1 Corintios 7 - Bible

Pablo upurumbɨarakuaa menda rewa

1Añawe che aipota aikuatía pewe jokua mbaembae reta pepɨrandu chewe wae re.

Amokue pe reta pere tëi peï: “Ikawi ko kuimbae awɨye waerä umenda kuña ndiwe.”

2Erëi che tae pewe, awasapota jeko pewa kuimbae reta tumenda jare jukuärái oï waerä jembireko ndiweño. Jare kuña reta jukuärái wi toï ime ndiweño.

3Jare kuimbae tuyapo jembireko ndiwe jembireko jete uipota wae. Jae ramiño wi kuña tuyapo ime ndiwe ime jete uipota wae.

4Echa’ä umenda reta ma yawe, kuña mbaetɨ ye ma ko jaeño jete iya. Jae nunga wi ime ko jae kuña jete iya. Jare jukuärái wi kuimbae mbaetɨ ye ma ko jaeño jete iya. Jae nunga wi jembireko ko jae kuimbae jete iya.

5Jáeramo kuimbae awɨyeta ko jei jembireko pe: “Che ayapota’ä mbae nde ndiwe.” Jare kuña awɨyeta ko jei wi jukuärái ime pe.

Erëi umenda wae reta uipota yawe, ipuere oñono tee iyupe amokue ara reta mbae uyapo mbae waerä uyerure reta waerä Tumpa pe. Jokua jaekawiño ko. Erëi opa ma jokua ara jae reta oñono tee iyupe wae uasa yawe, jayawe tuyapo ye reta mbae awɨye waerä Satanás pe uñemɨjëwa jare awasa uyapoka chupe reta waerä. Echa’ä pe reta pikuaa peï yawái ko perete uipota oï wae pemɨawäta waerä.

6Kua pe mbaetɨ che jae aï pewe imeta ko peñono tee ara reta piyapo mbae waerä. Jaeño che jae aï pewe pipota’ä piyapo yawe mbae mbowɨ ara pewa, jaekawiño ko jokua.

7Añetete che aipota echa tëi ko opaete wae ipuere iko umenda mbae che rami. Jesewe yande reta yaikuaa ñaï Tumpa umee yandewe pëti pëti wae pe kërái yaiko waerä. Amokue wae reta pe Tumpa umee kɨrëɨ umenda waerä. Jare ïru wae reta pe Tumpa umee kɨrëɨ awɨye waerä umenda.

8Jayawe che jae aï jembireko umano wae reta pe jare ime umano wae reta pe kuärái: Ikawi ko awɨye umenda reta ye waerä, che amenda’ä rami.

9Erëi mbaetɨ yawe ipuere umɨawäta reta jete uipota wae, jayawe tumenda reta ye. Echa’ä mbaetɨ ikawi jekuaeño uñeräro reta waerä jete uipota wae ndiwe. Jukuärái che pumbɨarakuaa aï kua pe.

10Jare ime ñee umenda wae reta pewarä wi, erëi jokua ñee mbaetɨ chewi ou. Jae ko yandeYa wi etei ou wae jare jae ko kua: Kuña awɨye tusɨrɨ ime wi.

11Erëi kuña usɨrɨ yawe ime wi, tuiko jukuäraiño ma umenda mbae ani tuyeapɨkatu ye ime ndiwe. Jare jukuärái wi kuimbae awɨye tomombo jembireko. Jukuärái jei yandeYa. Jare jukuäraita ko kuimbae jare kuña mokui rewe wɨrowia Cristo re yawe.

12Erëi ¿këraita ra pëti kuimbae wɨrowia yawe Cristo re, erëi jembireko uipota’ä wɨrowia? ¿Ipuereta ra jae omombo jembireko? Añetete yandeYa yanemboe’ä jokua re. Jayawe che pumbɨarakuaa kuärái: Ime yawe pëti kuimbae Cristo re wɨrowia wae jare jembireko mbaetɨ wɨrowia wae, erëi jembireko uipota iko yawe jae ndiwe, awɨye tomombo.

13Jare jukuärái wi ko kuña Cristo re wɨrowia wae jare ime mbaetɨ wɨrowia wae, erëi ime uipota iko jae ndiwe yawe, awɨye tomombo.

14Echa’ä jokua kuimbae uyekou oï wi yemborɨ Tumpa umee oï jembireko rupi wae re. Jare jukuärái wi ko kuimbae Cristo re wɨrowia wae jembireko wɨrowia mbae wae ndiwe. Jae jembireko uyekou oï wi yemborɨ Tumpa umee kuimbae rupi wae re. Erëi jukuärai’ä ko yawe, jayawe sambiaɨ reta ikota tëi ipotawe Cristo re wɨrowia mbae wae reta isambiaɨ reta rami. Erëi jukuärai’ä ko. Jae reta uyekou ñonoï wi tu ani ichɨ wɨrowia ramo.

15-16Jayawe kuña ani kuimbae Cristo re wɨrowia wae awɨye tuyemombo. Echa’ä Tumpa uipota yureko reta waerä päwe ipɨakatu rewe. Jare jae nunga wi aramoi jokua kuimbae ani kuña Cristo re wɨrowia mbae wae wɨrowiata oï ime ani jembireko jeko pewa.

Erëitu Cristo re wɨrowia mbae wae uipota usɨrɨ yawe, tome tusɨrɨño. Jukuärái yawe, Cristo re wɨrowia wae ipuere iko ipɨawiwe rewe jaeño pe etei. Ikawi ko jukuärái.

17Erëitu pëti pëti wae jekuaeño tuiko ipuere wae rupi kërái jaeramo Tumpa ueni yawe iko wae rami. Joko peño ko Tumpa oñono. Jukuärái che jae opaete kía Cristo re wɨrowia wae reta pe kerupi rupi uyembatɨ reta wae.

Tumpa uipota yayeyokui waerä chupe ipotawe kërái ñaï wae rupi

18Jare kua che jae aï wae, menda rewaño’ä ko. Echa’ä Tumpa ueni yawe pëti judío wɨrowia waerä jese, jokua judío awɨyeta ko jei: “Aipota’ä ma judiorä aiko.” Jae ramiño wi Tumpa ueni yawe pëti judío mbae wae, awɨye tuyeyapo judiorä.

19Echa’ä judío ko yande wae mbae’ä ko. Jare jukuärái wi judio’ä ko yande wae mbae’ä ko. Erëi jaeño ko ikawiete yayapo waerä Tumpa jei yandewe wae.

20Jayawe che tae ye pewe, pëti pëti Cristo re wɨrowia wae jekuaeño tuiko kërái jaeramo Tumpa ueni yawe iko wae rami.

21Ipuere ko amokue wae pione iko wɨrowia yawe Cristo re. Jukuärái yawe, awɨye tipɨatɨtɨ jokua re, echa’ä pëti pione ipuere wi uyeyokui kawi Tumpa pe.

Kua pe mbaetɨ che jae aï pione reta awɨye tusɨrɨ ipatrón ipo wi. Jae reta ipuere yawe, tusɨrɨ chuwi reta. Jaeño che jae aï pëti pione ipuere uyeyokui kawi Tumpa pe.

22Echa’ä yepe tëi kía pëti pione ko, erëi yandeYa ueni yawe iko waerä jae imaerä, jokua pione uyenduta oï yandeYa uepɨ rami ma ko. Jae ramiño wi yepe tëi kía jae’ä ko pionerä iko wae, erëi yandeYa ueni yawe iko waerä jae imaerä, jae ma ko Cristo pe täta rupi uyeyokui wae.

23Echa’ä Tumpa ombou Taɨ umano waerä yanderé, jare jukuärái umbɨepɨ ma ko jepɨete ye wae yande reta yaiko waerä jae imaerä. Jáeramo piyeyokuita ko Tumpa peño.

24Jayawe hermano mii reta, opaete kua mbaembae reta rupi che jae aï pewe yandepuere ñañemɨïru Tumpa ndiwe ipotawe kërái ñaï wae rupi. Jayawe pëti pëti wae jekuaeño tuiko kërái jaeramo Tumpa ueni yawe iko wae rami. Jukuärái tuyeyokui Tumpa pe.

Pablo umbɨarakuaa ndei umenda wae reta

25Pe reta pepɨrandu chewe wi ndei umenda wae reta rewa. Erëi añetete yandeYa Cristo mbaetɨ oporomboe jokua rewa. Erëi che chepuere pumbɨarakuaa. Jare pepuere chererowia, echa’ä yandeYa cheparareko rupi chembɨarakuaa kawi ma.

26Pe reta pikuaa peï kua ara reta rupi yawaiete oï yande Cristo re yarowia wae reta pewarä. Jokua jeko pewa che jae aï ikawi ko jekuaeño peï waerä añawe kërái peï wae rupi.

27Jayawe jokua umenda wae reta, awɨye tuyemombo. Jare jokua ndei umenda wae reta, awɨye tumenda. Jukuärái che pumbɨarakuaa aï.

28Erëi kunumi reta jekuaeño uipota umenda yawe, jokua jaekawiño ko. Jae nunga wi kuñatái reta uipota umenda yawe, jokua jaekawiño wi ko. Menda kachi wae’ä ko Tumpa jowai. Erëi pe reta pikuaa ko kua ara reta rupi yawái yanemaerä, jare umenda wae reta onoita jeta yembɨawái reta kua ɨwɨ pewa. Jare che aipota’ä pe reta penoi waerä jokua nunga yembɨawái wi.

29Hermano mii reta, che tae pewe koiño ma ou oï ara reta opa waerä. Jáeramo menda awɨyeta ko pembɨawái piyeyokui waerä Tumpa pe pepɨa rewe.

30Jae ramiño wi mbɨatɨtɨ, jare yerowia, jare ipotawe mbae pewa peyupe wae awe awɨyeta ko pembɨawái piyeyokui waerä Tumpa pe.

31Jare yepe tëi ime penoi mbaembae kua ɨwɨ pewa, erëi awɨye piko jokua mbaembae pewaräño. Echa’ä koiño ma oï kua ɨwɨ opa waerä.

32Jayawe che aipota’ä mbae re piyembɨpɨa’ä waerä. Jare pemenda yawe, imeta yembɨawái reta pewe. Añetete kuimbae umenda mbae wae ipuere uyeyokui kawi yandeYa pe ipɨa rewe, echa’ä ipuere uñemee yandeYa pe umbɨyerowia waerä jaeño.

33Erëi jukuärai’ä ko kuimbae umenda wae. Echa’ä jae uyembɨpɨa’ä oï wi mbaembae kua ɨwɨ pewa re umbɨyerowia waerä jembireko.

34Jae ñemɨatamɨata pe oï parawete.

Jare jukuärái ko kuña umenda wae ndiwe wi. Echa’ä uyembɨpɨa’ä oï wi mbaembae kua ɨwɨ pewa re umbɨyerowia waerä ime. Erëi kuñatái uyandareko yandeYa iparawɨkɨ reño, jare jukuärái ipuere jete jare jekowe oñono tee Tumpa pewaräño iko waerä.

35Kua che jae aï pewe wae ikawi pewe waerä ko. Che jae’ä ko aï pewe awɨye pemenda waerä. Jaeño ko aipota pepuere piyeyokui waerä yandeYa pe pepɨa rewe jare jupi rupi. Chemaerä jaekawiño ko pemenda waerä. Erëi pemenda’ä yawe, ikawieteta wi pewe.

36Erëi pëti kuimbae tayɨ uasa ma oï umenda ara wae, jare kuimbae pe mbaetɨ ikawi tayɨ jukuäraiño oï waerä, jare tayɨ uipota wi umenda yawe, jayawe tumaeño jese umenda waerä. Jokua mbae kachi wae’ä ko Tumpa jowai.

37Erëi aramoi ïru kuimbae uipota’ä tayɨ umenda waerä. Aramoi mbaetɨ mbae awe umbɨawái uyandareko waerä tayɨ re, jare ipuere’ä kiawe jei chupe waerä mbae jokua rewa. Jukuärái yawe, jae nunga wi ikawi jokua uyapo.

38Jayawe mokui rewe uyapo ikawi wae. Jokua kuimbae umaeño tayɨ re umenda waerä wae, jokua jaekawi uyapo. Erëi jokua kuimbae umaeño’ä tayɨ re umenda waerä wae, jokua jaekawiete ye uyapo, echa’ä kua ara reta rupi yawái oï yandewe ramo.

Pablo umbɨarakuaa kuña ime umano wae reta

39Tumpa iñee pe jei kuña umenda wae pëti ramiño ko oï ime ndiwe, ime iko rambuewe. Mbaetɨ ikawi umenda waerä ambɨe ndiwe. Erëi ime umano chuwi yawe, kuña ipuere umenda ye ipɨawiwe rewe pëti kuimbae jae uipota wae ndiwe. Erëi tumenda pëti kuimbae yandeYa re wɨrowia wae ndiwe.

40Jokua jaekawiño ko. Erëitu che jae aï ikawieteta ko chupe umenda yewɨ'ä yawe. Jare aikuaa Tumpa iEspíritu ko chembɨarakuaa oï ayemɨngeta waerä jukuärái.

Jayawe jukuärái ko che pumbɨarakuaa mii menda rewa.