Éxodo 25 - Bible

Mbaembae umee reta tupao uyapo waerä

1Jare Tumpa jei Moisés pe kuärái:

2“Emɨmbeu opaete Israel iñemoñaa reta pe umee reta waerä chewe mbaembae ime onoi wae wi ayapoka waerä tupao chemaerä,” jei. “Ipotawe ipɨakɨrëɨ rewe tueru ndewe mbaembae,” jei.

3“Tueru reta ndewe chemaerä kuärái: mbaembae oro pewa, jare korepoti tïi wae pewa, jare jiero bronce pewa,” jei.

4“Tueru reta wi asoyarä ikawi wae jowɨ wae, jare mborao wae, jare pɨ̈tasɨ wae, jare kapura jawuku wae jawe asoyarä,” jei.

5“Tueru reta wi owecha kuimbae ipirekue umɨpɨ̈ta ma wae, jare mbaemɨmba ipirekue ipu kawi wae,” jei. “Jare tueru reta wi ɨwɨra acacia jee wae.

6Jare tueru reta wi olivo iaceite mechero pewarä, jare mbaembae utimbo kawiete wae uyea aceite ndiwe uyepichɨ reta pɨpe waerä. Tueru reta wi mbae uapɨ yawe utimbo kawiete waerä,” jei.

7“Tueru reta wi ita raɨ raɨ ónice jee wae, jare ïru ita raɨ reta ipöraete wae uñeñono waerä sacerdote tenondewaete jemimonde iyaramboete pewa re jare ipɨtía yopiaka re. Jukuärái tueru reta ndewe chemaerä,” jei.

8“Jokua mbaembae pewa iyapoka chewe tupao che aï waerä pɨpe pepɨte pe. Iyapoka pepuere waerä pembɨyemboɨ yawái mbae jare peki ye peraa pe reta ndiwe,” jei.

9“Ndiyapokata ko kua tupao, jare opaete mbaerenda reta, jare tembiporu reta tupao pewa kërái che jae ndewe wae rupi etei,” jei Tumpa Moisés pe.

Tumpa arakae jei wae yemɨmandúa jɨru

10Tumpa jei wi Moisés pe: “Iyapoka wi pëti jɨru ɨwɨra acacia pewa. Ndiyapokata ko jɨru kuärái: pëti metro payandepo centímetro puku wae, jare sesenta y cinco centímetro ipɨwasu wae, jare sesenta y cinco centímetro ɨwate wae. Jukuärái ndiyapokata,” jei.

11“Jare opa iñowaka jokua jɨru japɨpe rupi jare ikupe rupi wi oro pɨpe. Iyapoka wi jɨru opaete iyɨke rupi jembeɨrä ipöra wae oro pewa.

12Iyapoka wi oro pewa oñono waerä irundɨ iyɨkeyɨke pe jɨru inambirä,” jei.

13“Iyapoka wi mokui ɨwɨra puku jare sɨmi wae reta ɨwɨra acacia pewa jare opa wi iñowaka oro pɨpe.

14Joko wi esɨ̈roka jɨru inambi rupi jokua mokui ɨwɨra pɨpe peupi peraa waerä,” jei.

15“Nesɨ̈roka ma yawe, tupɨta joko pe. Awɨye peki ye ɨwɨra puku jare sɨmi wae reta jɨru inambi wi,” jei.

16“Che ameeta aï ndewe chiñee uyekuatiata oï mokui ita ipe kawi wae re. Jare niñonota ko jokua jɨru japɨpe,” jei.

17“Iyapoka wi jɨru iyapetekarä oro pewa. Ndiyapokata ko kuärái: pëti metro payandepo centímetro puku wae, jare sesenta y cinco centímetro ipɨwasu wae. Jukuärái ndiyapokata,” jei.

18“Jɨru iyapeteka wiño iyapoka martiyo pe iyapeteka iyapɨyapɨ pe mokui araɨwa reta echa rami ipepo onoi wae, kerubín jee wae reta echa.

19Jukuärái jɨru iyapeteka jare jokua mokui kerubín echa rami wae uyeyapota ko pëti wae wiño. Pëti kerubín echa oïta jɨru iyapeteka iáramo iyapɨyapɨ pe.

20Ndiyapokata ko mokui rewe jokua kerubín echa rami wae oyowai ñonoï, jare mokui rewe umae ñonoï ɨwɨ kotɨ jɨru iyapeteka re. Jare ipepo upi umbɨyasoi ñonoï jokua yapeteka,” jei.

21“Jare opa ma ndiyapoka yawe, iñono jɨru pe chiñee uyekuatía oï mokui ita ipe kawi wae re. Jare joko wi iyapete kawi jɨru iyapeteka pe,” jei.

22“Jare jɨru iyapeteka iáramo ayekuaata ndewe puparareko rewe jokua mokui kerubín echa ipäu rupi,” jei. “Jare joko pe añeñowäitita nde ndiwe jekuaeño, jare aikuaakata ndewe opaete nemɨmbeuta ko Israel iñemoñaa reta pe wae,” jei Tumpa Moisés pe.

Mbaerenda mbɨyape uñeñono tee Tumpa pewarä wae oñono jese wae

23Tumpa jei wi Moisés pe: “Iyapoka wi pëti mbaerenda ɨwɨra acacia pewa,” jei. “Ndiyapokata ko mbaerenda kuärái: noventa centímetro puku wae, jare cuarenta y cinco centímetro ipɨwasu wae, jare sesenta y cinco centímetro ɨwate wae. Jukuärái ndiyapokata,” jei.

24“Jare opa iñowaka jokua mbaerenda oro pɨpe. Iyapoka wi mbaerenda opaete iyɨke rupi jembeɨrä ipöra wae oro pewa,” jei.

25“Embɨyuapɨka wi mbaerenda iáramo opaete iyɨke rupi chiu centímetro ɨwate wae, jare iyapoka yuapɨka ïru jembeɨrä, jare iñowaka oro pɨpe,” jei.

26-28“Iyapoka wi oro pewa oñono waerä irundɨ ipɨta itiäkua re mbaerenda inambirä mbaerenda jembeɨ íɨwɨ pe. Jokoropi pesɨ̈rokata mokui ɨwɨra puku jare sɨmi wae reta peupi peraa waerä,” jei. “Jokua mokui ɨwɨra tuiko ɨwɨra acacia pewa, jare iñowaka oro pɨpe,” jei.

29“Iyapoka wi karúa reta jare copa reta, opaete oro pewa. Jare piñonota pɨpe mbaembae peruta peï wae pepɨyere waerä cherowai.

30Jayawe jekuaeño toï cherowai mbaerenda re mbɨyape uñeñono tee chemaerä wae,” jei Tumpa Moisés pe.

Mechero ikawi wae oro pewa

31Tumpa jei wi Moisés pe: “Ndiyapokata wi martiyo pɨpe mechero oro pewa. Jukuärái wi iyapoka iwapɨka, itɨmaka, icopa reta, jare mbaepotɨ echa wae reta. Pëti wae wiño iyapoka oro pewa,” jei.

(32-40Mbaembae kërái uyapo reta waerä jokua mechero rewa.)