Hechos 19 - Bible

Pablo uñatima ye tëta wasu Éfeso pe

1Apolos tëta wasu Corinto pe iko rambuewe, Pablo oo ɨwɨ Asia rupi uwäe ye rewa tëta wasu Éfeso pe. Jare oo uwäe ramo yawe joko pe, Pablo uñeñowäiti amokue wae yandeYa re wɨrowia wae reta ndiwe.

2Jare Pablo upɨrandu chupe reta: “¿Ou pa pepɨa pe Espíritu Santo perowia yawe yandeYa re?” jei.

“Mbaetɨ,” jei reta. “Ore nduikuaa’ä etei ime iko Espíritu Santo wae,” jei reta chupe.

3Jayawe Pablo upɨrandu ye chupe reta: “¿Mbae nunga yemboe re pa piyembɨsakambuka?” jei.

Jare jae reta jei chupe: “Juan oporomboe wae re nduyembɨsakambuka.”

4Jayawe Pablo jei chupe reta: “Juan omboe opaete wae reta uyembɨsakambuka waerä ɨ pe jae reta uechaka waerä ueya ma ko ipɨayemɨngeta jupi mbae wae Tumpa rewa. Jare jae jei wi chupe reta wɨrowia waerä outa iko jaɨkue rupi wae re. Jae ko Jesús. Jae ko Cristo yae chupe wae,” jei chupe reta.

5Jare kua uyandu reta yawe, uyembɨsakambuka reta ɨ pe yandeYa Jesús jee re.

6Joko wi Pablo oñono ipo jese reta jare ou jese reta Espíritu Santo. Jare umbɨpɨ uyemɨngeta reta ambɨe ye ye wae iñee pe kërái Espíritu Santo umbɨyemɨngetaka wae rupi. Jukuärái umɨmbeu reta ñee Tumpa wi etei ou wae.

7Kua kuimbae reta uyepapa doce rupi.

8Jare joko wi mbapɨ yasɨ rupi Pablo jekuaeño oo uike judío reta itupao pe mbutuu ara reta rupi. Jare ukɨye mbae rewe uikuaaka chupe reta kërái Tumpa umee Jesús iko waerä opaete wae imburuwicha wasurä jaeño mái pewa jare kërái yayekou waerä jokua re.

9Jukuärái jae oporomboe kërái ñanoi waerä tekowe opa mbae wae. Erëi jesewe amokue judío reta ipɨatäta ñeño reta jare uipota’ä wɨrowia reta Pablo oporomboe wae re. Jare jekuaeño uyemɨngeta kawi’ä reta opaete wae reta jowake Pablo oporomboe iko wae kotɨ.

Jayawe Pablo ueya jokua tupao, jare Cristo re wɨrowia wae reta yuraa wi Pablo ndiwe. Jare joko wiwe jae reta yuraa uyembatɨ pëti yembatɨrenda pe kuimbae Tiranno jee wae jëta pe oï wae. Jare opa ara rupi Pablo uyembatɨ joko pe yuweru wae reta ndiwe uyemɨngeta waerä yandeYa rewa.

10Jayawe Pablo oporomboe joko pe mokui año rupi. Jukuärái jeta judío reta jare judío mbae wae reta wi ɨwɨ Asia pewa reta uyandu yandeYa Jesús iñee.

11Jare Tumpa umee Pablo pe mbaepuere uyapo waerä mbaembae kiawe ipuere’ä uyapo wae.

12Jukuärái Pablo iasoya omonde wae jare ipañera yepe kía wɨraa oñono yawe imbaerasɨ wae re, imbaerasɨ wae ukuera woi. Jare oñono yawe aña uyembɨiya jese wae re, aña usɨrɨ woi chuwi.

13-14Jokua ara reta rupi uasa yureko amokue judío reta tëta wasu reta rupi omoë reta waerä ipotawe wi aña uyembɨiya jese wae. Jare jukuärái uyapo yureko wi kuimbae Esceva jee wae taɨ chiu wae reta. Esceva ko jae pëti judío reta isacerdote tenondewa.

Pëti ara tëta wasu Éfeso pe yureko yawe, Esceva taɨ reta uipota tëi omoë aña pëti kuimbae wi Jesús jee re. Echa’ä jei reta aña pe: “¡Jokua Jesús Pablo umɨmbeu oï wae jee re ndoe ndewe eë chuwi!” jei chupe.

15Jayawe aña jei chupe reta: “Che aikuaa aï Jesús, jare aikuaa aï wi kía ko jae Pablo wae. Erëi ¿kía reta ra ko pe?” jei chupe reta.

16Jare jokua kuimbae aña uyembɨiya jese wae jawoi pewa pochɨ rewe uepeña reta, jare opa jae reta uñemɨamɨrika. Jayawe jae reta opa oë osi jokua tëta wi nani etei jare opa iperepere reta.

17Jayawe jokua jeräkua judío reta pe jare judío mbae wae reta pe wi tëta wasu Éfeso pe. Jáeramo opaete rewe uipɨuete yandeYa Jesús wi, jare umbɨpɨ umbutuicha reta jae jee.

18Jare jeta jaeramo Cristo re wɨrowia wae reta uñemɨmichi rewe uyembeu reta ïru wae reta jowake kërái Tumpa kotɨ uyawɨ reta wae.

19Jare jeta ipaye wae reta wɨrowia wi Cristo re jare ueya reta ipaye wae. Jáeramo jae reta ueru itupapire reta ipaye pewa jare opa uapɨ reta opaete wae jowake. Jare jokua tupapire reta uapɨ reta wae jepɨete ko. Echa’ä uyepapa yawe, uepitɨ 50.000 riare korepoti pewa.

20Jukuärái Tumpa uechaka jeta wae reta pe imbaepuere tuicha wae. Jáeramo jeräkua opaete rupi yandeYa iñee, jare jeta wae reta wɨrowia jese.

21Kua jaɨkue rupi Pablo upɨta oo waerä ɨwɨ Macedonia jare ɨwɨ Acaya rupi Jerusalén pe. Jare jae jei iyupe: “Joko wi a ñotái ko tëta wasu Roma pe,” jei.

22Jayawe Pablo omondo ɨwɨ Macedonia kotɨ mokui imborɨa reta Timoteo jare Erasto jee wae. Erëi jae upɨta mbowɨ ara pewa ye ɨwɨ Asia pe.

Tekorái uyembɨpɨ Pablo kotɨ Éfeso pe

23Jokua ara reta rupi tëta wasu Éfeso pe umbɨpɨ yembɨawái tuicha wae yemboe yandeYa rewa wae kotɨ.

24Echa’ä joko pe iko pëti kuimbae Demetrio jee wae. Jae iparawɨkɨ ko umɨndɨkui korepoti tïi wae jare uyapo mbaembae pɨpe owaka waerä. Jokua año reta rupi jeta Éfeso pewa reta umbɨadora itumparaanga Diana jee wae re. Jare Diana itupao iko Éfeso pe. Jáeramo Demetrio umɨngana kawiete uyapo owaka Diana itupaoraanga michi wae reta. Jare Demetrio umbɨepɨ kawi wi imborɨa reta pe.

25Pëti ara Demetrio uyembatɨ opaete jokua nunga mbarawɨkɨ uyapo wae reta ndiwe jare jei chupe reta: “Kuimbae reta, pe reta pikuaa peï yamɨngana kawiete ñaï kua mbarawɨkɨ yayapo wae rupi,” jei.

26“Mase, pe reta pecha jare piyandu ma kërái jokua kuimbae Pablo jee wae umbɨpɨambɨeka oï jeta wae reta. Jae wɨrowiaka ma jeta wae reta pe kua Éfeso pe jare opaete ɨwɨ Asia rupi kërái tumparaanga reta kuimbae reta uyapo ipo pe wae tumpa reta’ä ko,” jei.

27“Jáeramo tëta wasu pewa reta aramoi wɨrɨ̈rota kua yandeparawɨkɨ. Jare jeieteta aramoi wɨrɨ̈rota reta wi yandetumpa kuña jupiete wae Diana itupao,” jei. “Yepe tëi Diana jeräkuaete kua ɨwɨ Asia rupi jare opaete ɨwɨ rupi wi, erëi aramoi ndarau ye ma umbɨadora reta jese,” jei chupe reta.

28Jayawe jokua Demetrio jei wae uyandu reta yawe, pochɨete reta jare iñeeäta rewe jei pɨi reta: “¡Tuyembutuichaka yandetumpa Diana jee!” jei reta.

29Jayawe tekorái uñemɨái opaete tëta wasu rupi. Jare jeta wae reta osi yuraa uyembatɨ waerä tëta wasu pewa reta iyuwangarenda wasu pe. Jare amokue wae reta uipɨsɨ wɨraa Gayo jare Aristarco. Jae reta ko jae Pablo iwataïru reta ɨwɨ Macedonia pewa.

30Jayawe Pablo oo tëi iko wi tëta wasu pewa reta uyembatɨ ñonoï wae pe uyemɨngeta waerä jae reta ndiwe. Erëi amokue hermano reta oyopia Pablo, jukuärái rupi uepɨ reta jokua pochɨ wae reta wi.

31Jae nunga wi amokue mburuwicha reta ɨwɨ Asia pewa Pablo ndiwe uyepokuaa reta wae omondo umɨmbeuka Pablo pe awɨye oo waerä yuwangarenda wasu kotɨ.

32Jare yuwangarenda wasu rupi jeta tekorái pe uyemɨinge wae reta opa uyembopa reta. Amokue wae reta iñeeäta mbaembae re, jare ïru wae reta iñeeäta ambɨe re. Añetete opaete seri uikuaa’ä yureko maera ra uyembatɨ yureko wae.

33Amokue judío reta umɨaña jenonde kuimbae Alejandro jee wae, jare umɨñera reta jae uikuaaka waerä yembatɨ pe ñonoï wae reta pe mbae uasa oï wae rewa. Jayawe Alejandro ipo pɨpe uipota tëi umɨkïi reta, echa’ä uipota tëi imiäri tëta wasu pewa reta pe awɨye waerä jae reta umbɨjeko judío reta jokua yembɨawái re.

34Erëi yembatɨ pe ñonoï wae reta uikuaa yawe jae ko judío wae, opaete pëti rami iñeeäta rewe jei pɨi reta: “¡Tuyembutuichaka yandetumpa Diana jee!” Jukuärái uyapo reta mokui ora seri rupi.

35Joko wi pëti mburuwicha tëta wasu pewa umɨkïi wɨte reta, jare jei chupe reta: “Kuimbae Éfeso pewa reta, opaete ɨwɨ pewa reta uikuaa kawi ko ñanerëta wasu Éfeso pe yaiko wae reta ko jae Diana itupao iyandarekoa reta. Jare uikuaa reta wi kërái yande yayandareko ñaï ita Diana echa oa ara wi wae re,” jei.

36“Jayawe ipuere’ä kía kua uikuaku ramo, ikawi ko pekïi waerä awɨye waerä mbae piyapo wɨrae ndei pepɨa pe piyemɨngeta kawi mbowe,” jei.

37“Mase, peru ma kua kuimbae reta kua pe. Erëi jae reta uyapo’ä mbae ikawi mbae wae yandetupao kotɨ, jare jei’ä wi mbae ikawi mbae wae yandetumpa kotɨ,” jei.

38“Demetrio jare imborɨa reta uipota uñeapo kía re yawe, ime mburuwicha reta ñonoï uyapɨsaka waerä jese reta,” jei.

39“Erëi jekuaeño ime yawe mbae re pipota piyemɨngeta waerä, piyapo ïruwe yembatɨ tëta wasu pewa pe,” jei.

40“Mase, añawe mburuwicha reta Roma pewa aramoi yanembɨjekota kua yayapo ñaï wae re. Jae reta upɨrandu yandewe yawe kua tekorái rewa, ¿mbae ra yaeta chupe reta? Ndarau yaikuaa,” jei mburuwicha chupe reta.

41Jare mburuwicha opa uyemɨngeta yawe, umbɨyapɨ yembatɨ jare opaete wae yuraa ye reta.