1 Pedro 4 - Bible

Yaiko Tumpa pewarä

1Cristo uiporara yanderé kua ɨwɨ pe iko rambuewe. Jáeramo pe reta piyeyapɨkatuta ko piporara waerä jae rami. Echa’ä ime yawe kía uiporara Cristo re wɨrowia jeko pewa wae, jae jeko kachi wae ipɨräta’ä ma jese jete re.

2Jare jukuärái jae jekowe opa rewa mbaetɨta ma iko jete uipota uyapo wae rupi. Jaeño uipotata iko Tumpa jei wae rupi.

3Pe reta ɨma rupi piyapose Tumpa re wɨrowia mbae wae reta ikawi echa chupe wae. Jetaete ma piyapo. Piyapose mbaembae perete uipota uyapo wae rupi, jare awasa rupi, jare sawɨpo rupi. Piyapose arete jare kau wasu opa mbaembae uasa wae. Jare yepe tëi tumparaanga reta kachi ko Tumpa jowai, erëi pembɨadorase jese reta. Erëi añawe peya ma ko jokua mbaembae.

4Jare Tumpa re wɨrowia mbae wae reta pe yawái uikuaa waerä maera ra piyapo’ä ma jae reta ndiwe opaete kua mbaembae ikawi mbae wae reta. Jáeramo jae reta uyemɨngeta ñonoï kachi pekotɨ.

5Erëi pëti ara jae reta uyemboɨta ñonoï Tumpa jowai umɨmbeu reta waerä jae reta mbae uyapo wae. Jukuärái uyapota reta jokua ara umanokue wae reta jare ikowe wae reta wi uyemboɨ reta yawe Tumpa jowai.

6Jokuaerä ko ñee ikawi wae Cristo rewa uyemɨmbeu iko wi jokua añawe umano ñonoï wae reta pe. Echa’ä jukuärái rupi, yepe tëi jae reta umano opaete wae reta rami, erëi jae reta iä ipuereta iko Tumpa ndiwe.

7Uyaro ma oï opaete mbaembae reta ime oï wae iyapɨ waerä. Jáeramo piko pearakuaa katu rewe jare pemae kawi rewe pepuere waerä piyerure kawi Tumpa pe.

8Jare opaete mbaembae reta wi, tenonde imeta ko tuicha rupi piyerau päwe rewe waerä. Echa’ä piko yawe jukuärái, ndarau ma pemandúa peyupe mbaembae kachi piyapo wae re.

9Jae nunga wi piyembɨasa kawi mii perëta pe piyengeta mbae rewe.

10Tumpa ipɨakawi ramo, umee ma yandewe pëti pëti wae pe yaikatu yayapo waerä mbae. Jayawe piyeyokui kawita ko peyupe jokua pikatu piyapo wae rupi. Jare jukuärái piyapo yawe, opa kërái rái uyekuaata peré Tumpa ipɨakawi wae ko.

11Jayawe ime yawe kía Tumpa umee chupe iñeengatu uyemɨngeta waerä wae, tuyemɨngeta Tumpa etei uyemɨngeta oï wae rami. Jare ime yawe kía Tumpa umee chupe uyeyokui waerä ïru wae reta pe wae, tuyeyokui mɨräta Tumpa umee chupe wae rupi. Jukuärái ko piyeyokuita peyupe. Jare jukuärái piyapo yawe, jayawe opaete mbaembae piyapo wae rupi, pepɨte pe uyekuaata oï Jesucristo imbaepuere jare jukuärái Tumpa jee uyembutuichakata oï.

YandeRu Tumpa tonoi opaete mbaepuere, jare jae jee tuyembutuichaka jaeño mái pewa. ¡Jukuärái tuiko!

Yaiporara yawe Cristo re yarowia jeko pewa, yayekouta ñaï

12Cheïru puau mii wae reta, awɨye pepɨakañɨ añawe kua tuicha piporara peï wae re. Echa’ä kua nunga mbaembae uasa ñotái ko uyekuaa waerä añetete ko perowia peï Tumpa re. Jáeramo awɨye pere: “¿Maera ra kua uasa oï chewe?”

13Piyerowiaño. Echa’ä piporara wae rupi piñemɨïru peï Cristo ndiwe. Jare jokua re piyerowiaeteta peï kuri jokua ara Cristo ou ye yawe imbaepuere jembipete rewe.

14Jáeramo ïru wae reta jei yawe mbae ikawi mbae wae pekotɨ Cristo re perowia jeko pewa, añetete piyekouete peï. Echa’ä Tumpa iEspíritu Santo jare jae imbaepuere jupiete wae oï pe reta ndiwe ramo.

15Erëi awɨye kía pepɨte pe oï wae tupuruyuka, jare awɨye timonda, jare awɨye tuyapo ikawi mbae wae, jare awɨye tuyemɨinge opaño mbae pe. Echa’ä piyapo yawe kua nunga mbaembae, piporarata peï.

16Erëi piporara yawe Cristo re perowia jeko pewa, awɨye pemara. Pembutuicha Tumpa jee, echa’ä Cristo peapo ma imaerä ramo.

17Jare yande yaikuaa yaiporara ñotái ko, echa’ä uwäe ma ara Tumpa umbɨpɨ waerä umɨñatima ɨwɨ pewa reta pe kërái mbaembae uyapo reta wae re. Jare kua uyembɨpɨta yande reta ndiwe, yande Tumpa jëtararä yaiko wae reta. Erëi uyembɨpɨ ma jukuärái yande ndiwe yawe, uasaete yeta ndipo kuri jokua ñee ikawi wae wɨrowia mbae wae reta pe. Echa’ä jae reta wɨrowia’ä Tumpa iñee chuwi etei ou wae re.

18Jare kërái Tumpa iñeerɨru pe uyekuatía oï rami:

“Yawái yawe jupi wae reta pe onoi waerä tekowe opa mbae wae,

uasaete yeta ndipo jokua jupi mbae wae reta pe jare jeko kachi wae reta pe.”

Jukuärái uyekuatía oï.

19Jáeramo Tumpa jei wae rupi uiporara wae reta jekuaeño tuyapo ikawi wae jare tuñeñono reta Tumpa ipo pe. Echa’ä Tumpa ko jae yandapoa, jare yandepuere yarowia katu jese uyandareko waerä yanderé.