Daniel 9 - Bible

24Araɨwa jei Daniel pe kuärái: “Tumpa jei nerëtáɨwa reta rewa jare tëta wasu uñeñono tee wae rewa kërái 490 año uasata opa uyeyapo waerä kua mbaembae: opa iyapɨ waerä teko kachi jare mbaembae uyawɨ reta Tumpa kotɨ wae; jare ime waerä jupi wae jaeño mái pewa Tumpa kotɨ; jare opa uyeyapo waerä Tumpa iñee arakae umɨmbeu wae reta jei uyeyapota iko wae; jare uñeñono tee waerä Tumpa pewarä Tumpa joo jupiete ye wae.

25“Jayawe iyapɨsaka jare ikuaa kawi kua: Pëti mburuwicha wasu jeita uyapo reta ye waerä tëta wasu Jerusalén. Jare jokua ara wiwe uasata 483 año mburuwicha wasurä Cristo yae chupe wae ou rewa.

Jayawe mburuwicha wasu jei wae rupi umupüa yeta ñonoï Jerusalén ikësea reta, jare uyapo yeta ñonoï icalle reta wi. Jukuärái uyapota ñonoï reta, echa’ä imeta onoi yemumburu mano pewa ramo.

26“Jare 483 año ma uasa yawe, uyukata ñonoï reta Cristo yae chupe wae, erëi mbaetɨta mbae jae uyapo wae jeko pewa. Joko wi ɨma ma uasa yawe, uyekuaata oï ambɨe mburuwicha wasurä ambɨe ɨwɨ pewa. Erëi ndei jae uyekuaa mbowe, iɨwɨ pewa reta opata umbái Jerusalén jare tupao wasu. Opata umbái reta mbaesusere tuichaete wae rupi, jare joko wiwe ara taɨkuewa uwäe rewa imeta ñeräro reta jare mbaesusere reta. Jukuärái Tumpa jei uyeyapota oï.

27“Jokua mburuwicha wasurä outa oï wae uyapota oï tëi pëti yemɨngeta jeta wae reta ndiwe chiu año pewa. Erëi mbapɨ año mbɨte uasa ma yawe, aramoiño jae umaeñota’ä tueru reta tupao wasu pe mbaemɨmba reta jare ïru mbaembae Tumpa pewarä. Jare oete ye, jae oñonota oï tupao wasu joo pe mbae ikawi mbaete wae – jae ko upururükumewa wae. Jare joko pe upɨtata oï uwäe ara Tumpa jei wae rewa. Jare jokua ara ramo jokua mburuwicha wasu ukañɨta oï jaeño mái pewa.” Jukuärái jei araɨwa Daniel pe.