2 Reyes 17 - Bible

Israel imburuwicha wasu Oseas jee wae rewa

1Judá pewa reta imburuwicha wasu Acaz jee wae doce año ma iko yawe mburuwicha wasurä, kuimbae Oseas jee wae umbɨpɨ iko Israel pewa reta imburuwicha wasurä. Oseas tu ko jae Ela jee wae. Jayawe chau año rupi Oseas iko tëta wasu Samaria jee wae pe jare ime wɨreko mbaepuere Israel pewa reta re.

2Jare mburuwicha wasu Oseas uyawɨ Tumpa kotɨ, erëi uyawɨete’ä amokue ïru Israel pewa reta imburuwicha wasukue uyawɨ reta wae rami.

3Joko wi mburuwicha wasu ɨwɨ Asiria pewa, Salmanasar jee wae, wɨraa isɨndaro reta uñeräro waerä ɨwɨ Israel pewa reta ndiwe jare opa umɨamɨri reta. Jáeramo Oseas uyeyapo Salmanasar pe uyeyokui waerä, jare imeta ko umee chupe opa año rupi jeta korepoti.

4Erëi pëti año Oseas omondo wɨari iñee uruwata wae ɨwɨ Egipto imburuwicha wasu So jee wae pe ueka waerä yemborɨ. Jare umee yewɨ'ä ma korepoti Asiria pewa reta imburuwicha wasu pe. Jayawe Salmanasar uikuaa yawe jokua rewa, omondo woi uipɨsɨka Oseas jare umɨingeka peresorɨru pe.

Ɨwɨ Asiria pewa reta opa umɨamɨri Israel pewa reta

5Joko wi ɨwɨ Asiria pewa mburuwicha wasu wɨraa jae ndiwe opaete isɨndaro reta uñeräro waerä ɨwɨ Israel pewa reta ndiwe uyembɨiya waerä jese reta. Jare opa oñowa reta tëta wasu Samaria kiawe oë mbae waerä. Joko pe upɨta uäro reta mbapɨ año rupi.

6Jayawe Oseas chau año ma iko mburuwicha wasurä yawe, jokua año etei mburuwicha wasu Asiria pewa isɨndaro reta ndiwe uike tëta wasu Samaria pe jare opa umɨamɨri. Joko wi ɨwɨ Asiria imburuwicha wasu uipɨsɨka opaete Israel pewa reta jare opa wɨraaka reta ɨwɨ Asiria kotɨ. Umbɨyakaoka amokue Israel pewa reta tëta wasu Halah jee wae pe, jare ïru wae reta ɨwɨ Gozán jee wae ɨ wasu Habor jee wae jembeɨ rupi. Jare ïru Israel pewa reta umbɨyakaoka ɨwɨ Media pewa reta jëta wasu reta rupi.

7Kua mbaesusere ou Israel pewa reta pe, echa’ä jae reta uyawɨ Tumpa kotɨ ramo. Yepe tëi Tumpa upɨ̈ro reta ɨwɨ Egipto imburuwicha wasu imbaepuere wi jare onoe ueru reta ɨwɨ Egipto wi, erëi jesewe jae reta jekuaeño umbɨadora tumparaanga reta re.

8Jare yepe tëi Tumpa umbɨsɨrɨ Canaán pewa reta iɨwɨ wi jare umee Israel iñemoñaa reta pe iɨwɨrä, jesewe Israel iñemoñaa reta uipɨsɨ ñeño imaerä jae reta jeko kachi wae. Jae reta uyapo wi opaete mbaembae kachi wae Israel pewa mburuwicha wasu reta uyapo wae rami.