Apocalipsis 1 - Bible

Kua tupapire rewa

1-2Kua tupapire pe Juan uikuaaka yandewe jokua mbaembae reta uasata oï ɨmambaeño wae. YandeRu Tumpa etei uikuaaka kua mbaembae Jesucristo pe jae uikuaaka yuapɨ ye waerä yandewe Juan rupi. Juan uyeyokui kawi Jesucristo pe. Jayawe Jesucristo ombou pëti araɨwa Juan pe, jare jokua araɨwa uechaka chupe kua mbaembae uyeyapota oï wae. Jare añawe Juan uikuaaka oï yandewe, yande Cristo pe yayeyokui wae reta pe, opaete mbaembae jae uecha wae. Kua ñee Tumpa iñee etei ko, jare jokua etei ko Jesucristo uikuaaka.

3Kua ñee umɨngeta wae reta uyekouete ñonoï. Jare jukuärái wi kua ñee re uyapɨsaka wae reta. Echa’ä uyaro ma oï kua aikuaaka aï pewe wae uyeyapo waerä.

Juan wɨraaka saludo

4-5Pe Cristo re perowia wae reta chiu tëta wasu ɨwɨ Asia pewa pe piyembatɨ wae, che araaka aï pewe kua saludo. Che ko jae Juan kua aikuatía aï wae. Tumpa iyɨpɨ wiwe ikoño mái, jare jekuaeño oï, jare jekuaeñota oï. Jae jekuaeño tipɨakawi pewe jare tuyapo pewe piko waerä pepɨakatu rewe. Jare jukuärái wi tuyapo pewe Jesucristo jare Espíritu Santo. Kua Tumpa iEspíritu chiu wese ye jupi jare Tumpa iwapɨa jowai oï.

Jesucristo ko jae jekuaeño uikuaaka añetete wae. Jae ko opaete umanokue wae reta ikowe ye wae itenondewaete. Jare jae ko opaete ɨwɨ pewa mburuwicha wasu reta imburuwicha yuapɨ ye. Yande reta jeta ma yayawɨ Tumpa kotɨ. Erëi Jesucristo yanderau jare upɨyere juwɨ opa oyoe waerä yandewi yandereko.

6Jare jokuaño’ä uyapo. Jae yandapo wi mburuwicha wasu retarä jare sacerdote retarä jukuärái yayeyokui waerä Tu pe – jae ko yandeRu Tumpa pe. Jesucristo jee tuyembutuichaka, jare jaeño tonoi mbaepuere tuichaete wae jaeño mái pewa. Jukuärái tuiko.

7¡Mase, ko jae ma ou amapɨ̈tu re! Jare opaete wae uechata ñonoï. Uikutuka wae retawe uechata wi. Jare opaete kua ɨwɨ pewa reta tuicha ipɨatɨtɨta jae jeko pewa. Añetete jukuärái tuiko.

8Jare yandeYa Tumpa jei: “Che ko jae Alfa jare Omega jee wae,” jei. “Che ko jae iyɨpɨete wae jare iyapɨete wae. Che ko jae jekuaeño oï wae, jare iyɨpɨ wiwe ikoño mái wae, jare jaeño mái pewa ikota wae. Che ko jae opaete mbaepuere anoi wae,” jei.

Juan imiäri kërái jae uecha Jesucristo

9Che perɨkeɨ Juan, che aiporara aï wi pe reta piporara peï rami. Jukuärái ñotái ko yaiporara Jesús re yarowia jeko pewa ramo. Erëi yandepuere ñamɨawäta yandepɨawasu rewe, echa’ä pëti ramiño ñaï Jesús re ramo. Jare yande ñaïta wi jae ndiwe jae oï ma yawe opaete wae imburuwicha wasurä jaeño mái pewa.

Che aï pëti pereso ɨwɨ ɨ mbɨte pe oï wae Patmos jee wae pe. Chereru reta kua pe Tumpa iñee amɨmbeu ramo jare Jesús rewa amɨeräkua ramo.

10Jare aipota aikuaaka pewe kua: Pëti domingo ara pe Espíritu Santo uechaka chewe amokue mbaembae. Jae chembɨpau wae echa. Jukuärái aramoiño ayandu chekupe kotɨ pëti ñee täta uyemɨngeta wae temimbɨ wasu uñee wae rami.

11Jare jokua ñee jei chewe: “Che ko jae Alfa jare Omega jee wae. Che ko jae tenondewaete wae jare taɨkuewaete wae,” jei.

Jayawe jei chewe: “Ikuatía pëti tupapire pe ndechata neï wae. Joko wi eraaka kuri jokua tupapire ndikuatía wae ɨwɨ Asia pe kiape cheré wɨrowia wae reta uyembatɨ ñonoï wae pe. Eraaka tëta wasu Éfeso pe, Esmirna pe, Pérgamo pe, Tiatira pe, Sardis pe, Filadelfia pe, jare Laodicea pe,” jei chewe.

12Jayawe ayerowa amae aecha waerä kía chemɨngeta oï wae. Jare amae yawe, aecha chiu mechero iwapɨka oro pewa.

13Jare jokua chiu mechero iwapɨka reta ipɨte pe aecha kía jae chawaa kuimbaerä uyeyapo wae. Jae omonde temimonde puku wae uwäe ipɨ rupi. Jare ipɨtía rupi onoi tumbɨkuaa oro pewa.

14Jare ía tïasɨ owecharawe tïasɨ wae rami. Jare kërái roɨ tïasɨ, jukuärái wi tïasɨ ía. Jare jesa uyekuaa kërái tata jendɨ wae rami.

15Jare ipɨ uwerasɨ jiero bronce yambɨyepiro wae rami. Jare jae uyemɨngeta yawe, iñee täta uyendu ɨaparoa wasu jɨapu wae rami.

16Jare ipo iyakata kotɨ onoi chiu yasɨtata reta. Jare iyuru wi oë kɨsepuku jaimbeyowai wae. Jare jowa jembipeasɨete warasɨ ara mbɨte yawe jembipeasɨ wae rami.

17Jare aecha yawe, aa parawete ɨwɨ re jae jowai jare apɨta amano wae rami. Jayawe jae oñono ipo iyakata kotɨwa cheré, jare jei chewe: “Awɨye ekɨye. Che ko jae tenondewaete wae jare taɨkuewaete wae,” jei.

18“Che ko jae ikoño mái wae. Amano, erëi mase, añawe aiko jaeño mái pewa. Jare che ime anoi mbaepuere mano re jare umanokue wae reta jenda re wi,” jei.

19“Añawe ikuatía kua mbaembae ndecha wae. Jare che aipota ndikuatía waerä wi ïru mbaembae reta añawe aechakata aï ndewe wae – jae ko mbaembae añawe uyeyapo oï wae jare taɨkue rupi uyeyapota oï kuri wae,” jei chewe.

20“Taikuaaka ndewe mbae re ko uyembɨjaanga kua chiu yasɨtata ndecha chepo cheakata kotɨ anoi wae. Jare taikuaaka ndewe wi mbae re ko uyembɨjaanga kua chiu mechero iwapɨka oro pewa,” jei. “Kua chiu yasɨtata reta uyembɨjaanga ñonoï chiu araɨwa reta re. Jokua chiu araɨwa reta uyandareko ñonoï jokua cheré wɨrowia wae reta re uyembatɨ ñonoï jokua chiu tëta wasu reta rupi wae. Jare kua chiu mechero iwapɨka reta uyembɨjaanga ñonoï jokua cheré wɨrowia wae reta re jokua chiu tëta wasu reta rupi uyembatɨ ñonoï wae,” jei chewe.