Judas 1 - Bible

Judas wɨraaka saludo

1Pe yandeRu Tumpa perau jare pereni wae reta, yandeYa Jesucristo uyandareko kawi oï peré. Che ko jae Jacobo tɨwɨ Judas jee wae aikuatía aï pewe kua tupapire. Che wi ko jae Jesucristo pe ayeyokui wae.

2Tumpa jekuaeño tipɨakawi pewe jare tuyapo pewe piko waerä pepɨakatu rewe jare tuicha pepuruau rewe.

Oporomboeraanga wae reta rewa

3Cheïru puau mii wae reta, che aipota tëi aikuatía aiko pewe jokua tekowe opa mbae wae ime ñanoi wae re. Erëi aikuaa ime ye ambɨe mbae re imeta ko aikuatía pewe. Tumpa ñaneñono tee ma jae imaerä jare uikuaaka ma yandewe mbaembae re yarowia waerä. Kua mbaembae jaeño mái pewa añetete ko jare ndarau etei uyepepɨka. Jáeramo aipota pumɨkɨrëɨ jekuaeño piyapo waerä pepuere wae rupi uyemɨmbeu waerä jupi rupi jokua mbaembae.

4Kua re aikuatía aï pewe, echa’ä amokue wae reta uyembatɨ ñonoï pe reta ndiwe añetete wae nunga pe reta pikuaa mbae rewe. Jae reta jei tëi pewe: “Tumpa ipɨakawi oï yandewe. Jáeramo yandepuere yaiko yande yae wae rupiño,” jei reta. Jare jukuärái jae reta uyapo ñonoï opaño mbaembae kachi wae. Erëi kua jae reta uyapo wae rupi wɨrɨ̈ro ko ñonoï Jesucristo, yepe tëi jaeño ko jae yandeYa jare yaneMburuwicha wasu imbaepuerete wae. Jae reta uipɨu’ä etei Tumpa wi. Jare kërái uyekuatiaño mái ko oï Tumpa iñeerɨru pe wae, Tumpa uiporarakata oï chupe reta tuicha rupi.

5Yanemandúa kawi ñaï, arakae yawe yandeYa uepɨ jare onoe ueru Israel iñemoñaa reta ɨwɨ Egipto wi. Erëi taɨkue rupi opa umbái jae reta ipɨte wi wɨrowia mbae jese wae reta. Che aikuaa pe reta pikuaa kawi ma kua rewa, erëi jaeño aipota pumɨmandúa ye jese.

6Jare yanemandúa wi arakae mbae uasa amokue araɨwa reta pe. Yepe tëi Tumpa umee chupe reta mbaepuere ara pe, erëi uwäe ara jae reta uipota’ä jokua mbaepuere jare opa ueya reta jenda ara pewa. Jáeramo Tumpa omombo reta kiape pɨ̈tumimbiete oï wae pe, jare joko pe jae reta uñeñapɨ̈ti ñonoï ara taɨkuewa uwäe rewa. Jare jokua ara uwäe yawe, uyemboɨta reta Tumpa jowai Tumpa uiporaraka waerä chupe reta jaeño mái pewa.

7Jare jae nunga wi yanemandúa jokua tëta wasu reta Sodoma jare Gomorra jare iyɨpɨ rupi yureko wae reta re. Jae reta jokua araɨwa reta rami uipota’ä yureko kërái Tumpa uyapo reta wae rupi. Echa’ä uyapo reta awasa opa kërái rái jare kuimbae reta uipotaete jae yepái uyereroke reta. Jáeramo Tumpa tuicha rupi uiporaraka chupe reta tata pe. Jare jukuärái Tumpa uikuaaka opaete wae pe awɨye waerä mbae kachi yayapo jae reta rami. Echa’ä jokua nunga mbae kachi uyapo wae reta uiporarata tata owe mbae wae pe.

8Jukuärái wi jokua oporomboeraanga wae reta pepɨte pe ñonoï wae uikuaa tëi opaete kua mbaembae reta, erëi mbae’ä chupe reta. Jae reta uyereraa ñonoï upau wae rupiño, jare jukuärái uñererükumewa reta awasa rupi jare wɨrɨ̈ro reta yandeYa imbaepuere. Jare jokuaño’ä uyapo reta. Jae nunga wi uyemɨngeta kachi reta mbaepuere onoi wae reta kotɨ,

9yepe tëi araɨwa retawe uyemɨngeta’ä jukuärái. Echa’ä arakae araɨwa tenondewa Miguel jee wae uyeaka iko yawe Añawasu ndiwe Moisés jetekue re, uipɨu umbɨjeko waerä Añawasu pochɨ rewe. Jaeño jei chupe: “YandeYa tuñeengata ndewe,” jei chupe.

10Erëitu kua kuimbae reta uyemɨngeta kachi jeta mbaembae rewa, yepe tëi jae reta uikuaa kawi’ä jokua mbaembae rewa. Jare jokua michi mii jae reta uikuaa tëi wae, jokuawe urukachi reta. Jae reta yureko wɨraeño ipotawe rupi mbaemɨmba iko wɨraeño wae rami. Jare kua mbaembae jae reta uyapo wae rupi etei ou oï chupe reta Tumpa iarasɨ wasu.

11¡Kërái etei Tumpa uiporarakata oï chupe reta! Echa’ä jae reta omomoe ñonoï Caín jeko. Jare korepoti uipotaete reta ramo, uyapo reta ñonoï wi kuimbae Balaam jee wae uyapo rami. Echa’ä jae reta umɨkɨrëɨ ïru wae reta uyapo waerä mbae kachi wae jukuärái umɨngana waerä jese reta korepoti. Jae nunga wi jae reta ko kuimbae Coré jee wae rami, echa’ä uyapo’ä reta Tumpa jei wae rupi. Jáeramo opata umano reta Coré umano rami.

12Jae nunga wi pe reta piyembatɨ yawe pekaru päwe waerä, kua kuimbae reta yuweru ukaru pe reta ndiwe uipɨu mbae rewe. Kua pëti ñemɨmaraka ko. Jae reta ko owecha iyandarekoa ikawi mbae wae reta rami, echa’ä jaeño uyandareko reta iyé. Jae reta ko jae amapɨ̈tu ɨwɨtu opa wɨraa wae rami jare okɨ'ä, echa’ä jae reta ikawi’ä maeräwe. Jare jukuärái wi jae reta ko jae temitɨ iata tëi, erëi ia’ä wae rami. Ani yandepuere yae jae reta ko jae jokua temitɨ uyemondoro wae rami, echa’ä ndarau etei mbae ikawi wae uyekuaa jese reta.

13Jae nunga wi kua kuimbae reta ko jae ɨaparoa wasu tɨrɨye rami. Echa’ä jae reta umaeño iyé uyereraaka waerä kotɨ kotɨ jete uipota wae rupi, jare jukuärái jekuaeño uyapo reta mbaembae ñemɨmaraka pewa. Kua nunga reta re ndarau ikawi kiawe wɨrowia waerä, echa’ä jae reta ko jae yasɨtata uwata wae reta rami. Jáeramo Tumpa uyapɨkatu ma chupe reta kiape pɨ̈tumimbiete oï wae pe joko pe omombo reta waerä jaeño mái pewa.

14Yanemandúa ñaï wi kuimbae Enoc jee wae re. Jae ko Adán jumɨmino chiu wese yuapɨ ye wae. Jae arakae umɨmbeu kërái mbae uasata oï oporomboeraanga wae reta pe kuärái: “Mase. YandeYa outa oï jetaete ye oñono tee jae imaerä wae reta ndiwe.

15Jare jayawe opaete wae uyemboɨta ñonoï jae jowai jae jei waerä jae reta jeko re. Jare yandeYa umbɨjekota opaete chuwi uipɨu’ä wae reta mbaembae kachi uyapo reta wae re jare ñee kachi jei reta yandeYa kotɨ wae re.” Jukuärái umɨmbeu Enoc.

16Kua oporomboeraanga wae reta opa mbaembae re iyengeta reta jare umbɨjeko reta japicha. Jare uipota yureko reta jae reta jei wae rupiño uyembɨyerowia waeräño. Uyemɨngeta reta uyembutuicha rewe. Jare jae reta jekuaeño iñee kawi uyemɨngeta reta japicha ndiwe umbɨyerowia waerä, jukuärái japicha umee waerä chupe reta mbaembae.

Judas umbɨarakuaa reta

17Erëi pe cheïru puau mii wae reta, pemandúa yandeYa Jesucristo jemimboe tenondewaete reta umɨmbeu pewe wae re.

18Echa’ä jae reta jei pewe: “Kua ara taɨkuewa rupi imeta oporoyoyai wae reta. Jae reta yurekota mbae kachi waeño uipota uyapo wae rupi.”

19Jare pe reta pikuaa kía reta ko jae wae, echa’ä jae reta ko opa umbɨyao tee tee onoi Cristo re wɨrowia wae reta oporomboe kachi wae rupi. Jae reta yureko jei wae rupiño jare mbaetɨ onoi reta Espíritu Santo.

20Erëi pe cheïru puau mii wae reta, jekuaeño piñemɨmɨräta Tumpa iñee jupi wae rupi perowia jese wae. Jare jekuaeño piyerure Tumpa pe Espíritu Santo jei wae rupi.

21Pe reta pikuaa peï yandeYa Jesucristo umeeta oï pewe tekowe opa mbae wae peparareko ramo. Jare añawe jokua peäro peï rambuewe, jekuaeño pemandúa kërái Tumpa perau wae re.

22Amokue pepɨte pe ñonoï wae reta ndeiño ipɨräta Tumpa re. Jayawe pembɨpɨakatu reta jare piparareko reta wi.

23Jare ïru wae reta imeño wɨrowia’ä ñonoï Cristo re. Jayawe pemɨmbeu kawi chupe reta Cristo rewa, tata wi kía pepɨ wae rami. Jare ïru wae reta re pemae piparareko rewe. Erëi piyandareko kawi piyé pipɨu rewe awɨye waerä pereko kachi jae reta rami. Ikawi ko perɨ̈ro waerä chuwi jemimonde awe umɨngɨa jeko kachi pe wae.

Yambutuicha Tumpa jee

24Añawe, ¡Tumpa jeeño yambutuicha! Echa’ä jaeño ipuere ñanemɨmɨräta awɨye waerä yapia jape wi. Jare jaeño ipuere yanembɨyemboɨ jae jowai yandereko mbae rewe jare tuicha yerowia rewe.

25Jaeño ko jae Tumpa. Jaeño ko yanderepɨ ma yandeYa Jesucristo rupi. Jaeño tonoi mbaepuere, mɨräta, jare yembɨadora añawe jare jaeño mái pewa. Jukuärái tuiko.