2 Crónicas 5 - Bible

1Jayawe Salomón opa uyapoka tupao wasu Tumpa pewarä. Joko wi Salomón ueruruka opaete mbaembae tu David oñono tee Tumpa pewarä wae – jae ko mbaembae korepoti tïi wae pewa, jare oro, jare ïru mbaembae reta. Jare opaete kua mbaembae Salomón oñonoka amokue o rupi tupao wasu iyɨke rupi ñonoï wae japɨpe.

Salomón wɨraaka Tumpa arakae jei wae yemɨmandúa jɨru tupao wasu pe

2-3Tumpa arakae jei wae yemɨmandúa jɨru oï tëta wasu Sion jee wae pe. Jokua tëta wasu jee wi ko David Jëta Wasu. Erëi Salomón uipota wɨraaka oñono waerä jendarä ipɨau wae pe tupao wasu japɨpe. Jayawe uwäe yawe ara yemɨmandúa tembiu pewa opa año rupi chiu yasɨ wae, jetaete Israel pewa reta yuweru uwäe tëta wasu Jerusalén pe mburuwicha wasu Salomón jowai.

Jayawe Salomón umbatɨka opaete Israel pewa itenondewa reta jare pëti pëti tëtara itenondewa Israel pewa. Jae reta ko uerurukata Tumpa arakae jei wae yemɨmandúa jɨru tupao wasu pe.

4-5Joko wi tenondewa reta yuraa uwäe yawe Tumpa arakae jei wae yemɨmandúa jɨru oï wae pe, amokue Leví iñemoñaa reta jare sacerdote reta ueupi wɨraa jɨru tupao wasu pe. Ueupi wɨraa reta wi jokua tupao tenondewa wɨraañoise jae reta ndiwe wae, jare opaete mbaembae jokua tupao pewa uñeñono tee Tumpa pewarä wae reta wi.

6Jokua rambuewe, Salomón jare jeta Israel pewa reta jae ndiwe ñonoï wae yuraa reta Tumpa arakae jei wae yemɨmandúa jɨru jenonde kotɨ. Jare yuraa reta rambuewe, uyuka jeta owecha jare weye reta umee waerä Tumpa pe. Jare kiawe ipuere’ä uipapa mbaemɨmba reta uyuka reta wae, echa’ä jetaete ye ramo.

7Joko wi sacerdote reta wɨraa uruwäe Tumpa arakae jei wae yemɨmandúa jɨru tupao wasu pe. Jare oñono reta jendarä ipɨau wae pe – jae ko o jupiete ye wae tupao wasu japɨpete oï wae pe. Joko pe oñono reta jɨru mokui araɨwa kerubín echa wae oro pewa ipepo íɨwɨ pe.

8Jokua araɨwa kerubín echa wae ipepo umbɨyasoi Tumpa arakae jei wae yemɨmandúa jɨru jare iɨwɨra sɨmi puku wae reta.

9Iɨwɨra sɨmi wae reta puku wae ko; jáeramo uyekuaa ɨwɨra iyapɨyapɨ o jupiete ye wae wi koiño etei o jupi wae wi. Erëi mbaetɨ uyekuaa tupao wasu joka wi. Jare joko wiwe upɨta joko pe.

10Jare Tumpa arakae jei wae yemɨmandúa jɨru japɨpe oï jaeño jokua mokui ita ipe kawi wae Moisés upi wae ɨwɨtu wasu Sinaí pe iko rambuewe. Joko pe iko reta rambuewe, Tumpa uyapo iyemɨngeta ikawi wae Israel iñemoñaa reta ndiwe jaeramo oë reta ɨwɨ Egipto wi yawe.

11Jayawe sacerdote reta oñono ma yawe Tumpa arakae jei wae yemɨmandúa jɨru jenda pe, oë reta tupao wasu joka pe. Jokua ara opaete sacerdote reta uyeyapɨkatu ma uyapo waerä iparawɨkɨ sacerdote pewa, yepe tëi jeta jae reta uparawɨkɨta’ä iko jokua ara.

12Jare tupao wasu joka rupi, mbaerenda iyɨke warasɨ oë wae kotɨ ñonoï Leví iñemoñaa ukäta wae reta, jare umaembopu jare uyemimbɨ wae reta. Jae reta ko Asaf, jare Hemán, jare Jedutún jee wae reta, jare jëtara kuimbae reta wi. Uyemonde reta asoya lino pewa, jare ombopu ñonoï reta mbae uyembopu wae jiero pewa, jare arpa, jare ngitara echa reta. Jae reta ndiwe ñonoï 120 sacerdote umɨñee temimbɨ wasu wae reta.

13Jare umɨñee temimbɨ wasu reta yawe jare ukäta reta yawe, uyendu pëti wae rami. Jukuärái umbutuicha reta Tumpa jee jare umee reta chupe yasurupái.

Jare temimbɨ wasu umɨñee iko reta rambuewe, jare uyembopu wae jiero pewa jare ïru uyembopu wae reta ombopu iko reta rambuewe, ukäta wae reta ukäta kuärái: “¡YandeTumpa ipɨakawiete yandewe! ¡Jae jekuaeño yandepararekota!” Jukuärái ukäta reta.

Jayawe aramoiño amapɨ̈tu opa tɨnee tupao wasu.

14Jare jokua amapɨ̈tu jeko pewa sacerdote reta ipuere yewɨ'ä uike reta tupao wasu japɨpe, echa’ä opa tɨnee Tumpa imbaepuere jupiete wae pe.