Hebreos 12 - Bible

Jekuaeño ñamae täta Jesús re

1Kua Tumpa re wɨrowia kawi wae reta che amɨmbeu pewe wae, jetaete ko. Opaete kua reta ko jae ñanemɨkɨrëɨ waerä Tumpa kotɨ. Echa’ä yande reta añawe kua ɨwɨ pe ñaï rambuewe, pëti ñeñokui pe ñaï rami ko. Jáeramo imeta ko yayapo yandepuere wae rupi yasi kawi waerä. Yaeyata ko yandeyuwi opaete mbaembae yanembɨawái wae jare yandereko kachi uipota yandepokua rami wae. Jare yasi mii tenonde kotɨ yandekueri mbae rewe imeño uata oï yandewe wae.

2Jare kërái uñeñokui wae reta täta umae oo oï iyapɨ re, jukuärái wi yande tätata ko ñamae Jesús re. Echa’ä jae oo ma tenonde yandewi jare uechaka ma yandewe kërái yarowia kawi waerä Tumpa re. Jare añawe jae yanemborɨta oï jukuärái wi yayapo waerä. Jae tuicha urupɨa kurusu re umanota iko yawe. Jare yepe tëi pëti ñemɨmaraka tuicha wae ko jae umano waerä pëti kurusu re, erëitu jokua mbae’ä chupe. Echa’ä jae uikuaa iko taɨkue rupi uyerowiaeteta iko. Jare jukuärái ko oï añawe rupi, echa’ä jae uwapɨ oï yandeRu Tumpa iyakata kotɨ.

3Pemandúa Jesús re kërái jae urupɨa jeko kachi wae reta pe jae reta uyembowaicho jae ndiwe yawe. Pepɨa pe piyemɨngeta kawi jokua re awɨye waerä pekueri jare awɨye waerä peresawɨrɨ rami Tumpa kotɨ.

4Añetete ime jeko kachi wae reta opaete kerupi. Jare amo pe ime yandepɨa pe wi kɨrëɨ mbae kachi yayapo waerä. Jáeramo jekuaeño ñañeräro ñaï awɨye waerä ñañemɨamɨrika mbae kachi wae pe. Erëi piñemɨkɨrëɨ, echa’ä ndeiño piporara Cristo uiporara rami. Echa’ä jae uiporara yawe, upɨyere juwɨ etei.

Awɨye yambasɨ yandeYa yanembɨarakuaa yawe

5Jare awɨye peakañɨ jokua ñee Tumpa iñeerɨru pe oï wae wi. Echa’ä joko pe pembɨarakuaa kërái pëti tu umbɨarakuaa taɨ wae rami kuärái:

“Nde, cheraɨ mii, awɨye erɨ̈ro yandeYa nembɨarakuaa yawe.

Jare jae uiporaraka ndewe yawe, awɨye ndepɨatɨtɨ.

6Echa’ä yandeYa umbɨarakuaa uau wae reta.

Jare uiporaraka opaete taɨrä ueni wae reta pe.”

Jukuärái jei.

7Jayawe pemɨawäta jokua piporara peï wae, echa’ä jokua rupi Tumpa pembɨarakuaa oï. Añetete Tumpa jukuärái uyapo oï pewe, pe reta ko jae taɨ reta ramo.

¿Ime ra tu ikawi wae mbaetɨ taɨ umbɨarakuaa wae? Mbaetɨ.

8Jare jukuärái wi Tumpa umbɨarakuaa opaete taɨ reta. Jáeramo Tumpa mbaetɨ pembɨarakuaa yawe, jayawe pe reta añetete Tumpa taɨ reta’ä ko.

9Jare wi yande reta, yande michi raɨ mii yaiko yawe, yanderu reta kua ɨwɨ pewa yanembɨarakuaa. Jare yaipɨu wi ko chuwi reta. ¿Maera pa jayawe ñañemee’ä yandeRu ara pewa pe jae yanembɨarakuaa waerä jare jukuärái yayekou waerä tekowe añetete wae re?

10Añetete, yanderu reta kua ɨwɨ pewa yanembɨarakuaa michi pewaño jare kërái jae reta uipota wae rupi. Erëi Tumpa yanembɨarakuaa ikawi waerä yandewe añetete pewa jare yaiko waerä jupi jae rami.

11Añetete ko, Tumpa uiporaraka yandewe yawe, yandepɨatɨtɨ jare yayerowia’ä jokua re. Erëi jokua rupi yayemboe yayapo waerä jae jei wae yawe, jayawe taɨkue rupi yandereko oya katuta jupi wae re jare yaikota yandepɨakatu rewe.

12Jáeramo yepe tëi pekueri jare pekandɨ peï aramoi Tumpa kotɨ, erëi piñemɨmɨräta.

13Ïru wae reta aramoi opia pota ñonoï Tumpa jape wi. Jayawe jekuaeño pewata kawi Tumpa ndiwe jae reta jowake. Pechaka chupe reta tape jae reta uwata waerä jokoropi, awɨye waerä opia reta.

Tumpa ipɨakawi wɨrɨ̈ro wae reta

14Peka kërái piko kawi waerä opaete wae ndiwe. Jare piñeñono tee Tumpa pewaräño. Echa’ä kía uñeñono tee’ä chupe yawe, ndarau uecha yandeYa.

15Piyandareko kawi piyé awɨye waerä kía pepɨte pe oï wae uyerowa Tumpa ipɨakawi wi. Jare awɨye pemaeño mbaembasɨ re ukuakuaa waerä pepɨte rupi jare jukuärái umbɨawái waerä jeta wae reta. Echa’ä pemaeño jese yawe, jeta wae reta ikɨata Tumpa kotɨ.

16Jare awɨye piyapo awasa. Awɨye wi piko Esaú iko wae rami. Echa’ä jae uipɨu’ä Tumpa wi jare mbaembae Tumpa pewa wi. Echa’ä jokua taɨrɨpɨyekou Tumpa umeeta tëi iko chupe wae, Esaú owaka tɨwɨ pe tembiu reño.

17Jare pe reta pikuaa peï kërái taɨkue rupi Esaú uipota tëi tu umee waerä chupe jokua mbaembae taɨrɨpɨ pewarä. Erëi mbaetɨ ma uñemee chupe jokua jae imaerä ikota tëi wae. Yepe tëi uyerure jese uyao rewe, erëi mbaetɨ ma mbae ipuere uyapo. Jukuärái iko Esaú.

18Pe reta mbaetɨ ma ko peya Tumpa re yanderamɨkue reta rami. Arakaete jae reta oya Tumpa re pëti ɨwɨtu wasu jendɨ iko wae pe. Jare ime iko wi amapɨ̈tu pɨ̈tumimbiete wae jare ɨwɨtu täta uyepeyu wae.

19Jare jae reta uyandu temimbɨ wasu uñee tätaete rupi jare Tumpa iñee etei. Jare Tumpa iñee uyandu reta yawe, jei reta Moisés pe ukɨyete rewe: “¡Nduipota’ä ma nduyandu kua ñee!

20¡Orepuere’ä etei numɨawäta kua Tumpa jei wae!” jei reta. Jukuärái jei reta, echa’ä Tumpa jei ma chupe reta: “Ipotawe kua ɨwɨtu wasu re upɨ̈ro wae, tuyapi reta ita pe tuyuka – jare mbaemɨmba retawe wi,” jei.

21Añetete jokua ɨwɨtu wasu re uyekuaa wae kɨye pewaete ko. Jáeramo Moisés etei jei: “Che arɨrɨete aï akɨye ramo,” jei.

22Erëi pe reta peya ma ko ɨwɨtu wasu Sion jee wae re. Kua ɨwɨtu wasu kua ɨwɨ pewa’ä ko. Jae ko ara pewa. Joko pe ko oï Tumpa ikoño mái wae jëta wasu Jerusalén jee wae. Jare joko pe ñonoï wi jetaete ye araɨwa reta uyembatɨ ñonoï uyerowia rewe.

23Jare joko pe uyembatɨ ñonoï wi Tumpa ueni ma taɨ tenondewa wae reta opaetei – jae ko opaete jee uyekuatía oï ara pe wae reta, jare jae ko opaete jupi yureko wae reta opa umano wae iäkue. Añawe Tumpa opa ma umbujupiete reta. Jare joko pe oï wi Tumpa etei – jae ko opaete yande reta yayemboɨta ñaï jae jowai wae.

24Jare yaya ma wi Jesús re. Jae rupi ko Tumpa uyapo yemɨngeta ipɨau wae yande ndiwe. Echa’ä jae upɨyere juwɨ yande yandepuere waerä ñanoi tekowe opa mbae wae. Jáeramo Jesús juwɨ ikawiete ko Abel juwɨ wi, echa’ä Abel juwɨ jaeño uyembɨjaanga oï uyepɨ wae.

25Tumpa pemɨngeta oï. Jayawe piyapɨsaka kawi jese. Pemandúa peï yanderamɨkue reta re. Jae reta täta uiporara uyapɨsaka’ä reta yawe Moisés jei wae re. Erëi oeteta ko yande yayapɨsaka’ä yawe Jesús jei wae re. Echa’ä Moisés kua ɨwɨ pewaño ko, erëi Jesús ko jae ara pewa.

26Jokua ara Tumpa iñee ombou yawe ɨwɨtu wasu wi, jae iñee umɨkäta ɨwɨ. Erëi añawe jae jei kuärái: “Pëti wese ye amɨkätata ɨwɨ. Erëi mbaetɨ ɨwɨño amɨkätata. Jae nunga wi amɨkätata ara jare opaete mbaembae ara re oï wae.”Hageo 2.6 Jukuärái jei.

27Jare kua “pëti wese ye” jei wae uipota jei “opaete cherembiapo reta ipuere omɨ wae opata ambɨyapɨ,” jei Tumpa. Echa’ä Tumpa uipota jaeño jokua mbaembae ipuere’ä omɨ wae jekuaeño oï waerä – jae ko mbaembae opa mbae wae pewa.

28Jáeramo ñamee yasurupái Tumpa pe, echa’ä jokua jae umee oï yandewe wae, ndarau etei opa. Echa’ä jae umee oï yandewe ñaï waerä jae ndiwe jae oï ma yawe opaete wae imburuwicha wasurä jaeño mái pewa. Jáeramo yayeyokui Tumpa pe yaipɨu rewe yambɨyerowia waerä.

29Echa’ä yandeTumpa ko jae pëti tata opaete mbaembae jupi mbae wae opa uapɨ wae rami.