1-2Joko wi Israel iñemoñaa reta oë yuraa ɨwɨ Refidim jee wae wi. Jayawe ɨwɨ Egipto wi oë reta wiwe mbapɨ yasɨ ma uasa yawe, yuraa uwäe reta ɨwɨtini wasu Sinaí jee wae pe. Joko pe umbɨyemboɨ reta jëta wakapi pewa ɨwɨtu wasu iyɨpɨ rupi.
3Jayawe Moisés uyupi ɨwɨtu wasu re oo owäiti waerä Tumpa. Jare Tumpa ueni Moisés ɨwɨtu wasu re jare jei chupe: “Ere Israel iñemoñaa reta pe – jae ko Jacob iñemoñaa reta pe – kuärái:
4‘Pe reta pecha ma opaete mbae ayapo wae ɨwɨ Egipto pewa reta kotɨ. Kërái wɨrakee wasu uyandareko imembɨ reta re rami jare ikupe re uruwewe wɨraa imembɨ reta rami, jukuärái che ponoe pueru che aï wae pe.
5Jayawe pe reta jekuaeño piyapo peï yawe opaete che jae pewe wae rupi, pe reta pikota chemaerä. Yepe tëi opaete ɨwɨ chembae ko, jare opaete ɨwɨ pe oï wae chembae ko wi, jesewe pe reta pikota che puparawo ïru wae reta ipɨte wi wae.
6Poñono teeta chemaerä, pe reta, jare opaete ɨwɨ pewa reta ipɨte wi puparawo chesacerdote retarä.’ Jukuärái ere chupe reta,” jei Tumpa Moisés pe.
7Jayawe Tumpa opa uyemɨngeta yawe Moisés ndiwe, Moisés uweyɨ ɨwɨtu wasu wi. Jare ueni umbatɨka Israel iñemoñaa itenondewa reta, jare umɨmbeu yuapɨ ye chupe reta opaete Tumpa jei chupe wae.
8Jayawe opaete Tumpa jei wae jaekawi Israel iñemoñaa reta pe, jare opaete pëti ramiño jei reta Moisés pe: “¡Opaete Tumpa jei wae nduyapota ko!” jei reta. Jayawe Moisés umbeu Tumpa pe jae reta iñee.
9-11Joko wi Tumpa jei Moisés pe: “Mase, ayuta nde neï wae pe amapɨ̈tu pɨ̈tumimbiete wae ipɨte pe,” jei. “Jayawe amoë chiñee ndewe yawe, opaete wae uyanduta ñonoï. Jukuärái jekuaeño wɨrowiata reta nderé,” jei chupe.
Jare Moisés umbeu ye Tumpa pe Israel iñemoñaa reta jei wae.
Jayawe Tumpa jei wi Moisés pe: “Ekua ye emɨmbeu Israel iñemoñaa reta pe, añawe jare kuriye tuñeñono tee reta chemaerä cheree umbutuicha reta waerä. Tumbaeputuka reta jare tuyeyapɨkatu reta koéramo pewarä. Echa’ä koéramo che, peTumpa aikoño mái wae, aweyɨta aï kua ɨwɨtu wasu re opaete Israel iñemoñaa reta jowake,” jei chupe.
12“Piyapo ɨwɨtu wasu iyɨpɨ rupi jaangarä uikuaaka waerä Israel iñemoñaa reta pe awɨye waerä uasa,” jei. “Emɨmbeu wi chupe reta kuärái: ‘¡Piyandareko kawi piyé! Awɨye etei peya ɨwɨtu wasu re. Awɨye awe wi peya uyemɨaanga oï wae re. Echa’ä ipotawe kía jokua uasa yawe, umanota ko.
13Piyapita ko ita pe ani uɨ pe piyuka waerä ipotawe kuimbae, kuña, sambiaɨ, ani mbaemɨmba. Awɨyeta ko pipɨsɨ. Jare awɨye etei peya ɨwɨtu wasu re ndei temimbɨ wasu uyendu mbowe. Jare piyandu yawe temimbɨ wasu täta rupi uyendu oï yawe, jayawe ramo peya katu ɨwɨtu wasu uyemɨaanga oï wae re.’ Jukuärái emɨmbeu chupe reta,” jei Tumpa Moisés pe.
14-15Joko wi Moisés uweyɨ ye ou ɨwɨtu wasu wi Israel iñemoñaa reta kotɨ, jare jei chupe reta: “Piyeyapɨkatu kawi koéramo pewarä,” jei. “Jokua ara pembutuichata Tumpa jee. Jayawe pembaeputuka, jare jokua ara uwäe rewa awɨye mbae tuyapo kuimbae jembireko ndiwe,” jei chupe reta. Jayawe Israel iñemoñaa reta uyapo Moisés jei wae rupi.
16Jare joko wi mbapɨ ara pe ndimbowe yawe, aramoiño täta rupi jɨapu ara jare uwera pɨi. Jare ou amapɨ̈tu pɨ̈tumimbiete wae ɨwɨtu wasu re. Jare uyendu temimbɨ wasu tätaete rupi. Jáeramo opaete Israel iñemoñaa reta ukɨyete ramo opa urɨrɨ reta.
17Jayawe Moisés wɨraa reta ɨwɨtu wasu kotɨ uñeñowäiti reta waerä Tumpa ndiwe. Jare uyemboɨ reta ɨwɨtu wasu iyɨpɨ pe.
18Jare ɨwɨtu wasu Sinaí opa tɨnee tatäti pe, echa’ä Tumpa uweyɨ jese tata jendɨ rewe ramo. Jare tatäti tuicha upüa ara kotɨ tatäti tata tuichaete wae wi upüa wae echa rami. Jare ɨwɨtu wasu tätaete uñemɨtɨmo.
19Jekuaeño jeiete temimbɨ wasu täta uyendu. Jayawe Moisés uyemɨngeta Tumpa pe, jare Tumpa omoë ye iñee chupe. Jare opaete wae reta uyandu iñee, echa’ä Tumpa omoë iñee ara jɨapu rami.
20Jayawe Tumpa uweyɨ ɨwɨtu wasu iyapɨte ɨwatete wae re. Jare joko wi jei Moisés pe: “Iyupe eyu chekotɨ,” jei. Jayawe Moisés uyupi ye oo Tumpa oï wae pe.
21Jayawe Tumpa jei Moisés pe: “Ekua ye emɨmbeu Israel iñemoñaa reta pe awɨye uasa reta waerä ɨwɨtu wasu uyemɨaanga oï wae yuweru umae reta waerä cheré. Echa’ä jukuärái uyapo reta yawe, jeta wae reta umanota,” jei.
22“Jae ramiño wi sacerdote reta, ndei oya mbowe cheré, imeta ko uyeyapɨkatu kawi rani reta chekotɨ awɨye waerä che aiporaraka chupe reta,” jei Tumpa Moisés pe.
23Jayawe Moisés jei Tumpa pe: “Israel iñemoñaa reta ipuereta’ä oya ɨwɨtu wasu re, echa’ä nde ndere ma orewe noñono tee waerä nemaerä ɨwɨtu wasu jare noñono waerä jaanga ɨwɨtu wasu iyɨpɨ rupi,” jei chupe.
24Jayawe Tumpa jei Moisés pe: “Ekua ye Israel iñemoñaa reta kotɨ jare eru nde ndiwe nderɨkeɨ Aarón. Erëi sacerdote reta jare ïruwe reta awɨye tuasa ɨwɨtu wasu uyemɨaanga oï wae yuweru reta waerä chekotɨ. Jukuärái uyapo reta yawe, aiporarakata aï chupe reta,” jei Tumpa Moisés pe.
25Jayawe Tumpa opa ma uyemɨngeta yawe Moisés ndiwe, Moisés uweyɨ ye ɨwɨtu wasu wi jare umɨmbeu yuapɨ ye Israel iñemoñaa reta pe opaete Tumpa jei chupe wae.
Who We AreWhat We EelieveWhat We Do
2025 by iamachristian.org,Inc All rights reserved.
