31Tumpa uikuaa chapu’ä etei aï wae. Jae ko yandeYa Jesucristo Tu, jare jae jee tuyembutuichaka jaeño mái pewa.

32Tëta wasu Damasco pe aiko yawe, jokua tëta wasu imburuwicha uipota tëi chepɨsɨka. Jae ko jokua kuimbae mburuwicha wasu Aretas jee wae umbɨjee Damasco pewa reta imburuwicharä wae. Jae oyokui sɨndaro reta cheraäroka waerä tëi opaete tëta wasu jöke rupi.

33Erëi cheïru reta chembɨweyɨ parawete pëti kanasta wasu pe tëta wasu ikësea iventana rupi. Jare jukuärái ayepe chuwi reta. Kuärái chemiäri pewe pikuaa waerä kërái chepɨräta mbae wae ko che parawete.