Jueces 2 - Bible

6Jayawe Josué omondo Israel iñemoñaa reta yureko waerä iɨwɨ pe. Jacob doce taɨ wɨreko wae pëti pëti taɨ iñemoñaa reta pe uñemee iɨwɨrä.

7Joko wiwe uyeyokui kawi reta Tumpa pe Josué imeño iko rambuewe. Jare Josué umano ma yawe, jekuaeño uyeyokui kawi reta Tumpa pe imeño yureko rambuewe itenondewa Josué iyaweiwa reta. Jae reta uecha mbaembae ikawiete Tumpa uyapo wae ndei uwäe reta mbowe jokua ɨwɨ ikawiete wae pe.

8Josué ko jae kuimbae Nun jee wae taɨ, jare uyeyokui kawi Tumpa pe wae ko. Jare Josué ime wɨreko pëti chiëto payandepo año yawe, umano.

9Jayawe oñotɨ reta Josué jetekue iɨwɨ pei, tëta wasu raɨ Timnat-sera jee wae pe. Jokua tëta wasu oï ɨwɨtu wasu Gaas jee wae ɨwate kotɨ, ɨwɨ Efraín jee wae pe.

10Joko wiwe ndewe ndewe rupi umano opaete Josué iyaweiwa reta. Erëi jae reta isambiaɨ reta ukuakuaa ma yawe, uikuaa’ä reta Tumpa jare opa iñakañɨ reta jokua mbaembae tuicha Tumpa uyapo tamɨkue reta pe wae wi.

11Jáeramo uyawɨ reta Tumpa kotɨ kuärái: Jae reta umbɨadora ɨwɨ Canaán pewa itumpa reta re.

12-13Opa uyerowa reta Tumpa ikoño mái wae wi – jae ko Tumpa onoe ueru tamɨkue reta ɨwɨ Egipto wi wae. Jare uyapo reta ïru ɨwɨ pewa reta uyapo wae rami, echa’ä jae reta umbɨpɨ umbɨadora tumparaanga reta re – jae ko Baal jare Astarot jee wae. Israel pewa reta uyapo iyupe jokua tumparaanga reta, jare uñeñono reta ɨwɨ re uipɨu rewe tumparaanga reta jowai. Jukuärái ombopochɨka reta ikotɨ Tumpa ikoño mái wae.

14Jayawe Tumpa pochɨete Israel iñemoñaa reta kotɨ. Jáeramo umaeño yuweru waerä jeta imonda wae reta oñomi wɨraa waerä imbaembae chuwi reta. Umaeño wi jowaicho iyɨke rupi ñonoï wae reta umɨamɨri waerä Israel iñemoñaa reta. Echa’ä Tumpa uepɨ'ä ma reta.

15Jare opa wese Israel iñemoñaa reta yuraa uñeräro waerä yawe jowaicho reta ndiwe, jekuaeño jamɨri reta, echa’ä Tumpa uñeräro ikotɨ reta ramo. Tenonde yawe, Tumpa etei umɨmbeu chupe reta jae reta uyerowa chuwi yawe, uyeyapota iko chupe reta jokua mbaembae ikawi mbae wae. Añawe uyeyapo ma chupe reta opaete Tumpa jei wae rupi. Jayawe Israel iñemoñaa reta uiporaraete reta.

16Jokua año reta rupi, Tumpa amo amo rupi umee Israel iñemoñaa reta pe imburuwicharä uepɨ reta waerä jowaicho reta wi.

17Jesewe uyapɨsaka’ä reta imburuwicha reta iñee re. Kërái amokue kuña umenda wae ueya ime iko waerä ambɨe kuimbae ndiwe wae reta rami, jukuärái Israel iñemoñaa reta jekuaeño ueya Tumpa ueka waerä itumparaanga retarä jare umbɨadora reta jese.

Kua Israel iñemoñaa reta mbaetɨ omomoe jeta tamɨkue jeko, echa’ä tamɨkue reta uyapoñoi ñee reta Tumpa umee Moisés pe wae rupi. Jayawe ɨmambaeño rupi Israel iñemoñaa reta uyerowa yewɨ Tumpa wi.

18Jáeramo Tumpa umaeño jowaicho reta re uiporaraka waerä chupe reta. Erëi Israel iñemoñaa reta tuicha uiporara yawe jowaicho reta ipo pe, Tumpa uiparareko umae ye jese reta, jare umupüa pëti mburuwicha jae reta ipɨte wi uepɨ reta waerä. Jare jukuärái Tumpa uyapo yawe, jae iko mburuwicha ndiwe omborɨ waerä jokua mburuwicha imeño jekowe iko rambuewe.

19Erëi mburuwicha umano ma yawe, Israel iñemoñaa reta jekuaeño uyapo yewɨ kachi wae jare ueka reta itumparaanga retarä umbɨadora reta waerä jese. Uipɨu rewe uñeñono reta ɨwɨ re itumparaanga reta jowai. Jae reta jeko pochɨete ye uyeyapo tamɨkue reta wi. Uyembɨpɨatäta reta, jare uipota’ä ueya reta jeko kachi wae.

20Jáeramo Tumpa pochɨete ye Israel iñemoñaa reta kotɨ, jare jei iyupe: “Jekuaeño kua reta wɨrɨ̈ro chiñee amee tamɨkue reta pe wae jare uyapɨsaka’ä ñeño reta jese.

21Jayawe che amoëta’ä ma chuwi reta pëti awe jowaicho tëta wasu pewa reta Josué ueya wae ndei umano mbowe.

22Kua tëta wasu pewa reta rupi ayapota uyekuaa waerä Israel iñemoñaa reta uyapota ra che jae wae rupi tamɨkue reta uyapo wae rami, ani uyapota’ä ra reta,” jei Tumpa iyupe.

23Jáeramo Israel iñemoñaa reta jaeramo uike yawe ɨwɨ Canaán pe, Tumpa omoë'ä jupiwoi chuwi reta jokua jowaicho tëta wasu pewa reta, jare umaeño’ä Josué re umɨamɨri reta waerä.