Éxodo 40 - Bible

16Opaete Tumpa jei wae, jukuärái Moisés uyapo.

17Jayawe Israel iñemoñaa reta ɨwɨ Egipto wi oë reta wiwe, mokui año ma uasa. Jare tenonde ara pe tenonde yasɨ wi, jokua ara etei opa umbɨyemboɨ reta tupao wɨraañoi jae reta ndiwe wae.

18Moisés umbɨpɨ umbɨyemboɨka tupao yawe, tenonde oñonoka rani jenda jenda pe iwapɨka reta. Joko wi umbɨyemboɨka ɨwɨra ipe wae reta uyeyapo waerä tupao iɨwambɨrä. Jare oñonoka iáramo jenda jenda pe ɨwɨra uyepɨasa wae reta. Joko wi umbɨyemboɨka ɨkɨta reta jenda jenda pe.

19Joko wi umbɨyasoika tupao iyasoika pɨpe, jare oñonoka iyasoika iáramo ïru iyasoika kërái Tumpa jei wae rupi.

20Jaɨkue rupi Moisés oñono jokua mokui ita ipe kawi wae reta Tumpa arakae jei wae yemɨmandúa jɨru japɨpe. Joko wi uesɨ̈roka jɨru jokua mokui iɨwɨra puku jare sɨmi wae reta jɨru inambi reta rupi, jare umbɨyasoika jɨru iyapeteka pɨpe.

21Jaɨkue rupi oñonoka jokua jɨru tupao joo pe. Joko wi Moisés umbɨsawawaka puyu tupao joo umbɨyao pɨpe wae awɨye waerä kiawe uecha jokua jɨru kërái Tumpa jei wae rupi.

22Joko wi Moisés oñonoka mbaerenda mbɨyape uñeñono tee Tumpa pewarä jese wae tupao joo jupi wae japɨpe ɨwambɨ norte kotɨ.

23Jokua mbaerenda re oñonoka mbɨyape Tumpa jowai kërái Tumpa jei wae rupi.

24Oñonoka wi tupao joo jupi wae japɨpe jokua mechero ikawiete uyapo reta wae ɨwambɨ sur kotɨ oï waerä mbaerenda jowai.

25Jare umbɨyepotaka wi mechero Tumpa jowai kërái Tumpa jei wae rupi.

26Jaɨkue rupi Moisés oñonoka mbaerenda uapɨ jese mbaembae utimbo kawi wae tupao joo jupi wae japɨpe, o umbɨyao wae jowai.

27Jare jokua mbaerenda re uapɨka mbaembae utimbo kawi wae kërái Tumpa jei wae rupi.

28Joko wi Moisés umbɨsawawaka tarapo tuicha wae tupao jökerä.

29Jare tupao joka pe öke tarapo pewa jowai Moisés oñonoka mbaerenda tuicha wae uapɨ reta waerä jese mbaembae Tumpa pewarä wae. Joko wi uyukaka mbaemɨmba jare uapɨka woi mbaerenda iáramo. Jare uapɨka wi trigo jäɨ uñemee Tumpa pewarä. Jukuärái Moisés uyapo opaete kërái Tumpa jei wae rupi.

30Joko wi Moisés oñonoka ɨ jɨru tuicha wae tupao joka pe, mbaerenda tuicha wae jare tupao ipäu pe. Jare umɨtɨneeka woi ɨ pe.

31Jayawe Moisés, Aarón, jare Aarón taɨ reta uiporu jokua ɨ uyepoe jare ipɨ oyoe reta waerä.

32Ndei oya reta mbowe mbaerenda wasu re jare ndei uike reta mbowe tupao japɨpe, imeta ko oyoe reta ipo jare ipɨ rani kërái Tumpa jei Moisés pe wae rupi.

33Joko wi Moisés opa uikëseka tupao jare mbaerenda wasu. Joko wi umbɨsawawaka ïru tarapo tupao joka ikësea jökerä. Jukuärái Moisés opa uyapoka opaetei jokua mbarawɨkɨ tupao rewa kërái Tumpa jei wae rupi.

34Jayawe aramoiño amapɨ̈tu umbɨyasoi tupao. Jare Tumpa imbaepuere jupiete wae uyekuaa pëti tembipe uwerasɨ echa wae rami jare opa tɨnee tupao.

35Jáeramo Moisés ipuere’ä uike ye tupao japɨpe, echa’ä amapɨ̈tu opa oñowa jare opa tɨnee oï Tumpa imbaepuere pe ramo.

36Joko wiwe Tumpa uruwata reta jokua amapɨ̈tu pɨpe. Amapɨ̈tu uyeupi yawe tupao iáramo wi, Israel iñemoñaa reta opa uyeyapɨkatu jare uwata yuraa amapɨ̈tu jupie.

37Erëi amapɨ̈tu upɨtaño yawe tupao re, jayawe Israel iñemoñaa reta joko pe upɨta reta jare uäro reta amapɨ̈tu uyeupi ye rewa.

38Jukuärái joko wiwe ipotawe yuraa reta wae rupi Tumpa jekuaeño iko jae reta ndiwe. Ara rupi uecha reta Tumpa iamapɨ̈tu tupao re, jare pɨ̈tu rupi uyekuaa chupe reta tata jendɨ wae amapɨ̈tu re oï wae.